އިންތިހާބާ ދިމާކޮށް އިމެއްނެތި ވަޒިފާތަކާ ޕްރޮމޯޝަން ދިނުމަށް ފަހު، ސަރުކާރު ކުންފުނިތަކަށް މީހުން ނެގުމާ ޕްރޮމޯޝަން ދިނުން ހުއްޓާލަން އަންގައިފި
ސަރުކާރު ކުންފުނިތަކުގެ މުވައްޒަފުންނަށް މަގާމުގެ ކުރިއެރުން ދިނުން ހުއްޓާލުމަށާއި، އޮޕަރޭޝަންތަކަށް ކޮންމެހެން ބޭނުންވާ މަގާމުތަކަށް ފިޔަވައި އާ މީހުން ނުނެގުމަށް ޕީސީބީން ވަނީ އަންގާފަ. މީގެ އިތުރުން އިތުރުގަޑީގެ މަސައްކަތްތައް މަދުކުރުމަށާއި، ރާއްޖެއިން ބޭރަށް ކުރާ ރަސްމީ ދަތުރުތަކާއި ތަމްރީނުތައް ހުއްޓާލައި ހަރަދު ކުޑަކުރުމަށް ވެސް ކުންފުނިތަކަށް ވަނީ އިރުޝާދު ދީފަ. މި ފިޔަވަޅުތަކަކީ މެދުއިރުމަތީގެ ހަމަނުޖެހުންތަކާ ގުޅިގެން އިގްތިސާދަށް ކުރާނެ އަސަރުތަކަށް ބަލައި، ކުންފުނިތަކުގެ ކޭޝްފްލޯ މެނޭޖުކުރުމަށް އެޅި ފިޔަވަޅުތަކެއް.
ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) | ރާއްޖެ އެމްވީ
މެދުއިރުމަތީގެ ހަމަނުޖެހުންތަކާ ގުޅިގެން އިގްތިސާދީ ގޮތުން ހަރަދު ކުޑަކުރުމުގެ ގޮތުން ސަރުކާރު ކުންފުނިތަކުގެ މުވައްޒަފުންގެ މުސާރަ އާއި އިނާޔަތްތަކަށް ކުރާ ހަރަދު ބޮޑުތަނުން ކުޑަކޮށް، މުވައްޒަފުންނަށް މަގާމުގެ ކުރިއެރުން ދިނުން ހުއްޓާލަން ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން އަންގައިފި އެވެ.
ޕީސީބީ އިން ބުދަ ދުވަހު ސަރުކާރުގެ ކުންފުނިތަކަށް ފޮނުވި ސިޓީގައި ބުނެފަ އިވަނީ މުވައްޒަފުންގެ މުސާރަ އާއި އިނާޔަތްތަކަށް ކުރާ ހަރަދު ބޮޑުތަނުން ކުޑަކުރަން އަޅަންޖެހޭ އެންމެހައި ފިޔަވަޅުތައް އެޅުމަށެވެ. އަދި ކުންފުނިތަކުގެ މުވައްޒަފުންނަށް މަގާމުގެ ކުރިއެރުން ދިނުން ހުއްޓާލުމާއި އެ ކުންފުންޏަކުން މިހާރު ފާސްކޮށްފައިވާ އިދާރީ އޮނިގަނޑުގައި ހިމެނޭ މަގާމުތައް ކަމަށް ވިޔަސް އޮޕަރޭޝަންތައް ނުހުއްޓި ކުރިއަށް ގެންދަން ކޮންމެހެން މުހިންމު ނޫން މަގާމުތަކަށް މީހުން ނުނެގުމަށް ވެސް އެ ސިޓީގައި ވަނީ ބުނެފަ އެވެ.
މި ފިޔަވަޅުތައް އަޅަން އަންގާފައިވަނީ އޭޕްރީލް 4 ވަނަ ދުވަހު ބޭއްވި ލޯކަލް ކައުންސިލްތަކުގެ އިންތިހާބާ ދިމާކޮށް ސަރުކާރު ހިއްސާވާ އެކި ކުންފުނިތަކުން ގިނަ އަދަދަކަށް އާ ވަޒީފާ އުފައްދައި މުވައްޒަފުން ނަގައިފައި ވަނިކޮށެވެ. އޭގެ ތެރޭގައި އެމްޓީސީސީ އާއި އާރުޑީސީ އަދި ވެމްކޯ ހިމެނެ އެވެ.
