ގެދޮރުވެރިޔާ ހުރިހާ ޓަވަރަކަށް ކޭބަލް އާއި އިންޓަނެޓް ނުލިބޭ މައްސަލަ: ކުރިއަށް ތިން މަސް ދުވަހުގެ ތެރޭގައި ޚިދުމަތް ލިބޭނެ އެފްޑީސީން ބުނޭ
ގެދޮރުވެރިޔާ ފްލެޓުތަކަށް އިންޓަނެޓާއި ކޭބަލް ޓީވީގެ ޚިދުމަތް ނުލިބި ލަސްވަނީ، ކުރީގެ ސަރުކާރުން މަޝްރޫއުގެ އެއްބަސްވުމުގައި ސޮއިކުރިއިރު ޖީޕޮން ސިސްޓަމް ގާއިމުކުރުން އުނިކޮށްފައިވާތީ ކަމަށް ހަމްދާން ވިދާޅުވި. ނަމަވެސް މިހާރު 9 ޓަވަރެއްގައި އެ ސިސްޓަމް އެޅުމުގެ މަސައްކަތް ކުރިއަށްދާއިރު، ކުރިއަށް އޮތް ތިން މަސްދުވަހުގެ ތެރޭގައި ހުރިހާ ޓަވަރަކަށް މި ޚިދުމަތްތައް ފޯރުކޮށްދެވޭނެ ކަމަށް އޭނާ ވިދާޅުވި. މި ޚިދުމަތްތައް ދާއިމީކޮށް ގާއިމުކުރެވެންދެން، އެއަރ ފައިބަރ ފަދަ ވަގުތީ ވަސީލަތްތައް ހެޔޮ އަގުގައި ފޯރުކޮށްދިނުމަށް މަސައްކަތް ކުރާ ކަމަށް އޭނާ ވިދާޅުވި.
ގެދޮރުވެރިޔާ ސްކީމްގެ ދަށުން ބިނާ ކޮށްފައިވާ ޓަވަރުތަކެއް. ގިނަ ބަަޔަކު މިސަރަހައްދުގައި މިހާރު ދަނީ ދިރިއުޅެމުން. | ރާއްޖެ އެމްވީ
ގެދޮރުވެރިޔާގެ ހުރިހާ ޓަވަރަކަށް ކޭބަލްގެ ޚިދުމަތާއި އިންޓަނެޓުގެ ޚިދުމަތް ކުރިއަށް އޮތް 3 މަހަށް ވުރެ އަވަހަށް ލިބޭނެ ކަމަށް، ފަހި ދިރިއުޅުން ކޯޕަރޭޝަން (އެފްޑީސީ)ގެ މެނޭޖިން ޑިރެކްޓަރު ހަމްދާން ޝަކީލް ވިދާޅުވެއްޖެ އެވެ.
ގެދޮރުވެރިޔާގެ ފްލެޓުތަކަށް ކޭބަލްގެ ޚިދުމަތާއި އިންޓަނެޓް ނުލިބޭކަމުގެ ޝަކުވާ ވަނީ ބޮޑުވެފަ އެވެ. ގިނަ ބަޔަކު ފްލެޓުތަކުގައި ދިރިއުޅެމުންދާއިރު، ކޭބަލް ނުގުޅޭ މައްސަލައާއި، ދިރާގާއި އުރީދުގެ އިންޓާނެޓްގެ ޚިދުމަތް ނުލިބޭ މައްސަލަ ބޮޑެވެ.
މި މައްސަލައާ ގުޅޭގޮތުން ބުރާސްފަތި ދުވަހުގެ ފަށާއިރު ޕްރޮގްރާމްގައި ހަމްދާން ވިދާޅުވީ އިންޓަނެޓްގެ ޚިދުމަތް ލިބޭނީ ޖީޕޮން ސިސްޓަމް ގާއިމް ކޮށްގެން ކަމަށާއި، ޚިދުމަތް ދިނުން ލަސްވެގެން ދަނީ މިދިޔަ ސަރުކާރުގައި މިމަޝްރޫއު ހަވާލުކުރިއިރު، މި މަސައްކަތް ސްކޯޕުން ބޭރު ކޮށްފައިވާތީ ކަމަށެވެ.
