އުދަރެސް 11 ވަނަ ޓަވަރާ ދިމާލުން ބޭރުގައި އޮންނަ ހުސް ބިން ނުއަގުގައި ވިއްކާލި ކަމުގެ ތުހުމަތު، ކޮންސްޓްރަކްޝަންގެ މަސައްކަތް ކުރާތީ ރައްޔިތުން ތިބީ ކަންބޮޑުވުމެއްގެ ތެރޭގައި!
"އުދަރެސް" ޓަވަރުތަކާ އިންވެގެން އޮތް ހުސްބިންތަކުގައި ކުއްލި ގޮތަކަށް އިމާރާތްކުރަން ފެށުމުން، އެ ސަރަހައްދުގެ ވެންޓިލޭޝަން ގެއްލި ހިތްފަސޭހަކަން ކުޑަވެދާނެތީ އާންމުން ދަނީ ކަންބޮޑުވުން ފާޅުކުރަމުން. ކުރިން ގްރީން އޭރިއާއެއްގެ ގޮތުގައި ކަނޑައަޅާފައިވާ މި ބިންތައް ނުއަގުގައި ވިއްކާލާފައިވާ ކަމަށް ތުހުމަތުކުރެވޭއިރު، އެޗްޑީސީ އާއި އެފްޑީސީން މިކަމާ ގުޅޭ ސާފު މައުލޫމާތެއް ހިއްސާނުކުރާ ކަމަށް އެޓަވަރުތަކުގައި ދިރިއުޅޭ ރައްޔިތުން ބުނޭ.
އުދަރެސް 11 ވަނަ ޓަވަރާ ދިމާލުން ބޭރުގައި އޮންނަ ހުސް ބިމުގައި ކޮންސްޓްރަކްޝަން މަސައްކަތްތައް ކުރަނީ. | ރާއްޖެއެމްވީ
ފަހި ފްލެޓުތަކުގެ އުދަރެސް 11 ވަނަ ޓަވަރާ ދިމާލުން ބޭރުގައި އޮންނަ ހުސް ބިން ކުއްލި ގޮތަކަށް ބަންދުކޮށް ކޮންސްޓްރަކްޝަންގެ މަސައްކަތްތައް ކުރަމުންދާތީ، އެ ޓަވަރުގައި ދިރިއުޅޭ ރައްޔިތުން ކަންބޮޑުވުންފާޅު ކުރަން ފަށައިފި އެވެ.
ރާއްޖެއެމްވީއަށް މައުލޫމާތު ދިން އުދަރެސް 11 ގައި ދިރިއުޅޭ އާއްމު މީހަކު ބުނީ، އުދަރެސް 11 ވަނަ ޓަވަރުގެ ނިރޮޅުމަގާ ދިމާލަށް އޮންނަ ހުސް ބިމަކީ ގްރީން އޭރިޔާއެއްގެ ގޮތުގައި ކަނޑައަޅާފައިވާ ބިމެއް ކަމަށް ފްލެޓުތައް ބަލަހައްޓަމުންދާ ފަހި ދިރިއުޅުން ކޯޕްރޭޝަން (އެފްޑީސީ) އިން މީގެ ކުރިން މައުލޫމާތު ދީފައިވާ ކަމަށެވެ. އެ ބިމަކީ އެޗްޑީސީގެ ބެލުމުގެ ދަށުގައި އޮންނަ ބިމެއް ކަމަށާއި، އެބިން ހިތްފަސޭހަ މައިދާނެއްގެ ގޮތުގައި ތަރައްގީ ކުރާނެ ކަމަށް މައުލޫމާތު ދިން ކަމަށެވެ.
