ފަލަސްތީނުގެ މިނިވަން ދައުލަތެއް ގާއިމް ނުވަނީސް އިޒްރޭލާއެކު ގުޅުން ބަދަހި ނުކުރާނެ ކަމަށް ސައުދީން ބުނެފި
ފަލަސްތީނުގެ މިނިވަން ދައުލަތެއް އުފެއްދުމަށް ސާފު މަގަކުން ކަންކަން ފަހިވެގެން މެނުވީ، އިޒްރޭލާއެކު އެއްވެސް ސިފައެއްގައި ގުޅުން ގާއިމުނުކުރާނެކަމުގެ ޔަގީންކަން ސައުދީ އަރަބިއްޔާއިން ދީފި. މެދުއިރުމަތީގެ ސަރަހައްދީ ސުލްހަ ގާއިމުކުރެވޭނީ ފަލަސްތީނުގެ ރައްޔިތުންގެ ގާނޫނީ ހައްގުތައް ކަށަވަރުކޮށްދޭ އިންސާފުވެރި ހައްލެއް ހޯދައިގެން ކަމަށް އެ ގައުމުން ދެކޭ. އެހެންކަމުން، ކުރިމަގުގައި ވެވޭ ކޮންމެ އެއްބަސްވުމެއްގައި ވެސް ދެ ދައުލަތުގެ ހައްލު ތަންފީޒުކުރެވޭނެކަމުގެ އިތުބާރު އޮންނަންވާނެ ކަމަށް ސައުދީން ބުނޭ.
2009 ވަނަ އަހަރުގެ ޖެނުއަރީ މަހުގެ 16 ވަނަ ދުވަހު ގަތަރުގެ ވެރިރަށް ދޯހާގައި ބޭއްވި ގާޒާގެ ކްރައިސިސް ސަމިޓުގައި، ސައުދީ އަރަބިއްޔާގެ މަންދޫބު ބައިވެރިވެވަޑައިނުގަންނަވާތީ އޭނާއަށް ހާއްސަކޮށްފައިވާ ހުސް ގޮނޑި ފެންނަ ފޮޓޯއެއް. ފަލަސްތީނުގެ ލީޑަޝިޕާއި، ސަރަހައްދީ ގޮތުން ނުފޫޒުގަދަ މިސްރާއި ސައުދީ އަރަބިއްޔާއިން މި ބައްދަލުވުމުގައި ބައިވެރިނުވި ނަމަވެސް، އިޒްރޭލުން ޣައްޒާ އަށް ދެމުންދާ ނުރައްކާތެރި ހަމަލާތަކާ ގުޅޭގޮތުން މަޝްވަރާކުރުމަށް ބޭއްވި މި ސަމިޓް ގަތަރުން ވަނީ ކުރިއަށް ގެންގޮސްފައި. | ގެޓީ އިމޭޖަސް
ފަލަސްތީނުގެ މިނިވަން ދައުލަތެއް ގާއިމުނުކޮށް، ސައުދީ އަރަބިއްޔާއިން އިޒްރޭލާއެކު ގުޅުން ބަދަހި ނުކުރާނެކަން އެ ގައުމުގެ މަސްދަރަކާ ހަވާލާދީ ސީ.އެން.އެން އިން ކަށަވަރުކޮށްދީފިއެވެ.
އެ މަސްދަރުން ބުނި ގޮތުގައި، ފަލަސްތީނުގެ މިނިވަން ދައުލަތެއް އުފެއްދުމަށް ސާފު އަދި ސީދާ މަގަކުން ކަންކަން ފަހިވެގެން މެނުވީ، އިޒްރޭލާއެކު އެއްވެސް ސިފައެއްގައި ގުޅުން ގާއިމެއް ނުކުރެވޭނެއެވެ.
މީގެ އިތުރުން، ކުރިމަގުގައި ވެވޭ ކޮންމެ އެއްބަސްވުމެއްގައި ވެސް، ދެ ދައުލަތުގެ ހައްލު ތަންފީޒުކުރެވޭނެކަމުގެ އިތުބާރު ހުރި ޔަގީންކަން އޮންނަންވާނެ ކަމަށް އެ މަސްދަރުން ފާހަގަކުރިއެވެ.
ފަލަސްތީނުގެ މައްސަލައިގައި ސައުދީ އަރަބިއްޔާއިން ގެންގުޅޭ ސިޔާސަތަށް އެއްވެސް ބަދަލެއް ނާންނަކަން އެ ގައުމުން ވަނީ ތަކުރާރުކޮށް ބުނެފަ އެވެ.
މިކަމާ ގުޅޭގޮތުން އެ މަސްދަރުން އިތުރަށް ބުނީ، މެދުއިރުމަތީގެ ސަރަހައްދީ ސުލްހައާއި ހަމަޖެހުން ގާއިމުކުރެވޭނީ ފަލަސްތީނުގެ މައްސަލައަށް އިންސާފުވެރި އަދި ފުރިހަމަ ހައްލެއް ހޯދައިގެން ކަމަށް ރިޔާޟުން ގަބޫލުކުރާ ކަމަށެވެ. އަދި އެ ހައްލަކީ ފަލަސްތީނުގެ ރައްޔިތުންގެ ގާނޫނީ ހައްގުތައް ކަށަވަރުކޮށްދޭ ހައްލަކަށް ވާންޖެހޭނެ ކަމަށް ވެސް ބުނެފައިވެއެވެ.
ސައުދީ އަރަބިއްޔާއިން ތަކުރާރުކޮށް ބުނަމުންދަނީ، ދާއިމީ އަދި އިންސާފުވެރި ސުލްހައެއް ގާއިމުކުރެވޭނީ ބައިނަލްއަގުވާމީ ގާނޫނުތަކާއި ކަމާގުޅޭ ގަރާރުތަކުގެ މައްޗަށް ބިނާވެފައިވާ ފަލަސްތީނުގެ މިނިވަން ދައުލަތެއް އުފެދިގެން ކަމަށެވެ.