ޕީސީބީ އިން އަންގާފައިވާ އިތުރު ފިޔަވަޅުތަކުގެ ތެރޭގައި ރަސްމީ ގަޑީގައި މަސައްކަތްތައް ނިންމޭ ގޮތަށް ކަންކަން ރޭވުމާއި ރަސްމީ ގަޑީގެ ބޭރުން ކޮންމެހެން ކުރަން ޖެހޭ މަސައްކަތްތަކަށް ނޫނީ އިތުރު ގަޑީގެ މަސައްކަތް ނުކުރުން ހިމެނެ އެވެ. އަދި ކޭޝްފްލޯ މެނޭޖުކުރުމަށްޓަކައި މުވައްޒަފުންގެ މުސާރައިގެ ހަރަދުތައް މެނޭޖުކުރަން އަޅަންޖެހޭ އެންމެހައި ފިޔަވަޅުތައް އެޅުމަށް ވެސް އެ ސިޓީގައި ވަނީ ބުނެފަ އެވެ.
ކުންފުނީގެ ހިންގާ ގަވާއިދާއި އަސާސީ ގަވާއިދުގައި ބުނާ މަސްއޫލިއްޔަތުތައް އަދާކުރުމަށްޓަކައި ކޮންމެހެން ކުރަންޖެހޭ ހަރަދުތައް ފިޔަވައި އެހެނިހެން ހަރަދުތައް ނުކުރާކަން ޔަގީން ކުރުމުގެ ފިޔަވަޅުތައް އެޅުމަށް ވެސް ޕީސީބީއިން އަންގައިފި އެވެ. އަދި މެދުއިރުމަތީގެ ހަމަނުޖެހުންތަކާ ގުޅިގެން އިގްތިސާދަށް ކުރާނެ އަސަރުތައް ދިރާސާކޮށް ފިޔަވަޅު އެޅުމާއި މިފަދަ ފިޔަވަޅުތައް އެޅުމުގައި ރައްޔިތުންނަށް ކޮށްފާނެ މާލީ ބުރަތަކަށް ސަމާލުކަން ދިނުމަށް ވެސް ވަނީ ބުނެފަ އެވެ.
ކޮންމެހެން ބާއްވަންޖެހޭ ހަފްލާތައް މެނުވީ ނުބޭއްވުމާއި ހަފްލާތައް ބޭއްވުމުގައި ވަސީލަތްތައް ހުރި ކުންފުނިތަކުން އެހެން ކުންފުނިތަކަށް އެތަކެތި ހިއްސާކުރުމާއި ހަފްލާތަކަށް ކުރާ ހަރަދު ވީހާ ވެސް ކުޑަކުރުމަށް ވެސް ޕީސީބީ އިން ވަނީ އަންގައިފަ އެވެ.
މިދިޔަ ހަފްތާގެ ހޯމަ ދުވަހު ވެސް ޕީސީބީ އިން ވަނީ ސަރުކާރުގެ ކުންފުނިތަކަށް ހަރަދު ކުޑަކުރުމުގެ ފިޔަވަޅުތަކެއް އަޅަން އަންގައިފަ އެވެ. ނަމަވެސް އެ ފިޔަވަޅުތަކުގެ ތެރޭގައި މުވައްޒަފުންގެ މުސާރަ އާއި އިނާޔަތްތަކަށް ކުރާ ހަރަދު ކުޑަކުރުމާއި ޕްރޮމޯޝަން ދިނުން ހުއްޓާލުން ނުހިމެނެ އެވެ.
ހޯމަ ދުވަހު އަންގާފައިވާ ފިޔަވަޅުތަކުގެ ތެރޭގައި ކޮންމެހެން ކުރަންޖެހޭ ރަސްމީ ދަތުރުތައް ފިޔަވައި އެހެން ދަތުރުތައް ހުއްޓާލުމާއި ރާއްޖެއިން ބޭރަށް ކުރާ ދަތުރުތައް މަދުކޮށް ބޭރުގެ ކަސްޓަމަރުންނާއި ސަޕްލަޔަރުންނާ އޮންލައިންކޮށް ބައްދަލުކުރުން ހިމެނެ އެވެ. އަދި ރާއްޖެއިން ބޭރަށް ކޮންމެހެން ކުރާ ރަސްމީ ދަތުރުތަކުގައި ވެސް ބިޒްނަސް ކުލާހުން ދަތުރު ނުކުރުމާއި ރާއްޖެއިން ބޭރަށް ކުރާ ޓްރެއިނިން ދަތުރުތައް މިވަގުތަށް ހުއްޓާލައި އެފަދަ ޕްރޮގްރާމްތަކުގައި އޮންލައިންކޮށް ބައިވެރިވުމަށް ވެސް ވަނީ އަންގައިފަ އެވެ.
