ޚާއްސަ އެހީ އަށް ބޭނުންވާ ބައެއް ކުދިންނަށް މޭއި މަހުގެ އެލަވަންސް އަދިވެސް ނުލިބޭ
ޚާއްޞަ އެހީއަށް ބޭނުންވާ މީހުންނަށް ދޭ އިނާޔަތް ޖަމާކުރުމުގައި ލަސްތަކެއް އުޅޭކަމަށް އެންސްޕާއިން އެއްބަސްވެފައިވާއިރު، އެ އިދާރާއިން ބުނަނީ ފައިސާ ފޮނުވުމުގެ ކަންކަން މިހާރު ކުރިއަށްދާ ކަމަށް.
އެންސްޕާގެ ނަން ބޯޑު ފެންނަ ފޮޓޯ އެއް | ސޯޝަލް މީޑިއާ
އެންސްޕާގެ ފަރާތުން ޚާއްޞަ އެހީ އަށް ބޭނުންވާ ބައެއް ކުދިންނަށް މޭއި މަހުގެ އެލަވަންސް އަދިވެސް ނުލިބޭކަން ހާމަވެއްޖެ އެވެ.
އާއްމުކޮށް މަސް ނިމުމުގެ ކުރިން އެ ފައިސާ ޖަމާވި ނަމަ ވެސް މޭއި މަސް ނިމުނު އިރު ވެސް އެ މަހުގެ އެލަވަންސް ދީފައި ނުވާތީ އާއްމުން ދަނީ ވަރަށް ބޮޑަށް ކަންބޮޑުވުން ފާޅުކުރަމުންވެ.
މިކަމާއި ގުޅިގެން ރާއްޖެޓީވީގެ ފަށާއިރު ޕްރޮގްރާމްގައި އެންސްޕާ އަށް ގުޅުމުން ވިދާޅުވީ އެލަވަންސް ޖަމާކުރުމަށް އެ އިދާރާ އިން ވަނީ ފޮނުވާފައި ކަމަށެވެ. އެހެންނަމަވެސް ލަސްތަކެއް އުޅޭކަމަށް ބެލެވޭ ކަމަށް އެ އިދާރާ އިން ވަނީ ފާހަގަކުރައްވާފަ އެވެ. އެންްސްޕާ އިން އެލަވަންސްގެ ފައިސާ ފޮނުވި ކަމަށް ބުނަނީ ކޮންތަނަކަށްތޯ ސުވާލުކުރުމުން އެ އިދާރާ އިން ވާހަކަދެއްކެވި ބޭފުޅާ ވިދާޅުވީ އެކަން ޖެހޭނީ ކަމާއި ގުޅުން ހުރި ސެކްޝަން އަށް ގުޅުމަށް ފަހު ޖަވާބުދޭނެ ކަމަށެވެ.
"ޑީލޭ އެއް އައި. އަޅުގަނޑުމެން ފިނޭންސް އަށް ފޮނުވާފަ ވީ. ލިބޭނެ ކަމަށް ވިދާޅުވި." އޭނާ ވިދާޅުވި އެވެ.
ޚާއްސަ އެހީ އަށް ބޭނުންވާ މީހުންނަށް އިނާޔަތުގެ ގޮތުގައި ދޭން ޖެހޭ ފައިސާ ހޯމަ ދުވަހު ދީފައިވާ ކަމަށް އެ އިދާރާ އިން ބުނި ނަމަވެސް ހޯމަ ދުވަހު މެންދުރާއި ހަމައަށް ދިޔަ އިރު ވެސް ބައެއް ފަރާތްތަކަށް އެ ފައިސާ ލިބިފައި ނުވާތީ ބައެއް ބެލެނިވެރިން ވަނީ އެ މައުލޫމާތު ރާއްޖެއެމްވީ އާއި ހިއްސާކޮށްފަ އެވެ.
އެންސްޕާގެ ފަރާތުން ޚާއްސަ އެހީ އަށް ބޭނުންވާ މީހުންނަށް ފޯރުކޮށްދޭން ޖެހޭ އިނާޔަތް ފޯރުކޮށް ނުދީ ލަސްވާތީ އެ ކަންބޮޑުވުން ބައެއް އާއްމުން ދަނީ ދޭތެރެ ދޭތެރެއިން މި ނޫހާއި ވެސް ހިއްސާކުރަމުންނެވެ. އެންސްޕާ އިން ޚާއްސަ އެހީ އަށް ބޭނުންވާ މީހުންނަށް ދޭން ޖެހޭ އިނާޔަތް ނުދީ ލަސް ކުރި އިރު، ދައުލަތުގެ މުވައްޒަފުންނަށް މުސާރަ ދިނުން ވެސް ނިމިދިޔަ މަހު ވަރަށް ބޮޑަށް ލަސްވެފައިވެ އެވެ.
