ބޭރުން ރޯޑް އިންޖިނިއަރެއް ގެނެސްގެން އަމީނީ މަގުގައި އަލުން ތާރު އަޅަނީ

މާލޭގެ އަމީނީމަގުގެ ހުޅަނގު ފަރާތުގައި އަޅާފައިވާ ތާރުގަނޑު ވަރަށް ބޮޑަށް ހަލާކުވެފައިވާތީ، އެ ސަރަހައްދުގެ ތާރުގަނޑު އެއްކޮށް ނަގައި އަލުން ތާރުއެޅުމުގެ މަސައްކަތް ކުރުމަށް ތައްޔާރުވަމުން އަންނަކަމަށް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ހާމަކޮށްފި އެވެ.

އެ ކުންފުނީގެ މެނޭޖިން ޑިރެކްޓަރު އިބްރާހިމް ނަޒީމް ވިދާޅުވީ، މި މަސައްކަތް ކުރިއަށް ގެންދިއުމަށް ހަމަޖެހިފައިވަނީ ރާއްޖެ އިން ބޭރުން ޚާއްސަ ރޯޑް އިންޖިނިއަރެއް ގެނެސްގެން ކަމަށެވެ.

ދައުލަތުގެ މީޑިއާގެ ޕްރޮގްރާމެއްގައި ވާހަކަދައްކަވަމުން ނަޒީމް ވިދާޅުވީ، ޣިޔާސުއްދީން އިންޓަނޭޝަނަލް ސްކޫލުން ފެށިގެން އަމީނީ މަގުގެ ހުޅަނގަށް އޮތް ބައި ވަރަށް ބޮޑަށް މަރާމާތުކުރަން ޖެހިފައިވާ ކަމަށެވެ. އެ މަސައްކަތް ފެށުމަށްޓަކައި މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗާއާ އެކު މަޝްވަރާ ކުރަމުންދާ ކަމަށާއި، ކުރިއަށް އޮތް ދެ ހަފުތާއެއްހައި ދުވަހުގެ ތެރޭގައި އަމަލީ މަސައްކަތް ފެށޭނެ ކަމަށް އޭނާ ލަފާކުރެއްވި އެވެ.

އަމީނީ މަގުގެ އެންމެ ފަހު ސެގްމަންޓުގައި ތާރު އަޅައި މުޅި މަގުގެ މަސައްކަތް ނިންމާލާފައިވަނީ މީގެ ދެ އަހަރެއްހާ ދުވަސް ކުރިން، މި ސަރުކާރު ވެރިކަމާ ހަވާލުވި ފަހުންނެވެ. ކުރީގެ ރައީސް އިބްރާހިމް މުޙައްމަދު ޞާލިޙްގެ ސަރުކާރުގައި ޕްލޭނިން މިނިސްޓްރީން އަމީނީ މަގު ޒަމާނީ ފެންވަރަށް ތަރައްގީކުރުމުގެ މަސައްކަތް އާރްޑީސީއާ ހަވާލުކުރީ 84.4 މިލިއަން ރުފިޔާ އަށެވެ. ނަމަވެސް މަގު ބޭނުންކުރަން ފެށިތާ ކުޑަ ދުވަސްކޮޅެއްގެ ތެރޭގައި ތާރުގަނޑަށް ވަނީ އެކި މައްސަލަތައް ދިމާވާން ފަށާފައެވެ.

ޚާއްސަކޮށް ފުޑްކޯޓުތައް ހުންނަ ސަރަހައްދުގެ ތާރުގަނޑު ރާޅުބާނި ތަކެއްހެން އުފުލުމުގެ މައްސަލަ މީގެ ކުރިން ވެސް ވަނީ ދިމާވެފަ އެވެ. އެކަން ހައްލުކުރުމަށް މިދިޔަ ސެޕްޓެމްބަރު މަހުގެ ތެރޭގައި ސަރުކާރުން މަރާމާތުގެ މަސައްކަތްތަކެއް ކުރި ނަމަވެސް، އަނެއްކާވެސް އެ ސަރަހައްދުގެ ބޮޑު ބައެއް ވަނީ ވަރަށް ބޮޑަށް ހަލާކުވެފަ އެވެ. މަގުގެ ދެ ފަރާތުން ތާރުގަނޑު އެކި ގޮތްގޮތަށް އުފުލިފައި އޮތުމުގެ ސަބަބުން، އެ މަގުން ދަތުރުކުރާ އާންމުންނަށް ބޮޑެތި ތަކުލީފުތަކަކާ ކުރިމަތިލާން ޖެހިފައިވާއިރު، މިއީ ނުރައްކާތެރި އެކްސިޑެންޓެއް ހިނގައިފާނެ ކަމެއްގެ ގޮތުގައި އާންމުން ދަނީ ކަންބޮޑުވުން ފާޅުކުރަމުންނެވެ.

 އަމީނީ މަގުގެ މަރާމާތުގެ މަސައްކަތް އަލުން ފެށުމުން، އެ ސަރަހައްދުގެ ޓްރެފިކަށް ބަދަލުތަކެއް އަންނާނެ ކަމަށް ބެލެވެ އެވެ.