މި ސަރުކާރުގައި ކުޑަހުވަދޫގެ މަގު ހެދުމުގެ މަޝްރޫއުގެ ތެރެއިން އެންމެ މަގެއް ވެސް ޒަމާނީ ފެންވަރަށް ތަރައްގީ ކުރެވިފައިނުވޭ

ރައީސް ޑރ. މުހައްމަދު މުއިއްޒުގެ މިސަރުކާރުގައި ދ. ކުޑަހުވަދޫގެ މަގު ހެދުމުގެ މަޝްރޫއުގެ ތެރެއިން އެންމެ މަގެއް ވެސް ޒަމާނީ ފެންވަރަށް ތަރައްގީ ކުރެވިފައިނުވާކަން ހާމަވެއްޖެ އެވެ. 

ރާއްޖެޓީވީގެ ވައުދުނާމާ ޕްރޮގްރާމެއްގައި އެމްޑީޕީގެ ގައުމީ މަޖިލީހުގެ ކުޑަހުވަދޫ ދާއިރާގެ ރައީސް ޝާތިރު އަބްދުއްރަހްމާން ވަނީ އެ ދާއިރާގެ ރަށްތަކުގެ ތަރައްގީ ހުއްޓިފައިވާތީ އެކަމުގެ ކަންބޮޑުވުންފާޅު ކުރައްވާފަ އެވެ. 

ކުޑަހުވަދޫ އަށް އިޝާރާތް ކުރައްވައި ޝާތިރު ވިދާޅުވީ މަގުތައް ޒަމާނީ ފެންވަރަށް ތަރައްގީ ކުރުމުގެ މަޝްރޫއުގެ ދެ ވަނަ ފޭސްގެ އަމަލީ މަސައްކަތް އޭޕްރީލް މަހުގެ 4 ވަނަ ދުވަހު ބޭއްވި ލޯކަލް ކައުންސިލް އިންތިޚާބާއި، އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިޚާބުގެ އިތުރުން ރިފެރެންޑަމް އިންތިޚާބާކޮށް ފެށި ކަމަށެވެ.

ނަމަވެސް އިންތިޚާބަށްފަހު އަމަލީ މަސައްކަތް ހުއްޓިފައިވާ ކަމަށް އޭނާ ވިދާޅުވި އެވެ. އަދި ވިދާޅުވީ ކުޑަހުވަދޫގެ މަގުތަކުގައި ތާރު އެޅުމަށްޓަކައި ގެނެސްފައިވަނީ މާމިގިލިން ކަމަށާއި، އެއީ އެރަށުގެ މަގުތަކުގައި އަޅަން ގެނެސްފައި ހުރި ތާރު ކަމަށް މައުލޫމާތު ލިބޭ ކަމަށެވެ. 

ކުޑަހުވަދޫގެ މަގު ޕްރޮޖެކްޓަކީ ވަރަށް ބާރު ސްޕީޑްގައި ގެންގޮސް ނިންމާލާނެ ކަމަށް ވަދުވެ ކުޑަހުވަދޫގައި ދެ ވަނަ ފޭސްގެ މަސައްކަތުގައި ސޮއިކުރެއްވި މުއިއްޒު. މިދަންނަވާ 2024 ވަނަ އަހަރުގެ ފެބްރުއަރީ މަހުގެ 27 ވަނަ ދުވަހު. އެ ޕްރޮޖެކްޓްގައި ވެސް އަދި މިއަދާ ހަމައަށް މިއުޅެނީ އެންމެ މަގެއްގައި ވެސް ތާރު ނޭޅިގެން ތިން އަހަރަށް މިދަނީ. ތިން އަހަރުވާން މިދަނީ މުއިއްޒު އެމަސައްކަތް އެއީ އެމްޑީޕީ ސަރުކާރުގައި ކޮށްކޮށް ހުރި މަސައްކަތެއް. އަލުން ފެށި މަސައްކަތެއް ނޫން. ކުރަމުން ކުރަމުން ދިޔަ މަސައްކަތެއް އެމްޑީޕީ ސަރުކާރު ނިމުނު އިރުގައި 9 މަގުގައި ޕޭމަންޓު ހަދާ ނިންމާ ހޮޅިތައް އަޅާ ނިންމާފައި އޮންނާނީ. މިސަރުކާރަށް 3 އަހަރު ވީއިރު އަދި އެ މަގުތަކުގައި އަދި ތާރު ނޭޅޭ. އިތުރު މަގެއްގައި މަސައްކަތް ކުރުމުގެ ބަދަލުގައި އޭރުގައި އެމްޑީޕީ ސަރުކާރުގައި މަސައްކަތް ކޮށްފައި އޮތްތަނެއްގައި ވެސް ތާރު ނޭޅޭ.

އެމްޑީޕީގެ ގައުމީ މަޖިލީހުގެ ކުޑަހުވަދޫ ދާއިރާގެ ރައީސް ޝާތިރު އަބްދުއްރަހްމާން 

ކުޑަހުވަދޫ މަގުހެދުމުގެ މަޝްރޫއުގެ މަސައްކަތަށް އާރްޑީސީއާއެކު ސަރުކާރުން އެއްބަސްވުމުގައި ސޮއިކޮށްފައިވަނީ 2021 ވަނަ އަހަރުގެ ސެޕްޓެމްބަރު މަހު ފަހުކޮޅެވެ. މި އެއްބަސްވުމުގެ ދަށުން ކުޑަހުވަދޫގެ 5.85 މަގުގައި ތާރުއެޅުމާއެކު މަގުތަކުގައި ފެންހިންދާ ނިޒާމު ގާއިމްކޮށް، މަގު ބައްތި ހަރުކުރުމަށް ނިންމާފައިވެ އެވެ. 

ފޭސް ތަކަކަށް ބަހާލައިގެން ކުރިއަށް ގެންދާ މިމަޝްރޫއު އާރްޑީސީއާ ހަވާލު ކޮށްފައިވަނީ 450 ދުވަސްތެރޭ ނިންމާ ގޮތަށެވެ. އަދި މިމަޝްރޫއަށް 122 މިލިއަން ރުފިޔާ ހޭދަވާނެ ކަަމަށް ސަރުކާރުން ބުނެ އެވެ.