އިހަވަންދޫގައި ވެސް އިންތިޚާބާ ގުޅިގެން ގިނަ ބަޔަކަށް ވަޒީފާ ދިން، ފެނަކައިގައި އެކަނި ވެސް ގާތްގަނޑަކަށް 160 މުވައްޒަފުން ތިބޭނެ: އިންތިޚާބީ ރައީސް އަލީ ފަވާޒު
ފަވާޒު ވިދާޅުވީ އޭޕްރީލް މަހުގެ 4 ވަނަ ދުވަހު ބޭއްވި އިންތިޚާބުތަކަށް ނުފޫޒު ފޯރުވުމަށް ސަރުކާރުން ދައުލަތުގެ ކުންފުނިތަކުން ގިނަ އަދަދެއްގެ ވަޒީފާ ދީފައިވާ ކަމަށް. ނަމަވެސް، ސަރުކާރުގެ މި ނުފޫޒުތަކާއެކު ވެސް އިހަވަންދޫގެ ރައްޔިތުން ވަނީ ސަރުކާރަށް ނޫނެކޭ ބުނެ، އިންތިޚާބުތަކުގެ މެޖޯރިޓީ އެމްޑީޕީއަށް ދީފައި. މި ނަތީޖާއަކީ ރަށުގެ ތަރައްގީ ހުއްޓުވައި ރައްޔިތުންނަށް ދަތިކުރުމުގެ ނަތީޖާ ކަމަށް ވެސް ފަވާޒު ވިދާޅުވި.
ރާއްޖެޓީވީގެ ފަށާއިރު ޕްރޮގްރާމްގައި ހއ. އިހަވަންދޫ ކައުންސިލްގެ އިންތިޚާބީ ރައީސް އަލީ ފަވާޒު ވާހަކަ ދައްކަވަނީ. | ރާއްޖެއެމްވީ
އޭޕްރީލް މަހުގެ 4 ވަނަ ދުވަހު ބޭއްވި ތިން އިންތިޚާބާ ގުޅިގެން ހއ. އިހަވަންދޫގައި ވެސް ގިނަ ބަޔަކަށް ވަޒީފާ ދީފައިވާ ކަމަށާއި، މިހާރު ގާތްގަނޑަކަށް ފެނަކައިގައި 160 މުވައްޒަފުން އެބަތިބި ކަމަށް އެރަށު ކައުންސިލްގެ އިންތިޚާބީ ރައީސް އަލީ ފަވާޒު ވިދާޅުވެއްޖެ އެވެ.
ރާއްޖެޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން ފަވާޒު ވިދާޅުވީ މިމަހުގެ 4 ވަނަ ދުވަހު ކުރިއަށް ގެންދިޔަ ލޯކަލް ކައުންސިލް އިންތިޚާބާއި، އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިޚާބުގެ އިތުރުން ރިފެރެންޑަމް އިންތިޚާބަށް ސަރުކާރުން ވަރަށް ބޮޑަށް ނުފޫޒު ފޯރުވާފައިވާ ކަމަށާއި، ތިން އިންތިޚާބު ކާމިޔާބު ކުރުމަށް މުޅި ދައުލަތް ބޭނުންކުރި ކަމަށެވެ.
އެގޮތުން ފެނަކަ، އާރްޑީސީ އަދި ވެމްކޯ އަށް ގިނަ އަދަދެއްގެ މުވައްޒަފުން ނެގި ކަމަށް އޭނާ ވިދާޅުވި އެވެ. އަދި ވިދާޅުވީ މިހާރު ފެނަކައިގައި އެކަނި ވެސް ގާތްގަނޑަކަށް 160 މުވައްޒަފުން އެބަތިބި ކަމަށެވެ.
ފުރަތަމަ 14 ވަޒީފާއެއް ފެނަކައަށް. އެއަށްފަހު އިތުރުވަމުން އިތުރުވަމުން ގޮސްފައި ފެނަކައަށް ގާތްގަނޑަކަށް އަޅުގަނޑަށް ގަބޫލުކުރެވޭ ގޮތުން 50 މީހުން ފެނަކައަށް އެކަނި އިންތިޚާބާ ގުޅިގެން ވެއްދި. އާރްޑީސީއަށް ވެސް ގާތްގަނޑަކަށް 15 ވަރަކަށް މުވައްޒަފުން ވެއްދި. އަދި ވެމްކޯއަށް ވެސް މީހުން ނެގި. މިއީ ހަމަ ނުފޫޒު. މިހުރިހާ ނުފޫޒެއް އޮތް މި އިންތިޚާބުގައި ވެސް. އަދި އޭގެ އިތުރަށް ރިޝްވަތުގެ ފައިސާ ވެސް ބެހި. ދެން ހަމަ އާސަންދަ އާއި ދެން ހަމަ ދައުލަތުން ކުރެވެން އޮތް ހުރިހާ ކަމެއް ކުރި. އެހެންނަމަވެސް ރައްޔިތުން މިއޮތީ ނޫނެކޭ ބުނެފައި.
ރައީސް ޑރ. މުހައްމަދު މުއިއްޒުގެ ސަރުކާރަށް އިހަވަންދޫގެ ގިނަ ރައްޔިތުން ނުރުހޭކަން ފާހަގަކުރައްވައި ފަވާޒު ވިދާޅުވީ، ރަށުގެ ކައުންސިލާއި، އަންހެނުންގެ ތަރައްގީއަށް މަސައްކަތްކުރާ ކޮމެޓީން އެންމެ ގޮނޑިއެއް ވެސް ސަރުކާރަށް ނުލިބޭ ކަމަށާއި، މެޖޯރިޓީ ލިބުނީ އެމްޑީޕީއަށް ކަމަށެވެ. އަދި ރިފެރެންޑަމް އަށް އެރަށުގެ 75 އިންސައްތަ ރައްޔިތުން ނޫނެކޭ ބުނެފައިވާ ކަމަށް އޭނާ ވިދާޅުވި އެވެ.
ފަވާޒު ވިދާޅުވީ މިއީ އެރަށުގެ ތަރައްގީ ހުއްޓުވައި، ރައްޔިތުންނަށް ދަތިކުރުމުގެ ނަތީޖާ ކަމަށެވެ.