ނަމަވެސް ކުއްލި އަކަށް އެ ބިން ބަންދުކޮށް، މިހާރު ކޮންސްޓްރަކްޝަން މަސައްކަތް ފަށާފައިވާ ކަމަށާއި، އެބިމުގައި 4 ނުވަތަ 10 ބުރީގެ އިމާރާތެއް އަޅަން އުޅޭކަމުގެ އަޑުތައް ފެތުރިފައިވާ ކަމަށް އޭނާ ބުންޏެވެ. އަދި އެބިން ނުއަގުގައި ވިއްކާލާފައިވާ ކަމަށް ވެސް ގިނަ ބަޔަކު ތުހުމާތު ކުރާ ކަމަށް އެމީހާ ބުންޏެވެ.
މީގެ އިތުރުން އޭނާ ބުނީ، އެބިމުގައި އިމާރާތެއް އެޅުމުން ފްލެޓުގައި ދިރިއުޅޭ މީހުންނަށް ވަރަށް ދަތިވާނެ ކަމަށާއި، އުދަރެސްގެ 11 އަދި 12 ޓަވަރުގެ ފްލެޓުތަކުގެ ވެންޓިލޭޝަނާއި، ވިޔު ވެސް ގެއްލޭނެ ކަމަށެވެ. އަދި ސޯޝަލް ހައުސިން ޔުނިޓަށް މީހުން ދިރިއުޅުން ބަދަލު ކުރަނީ ހިތްފަސޭހަ ހަމަޖެހޭ ދިރިއުޅުމެއް ބޭނުންވާތީ ކަމަށާއި، ނަމަވެސް މިކަމުގެ ސަބަބުން އެ އުފާވެރިކަން ގެއްލޭ ކަމަށް އޭނާ ބުންޏެވެ.
މިއީ ވަރަށް ގިނަ ރައްޔިތުންގެ ކަންބޮޑުވުމެއްކަން ފާހަގަކޮށް އެމީހާ ބުނީ، އެފްޑީސީ އަށް އަދި އެޗްޑީސީއަށް ޝަކުވާ ހުށަހެޅި ނަމަވެސް ޖަވާބެއް ނުލިބޭ ކަމަށެވެ. އަދި ގިނަ ބަޔަކު އީމެއިލް ވެސް ޝަކުވާ ހުށަހަޅާފައިވާ ކަމަށާއި، ވާނުވާ ނޭނގޭ ކަމަށް އޭނާ ބުންޏެވެ.
މީގެ އިތުރުން އެމީހާ ބުނީ، އާމާން ދޯދި ޓަވަރުތަކުގެ ތެރެއިން 16 ވަނަ ޓަވަރާ އިން ވެގެން އޮތް ހުސް ބިން ވެސް ވިއްކާލި ކަމުގެ މައުލޫމާތު ލިބޭ ކަމަށެވެ. އެ ބިން ވެސް ބަންދުކޮށް ކޮންސްޓްރަކްޝަން މަސައްކަތްތައް ކުރަމުންދާ ކަމަށާއި، މި ބިމާ ގުޅޭ މައުލޫމާތު ވެސް ކަމާގުޅުން ހުރި އެއްވެސް ކޯޕްރޭޝަނަކުން ނުވަތަ ކުންފުންޏަކުން ސާފުކޮށްދީފައިނުވާ ކަމަށެވެ.
ގެދޮރުވެރިޔާ ސްކީމުން އިމާރާތް ކުރި މިޓަވަރުތަކުގެ ސަރަހައްދުގައި ހުރި ބިންތައް މިގޮތަށް ވިއްކާ އިތުރު އިމާރާތްތައް އަޅާނަމަ މި ސަރަހައްދުގައި ދިރިއުޅޭ މީހުންނަށް ހިތްހަމަ ޖައްސާލުމަށް ނުކުމެ ތިބޭނެ ޕާކެއް ހިތްފަސޭހަ މައިދާނެއް ނޯންނާނެ ކަމަށް ބުނެ ގިނަ ބަޔަކު ދަނީ ކަންބޮޑުވުން ފާޅު ކުރަމުންނެވެ.
ނަމަވެސް މި މައްސަލައާ ގުޅޭގޮތުން އެޗްޑީސީ އަދި އެފްޑީސީގެ ބަހެއް ވަނީ ލިބޭ ގޮތް ނުވެފަ އެވެ.
