އީދު ފާހަގަކުރުމުގެ ނަމުގައި ދެޖިންސު މަސްހުނިވެގެން ކުޅިވަރު ކުޅުންފަދަ ހަރަކާތްތަކުން ދުރުހެލިވުމަށް ޚުތުބާގައި ގޮވާލައިފި

އަޟްހާ އީދު ފާހަގަކުރުމުގެ ނަމުގައި ފުރައްސާރަ ކުރުމާއި، ދެޖިންސު މަސްހުނިވެގެން ކުޅިވަރު ކުޅުންފަދަ ހަރަކާތްތަކުން ދުރުހެލިވުމަށް އީދު ޚުތުބާގައި ގޮވާލައިފި އެވެ. 

''އީދުގެ އަދަބުތައް'' މިމައުޟޫއަށް މުޅި ރާއްޖެއަށް އިއްވި ޚުތުބާ ވަނީ މާތް ﷲ ދެއްވި ނިއުމަތްތަކަށް ޝުކުރުވެރިވެ ހައްޖުމަސް ފެށުމާއެކު އެމަހުގެ 13 ވަނަދުވަހުގެ ނިޔަލަށް ގޭގޭގައްޔާއި މަގުތަކާއި ބާޒާރުތަކުގައި އަޑުހަރުކޮށް ތަކުބީރުކިޔުން ސުންނަތްވެގެންވާ ކަން ފާހަގަކޮށް ތަކުބީރު ގިނަގިނައިން ކިޔުމަށް ނަސޭހަތްތެރިވެފަ އެވެ. 

އަޟުހާ އީދުގައި ކަތިލެވޭ އުޟްޙިޔާއިން މާތް ﷲގެ ޚަލީލު އިބްރާހީމު އަލައިހިއްސަލާމާއި އެކަލޭގެފާނުގެ ދަރިކަލުން އިސްމާޢީލު ޢަލައިހިއްސަލާމު ވެވަޑައިގަތް ގުރުބާނީގެ މަތީން ހަނދާންއާ ކޮށްފައިވެ އެވެ. 

މީގެ އިތުރުން ޚުތުބާ ގައި ބުނީ އީދު ދުވަހަކީ މުޅި އަހަރުގައި ވެސް އަންނާނެ އެންމެ މާތް ދުވަސް ކަމަށް ބައެއް އިލްމުވެރީން ދެކެވަޑައިގަންނަވާ ކަމަށެވެ. 

ނަމަވެސް އީދު ފާހަގަކުރުމުގެ ނަމުގައި މީހުންނަށް ފުރައްސާރަ ކުރުމާއި މަލާމާތްކުރުމާއި އަންހެނުން ފިރިހެން ހެދުން އެޅުމާއި ފިރިހެނުން އަންހެން ހެނދުން އެޅުމާއި ދެޖިންސު މަސްހުނިވެގެން ކުޅިވަރު ކުޅުންފަދަ ހަރަކާތްތައް ފެންނާތީ، މިކަންކަމުން ދުރުހެލިވުމަށް ޚުތުބާގައި ވަނީ ގޮވާލާފަ އެވެ. އަދި އީދުގެ އެންމެހައި ހަރަކާތްތައް އިންތިޒާމުކުރާ ފަރާތްތަކުން މާތް ﷲއަށް ބިރުވެތިވެ، އިސްލާމްދީނާ ފުށުއަރާ ކަންތައްތަކާއި އެހެން ދީންތަކުގެ ޝިއާރުތަކާ އެއްގޮތްވާ ކަންކަމުން ދުރުހެލިވުމަކީ ވާޖިބެއްކަން ހަނދާން ކޮށްދީފައިވެ އެވެ.

ޚުތުބާގައި ބުނީ، އީދުގެ އުފާ ފައުޅުކުރާ އިރު، އިސްލާމީ ޘަޤާފަތާ ޚިލާފު، އިސްލާމީ ޝަރުއީ މިންގަނޑަށް ނުފެތޭ އެންމެހައި ކަންކަމުން ދުރުހެލިވާން ޖެހޭ ކަމަށެވެ. 

މާތް ނަބިއްޔާ مُحَمَّدُ صَلَّى اللهُ عَلَيْهِ وَسَلَّمَ ޙަދީޘްކުރައްވައިފައި ވެ އެވެ. (إِنَّ أَعْظَمَ الْأَيَّامِ عِنْدَ اللهِ -تَبَارَكَ وَتَعَالَى- يَوْمُ النَّحْرِ، ثُـمَّ يَوْمُ الْقَرِّ) މާނައީ: "ހަމަކަށަވަރުން މާތް ﷲގެ ހަޟުރަތުގައި އެންމެ މަތިވެރިވެގެންވާ ދުވަހަކީ ޢީދު ދުވަހެވެ. ދެން އެޔާ ޖެހުނު ދުވަހެވެ." މި ދުވަހުގެ މާތްކަމާއި މަތިވެރިކަމާ އެކު ވެސް ޢީދުގެ ދުވަސްތަކަކީ، މުސްލިމުން ކައިބޮއި އުފާފާޅުކޮށް ކުޅިވަރު ކުޅޭން އޮތް ދުވަސްތަކެކެވެ.

އީދު ޚުތުބާ 

މީގެ އިތުރުން ޚުތުބާގައި ވަނީ އީދަކީ މުޅި އިސްލާމީ އުންމަތް އެ ކަމުގެ އުފަލުގައި ބައިވެރިވެ އުފާ ފާޅުކުރާންޖެހޭ ދުވަސްތަކެއްކަން ފާހަގަކޮށްފަ އެވެ. ރާއްޖޭގެ އެކިއެކި ސިނާއަތްތަކުގައި މަސައްކަތްކުރަމުންދާ ބިދޭސީ މުސްލިމު އަޚުންނާއި އުޚުތުންނަށް އީދުގެ ތަހުނިޔާކިޔައި، އީދުގެ އުފަލުގައި އެ އަޚުންނާއި އުޚުތުން ވެސް ބައިވެރިކުރުމަށް ޚުތުބާގައި ގޮވާލާފައިވެ އެވެ. އަދި އަމާން ވެއްޓެއްގައި މި ދުވަސް ފާހަގަކުރާ އިރު، އިސްލާމީ އުންމަތުގެ ބަޔަކު ނުހަނު ނިކަމެތިހާލުގައި ތިބިކަން ވެސް ހަނދާން ކުރަން ޖެހޭ ކަމަށާއި، ނަސްލު ނައްތައިލުމުގެ ބިރުވެރި ގަތުލުއާންމުތަކާއި ހައިހޫނުކަމާއި ހިޔާވަހިކަމެއް ނެތި އެތައް ހާސް މުސްލިމުންނެއް ދުނިޔޭގެ އެކި ކަންކޮޅުތަކުގައި ތިބިކަން ހަނދާންކޮށް، މި މާތް މަތިވެރި ދުވަހުގެ އުފާ ފާޅުކުރާ އިރު އެ އަޚުންނާއި އުޚުތުންނަށް ހެޔޮ ދުއާކޮށް ނަސްރާއި ކާމިޔާބުދެއްވާތޯ ދުއާކުރުމަށް ގޮވާލާފައިވެ އެވެ.