މުޅި ރާއްޖޭގެ މޫސުން ގޯސް، ފާއިތުވި 24 ގަޑިއިރު އެންމެ ގިނައިން ވާރޭ ވެހުނީ ފަރެސްމާތޮޑާ އަށް!
ޅ. އަތޮޅުން ފެށިގެން އައްޑޫ ސިޓީއާ ހަމައަށް މޫސުން ގޯސްވާނެ ކަމަށް ލަފާކޮށް މޫސުމާބެހޭ ގައުމީ އިދާރާއިން ވަނީ ވައިޓް އެލާޓް ނެރެފައި. ކުރިއަށް އޮތް ވަގުތުތަކުގައި އެކިހިސާބަށް ވިއްސާރަކޮށް ވިލާގަނޑުގައި ގަޑިއަކު 40 މޭލަށް ވައިގަދަވާނެ ކަމަށް ލަފާކުރެވޭތީ، ހުރިހާ ފަރާތްތަކުން މޫސުމަށް ސަމާލުވުމަށް އެ އިދާރާއިން އިލްތިމާސްކޮށްފައިވޭ. މީގެ އިތުރުން ވޭތުވެދިޔަ 24 ގަޑިއިރު އެންމެ ގިނައިން ވާރޭވެހިފައިވަނީ ގދ. ފަރެސްމާތޮޑާ އަށް.
މޫސުން - މާލެއަށް ބޯކޮށް ވާރޭވެހެނީ. | ރާއްޖެއެމްވީ
މުޅި ރާއްޖޭގެ މޫސުން ގޯސްވެ، ބޮޑު ސަރަހައްދަކަށް ވައިޓް އެލާޓް ނެރެފި އެވެ.
މޫސުމާބެހޭ ގައުމީ އިދާރާއިން ވައިޓް އެލާޓް ނެރިފައިވަނީ ޅ.އަތޮޅުން ފެށިގެން އައްޑޫ ސިޓީއަށެވެ. އަދި އެލާޓް ފުރަތަމަ ނެރުނީ ބުދަ ދުވަހުގެ ފަތިހު 5:00ން ހެނދުނު 10:00ށެވެ. އޭގެފަހުން ބުދަ ދުވަހުގެ ހަވީރު 5:00ށް އެލާޓް ވަނީ ދިގު ދަންމާލާފަ އެވެ.
މޫސުމާބެހޭ ގައުމީ އިދާރާއިން ބުނީ، ބުދަ ދުވަހުގެ ހެނދުނު 10:00ން ބުރާސްފަތި ދުވަހުގެ 10:00ށް އެކިހިސާބަށް ވިއްސާރަކޮށް ގުގުރާނެ ކަމަށާއި، ބައެއް ރަށްތަކަށް ބޯކޮށް ވާރޭވެހުން އެކަށީގެންވާ ކަމަށެވެ.
ހުޅަނގާއި ހުޅަނގުއުތުރުން ގަޑިއަކު 5 މޭލާއި 15 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި، ވިލާގަނޑުގައި ގަޑިއަކު ގާތްގަނޑަކަށް 40 މޭލަށް ވައިގަދަވުން އެކަށީގެންވާ ކަމަށް އެއިދާރާއިން ބުންޏެވެ. އަދި ކަނޑުތައް އާދައިގެ ވަރަކަށް މަޑުވެފައި ވިލާގަނޑުގައި އާދައިގެ ވަރަކަށް ގަދަވާނެ ކަމަށާއި، ރާޅުގެ އުސްމިނުގައި 5 ނުވަތަ 2 ފޫޓު ހުންނާނެ ކަމަށް މޫސުމާބެހޭ ގައުމީ އިދާރާއިން ބުންޏެވެ.
މީގެ އިތުރުން އެ އިދާރާއިން ބުނީ، އަންގާރަ ދުވަހުގެ ހެނދުނު 8:00ން ބުދަ ދުވަހުގެ ހެނދުނު 8:00ށް އެންމެ ގިނައިން ވާރޭ ވެހިފައިވަނީ ގދ. ފަރެސްމާތޮޑާ ކަމަށާއި، އެރަށަށް 58.1 މިލިމީޓަރުގެ ވާރޭ ވެހިފައިވާ ކަމަށެވެ. ދެ ވަނަ އަށް 42.9 މިލިމީޓަރުގެ ވާރޭ އއ.ތޮއްޑޫ އަށް ވެހިފައިވާއިރު، ތިން ވަނަ އަށް ގއ. ކޫއްޑޫއަށް 39.5 މިލިމީޓަރުގެ ވާރޭ ވެހިފައިވާ ކަމަށެވެ. އަދި މ.މުއްޔަށް 37.8 މިލިމީޓަރުގެ ވާރޭ، ލ.ކައްދޫއަށް 37.0 މިލިމީޓަރުގެ ވާރޭ، ފ.ނިލަންދޫއަށް 34.6 މިލިމީޓަރުގެ ވާރޭ އަދި އދ.މަހިބަދޫ އަށް 34.0 މިލިމީޓަރުގެ ވާރޭ ވެހިފައިވާ ކަމަށް މޫސުމާބެހޭ ގައުމީ އިދާރާގެ އާއްމުކޮށްފައިވާ ތަފާސްހިސާބުތަކުން ދައްކަ އެވެ.
ރާއްޖޭގެ މޫސުން ގޯސްވެފައިވާތީ ހުރިހާ ފަރާތްތަކުންވެސް މޫސުމަށް ސަމާލުވުމަށް ވަނީ އިލްތިމާސްކޮށްފަ އެވެ.