މިހާރު އިންޓަރނެޓުގެ ޚިދުމަތް ހަގީގަތުގައި މި ޕްރޮޖެކްޓް މިދިޔަ ސަރުކާރުގައި ސޮއިކުރެވުނު އިރު އިންޓަރނެޓް ބޭނުންވާ އިންޓަރނެޓް މި ލިބެނީ، ބްރޯޑްބޭންޑް އިންޓަރނެޓް ލިބޭނީ އަނެއް ޔުނިޓަށް މި ބޭނުންވާ، އެ އިމާރާތަށް ބޭނުންވާ ޖީޕޮން ސިސްޓަމް ގާއިމުކޮށްގެން އެ މަސައްކަތް އޮތީ މިދިޔަ ސަރުކާރުގައި އެގްރީމެންޓްގައި ސޮއިކުރިއިރު ސްކޯޕުން ރިމޫވްކޮށްފައި. އޭގްޒިމް ފަންޑަށް ޕްރޮޖެކްޓެއްގައި އެގޮތަށް ސްކޯޕުން ރިމޫވްކޮށްފި އެއްޗަކަށް ރީފައިނޭންސް ކުރުމަކީ ހަމަ ވަރަށް އުނދަގޫ ކަމެއް އިނގޭތޯ.އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް
މިހާރު މަސައްކަތް ކުރަމުންދާކަން ފާހަގަކުރައްވައި ހަމްދާން ވިދާޅުވީ މިހާރު ވެސް 9 ޓަވަރެއްގައި ޖީޕޮން ސިސްޓަމް އެޅުމުގެ މަސައްކަތް ކުރިއަށްދާ ކަމަށެވެ. އަދި ކުރިއަށް އޮތް ތިން މަސް ދުވަހުގެ ތެރޭގައި މަސައްކަތް ނިންމާލެވޭނެ ކަމަށް އޭނާ ވިދާޅުވި އެވެ.
މިއަދުވެސް ގާތްގަނޑަކަށް 110 ޔުނިޓަށް އޯއެންޓީ ޑިވައިސް އަޅާނެ މިއަދު. އެޅީމަ އެހިސާބުން ހަމަ އަނެއް ބްރޯޑް ބޭންޑް އިންޓަރނެޓަށް އަނެއް މީޑިއާނެޓް ސާރވިސް ލިބޭނެ. ދެން އިން ދަ މީންޓައިމް އަޅުގަނޑުމެން މިދަނީ އައި.އެސް.ޓީއާ އެއްކޮށް މަސައްކަތް ކުރަމުން ހަމަ ބްރޯޑްބޭންޑް އަނެއް އިންޓަރނެޓްގެ ބަދަލުގައި މިހާރު އެބަހުރޭ ތެދެއްތޯ އެއަރފައިބަރ ކަހަލަ ސަރވިސަސް. އެ އެއްޗެހި އަނެއް ރަނގަޅު ޑިސްކައުންޓަކާ އެއްކޮށް ޕްރޮވޭޑްކުރެވޭނެ ކަހަލަ ގޮތަކަށް މަސައްކަތްކުރަމުން މިދަނީ. ދެން މިހާރު އެ ޓައިމްލައިނަކީ އަނެއް ދިރާގުން އައި މަސައްކަތް އަޅުގަނޑުމެންނަށް ނިންމާލަދޭނެ. ކުރިއަށް އޮތް އޯލް 32 ޓަރވަރސް އަށް ނިންމާލަދޭނެ ކަމަށް މި ލަފާ ކުރަނީ ކުރިއަށް އޮތް ތިން މަސްދުވަސް ތެރޭގައި. އެކަމަކު ދޭއަރ ގިވިން އެޝުއަރެންސް ވާހަކައަކީ އެއަށްވުރެ ވެސް އަވަސްވާނެ ކަމަށް.އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް
ހަމްދާން ވިދާޅުވީ ރައްޔިތުންނަށް ބޭނުންވާ ޚިދުމަތްތައް ގާއިމް ކުރުމަށް މަސައްކަތް ކުރާ ކަމަށާއި، ޚިދުމަތް ދިނުމަށްޓަކައި މަސައްކަތް ކުރާ ސްޕީޑް ވެސް ރަނގަޅު ކަމަށެވެ.
ހަމްދާން މިމޭރުމުން ވާހަކަ ދެއްކެވި ނަމަވެސް ޖެނުއަރީ މަހުގެ 27 ވަނަ ދުވަހު ދިރާސީ އައު އަހަރަށް ކިޔަވަން ފެށުނު އިރު އާއިލާތަކުން ފްލެޓުތަކަށް ދިރިއުޅުން ވަނީ ބަދަލުކުރަން ފަށާފަ އެވެ. މިހާރު ގިނަ ބަޔަކު އެ ސަރަހައްދުގައި ދިރިއުޅުނު ނަމަވެސް މިއަދާ ހަމައަށް ކޭބަލް އާއި އިންޓަނެޓްގެ ޚިދުމަތް ނުލިބޭތީ ގިނަ ބަޔަކު ދަނީ އެކަމުގެ ކަންބޮޑުވުން ފާޅު ކުރަމުންނެވެ.
