ހަމާސްގެ އައު އަސްކަރީ ވެރިޔާ އަވަހާރަ ކޮށްލާފައިވާ ކަމަށް އިޒްރޭލް އިން ބުނެފި
27 މެއި 2026 | ބުދަ 06:34ހަމާސްގެ އަސްކަރީ ގާތްގަނޑުގެ އާ ކޮމާންޑަރު މުޙައްމަދު އޫދާ ނައްތާލާފައިވާ ކަމަށް އިސްރާއީލުގެ ދިފާއީ ވަޒީރު އިސްރާއީލް ކާޓްޒް ވަނީ އިއުލާންކުރައްވާފައެވެ. އިސްރާއީލުން މިފަދަ ބަޔާނެއް ނެރުނު ނަމަވެސް، މި ހަމަލާއާ ގުޅޭގޮތުން ހަމާސް ޖަމާއަތުން މިހާތަނަށް ރަސްމީކޮށް އެއްވެސް އެއްޗެއް ބުނެފައެއް ނުވެއެވެ. ޣައްޒާގައި އިސްރާއީލުން ދެމުންދާ ހަމަލާތަކުގައި ހަމާސްގެ އިސްވެރިންނަށް އަމާޒުކޮށް ދޭ ހަމަލާތައް ފަހަކަށް އައިސް ވަނީ ވަރަށް ބޮޑަށް އިތުރުކޮށްފައެވެ.
ޣައްޒާގައި ހަލާކުވެފައިވާ އިމާރާތެއްގެ ކައިރީގައި ކުޑަ ކުދިންނާއި، އާންމުން ޙަރަކާތްތެރި ވަނީ. | ރޮއިޓާސް
ޣައްޒާގައި ހަރަކާތް ތެރިވާ ހަމާސް ޖަމާއަތުގެ އަސްކަރީ އައު ވެރިޔާ މުޙައްމަދު އޫދާ، އިޒްރޭލް އިން ދިން ހަމަލާއެއްގައި އަވަހާރަ ކޮށްލާފައިވާ ކަމަށް އިޒްރޭލް އިން ހާމަ ކޮށްފި އެވެ.
އިޒްރޭލް އިން ބުނެފައިވާ ގޮތުގައި، މި ހަމަލާ ދީފައި ވަނީ އަންގާރަ ދުވަހު އެވެ.
މިއީ ހަމާސްގެ އަސްކަރީ ކުރީގެ ކޮމާންޑަރު އަވަހާރަ ކޮށްލިތާ މަދު ދުވަސް ކޮޅެއްގެ ތެރޭގައި، އެ މަގާމާ އަލަށް ހަވާލުވި ވެރިޔާ އަށް އަމާޒުކޮށް އިޒްރޭލް އިން ދިން މިފަދަ ދެވަނަ ހަމަލާ އެވެ. މި ހަމަލާއާ ގުޅޭ ގޮތުން އިޒްރޭލްގެ ދިފާއީ ވަޒީރު އިސްރާއީލް ކާޓްޒް އެކްސްގައި ކުރެއްވި ޕޯސްޓެއްގައި ވިދާޅުވީ، ހަމާސްގެ އަސްކަރީ އައު ކޮމާންޑަރު އަންގާރަ ދުވަހު އަވަހާރަ ކޮށްލާފައިވާ ކަމަށެވެ.
އިޒްރޭލްގެ ދިފާއީ ވަޒީރުގެ ބަޔާނުގައި ހަމާސްގެ ކޮމާންޑަރަށް ނިސްބަތްކޮށް ވަރަށް ހަރުކަށި ބަހުރުވަ ބޭނުން ކުރައްވާފައިވެ އެވެ. ނަމަވެސް، އިޒްރޭލް އިން ފަތުރަމުންދާ މި ޚަބަރާ ގުޅޭ ގޮތުން ހަމާސް ޖަމާއަތުން މިހާތަނަށް އެއްވެސް އެއްޗެއް ބުނެފައި ނުވެ އެވެ.
ޣައްޒާގައި އިޒްރޭލް އިން ދެމުންދާ ހަމަލާ ތަކުގައި ހަމާސްގެ އިސްވެރިންނަށް އަމާޒުކޮށް ދޭ ހަމަލާތައް ފަހަކަށް އައިސް ވަނީ އިތުރު ކޮށްފަ އެވެ. މުޙައްމަދު އޫދާ އަވަހާރަ ކޮށްލި ކަމަށް އިޒްރޭލް އިން ބުނާ އިރު، މިއީ އެ ޖަމާއަތުގެ ހަނގުރާމަވެރި ސަފުތަކަށް ދިން ވަރުގަދަ ހަމަލާއެއްގެ ގޮތުގައި މަސްރަހު ދިރާސާ ކުރާ ފަރާތް ތަކުން ސިފަކުރެ އެވެ.
މަސްދަރު: އޭއެފްޕީ
