ރައީސް މުއިއްޒު އަކީ ގިނިކަންޏާ ވެރިކަން ކުރައްވަން ބޭނުންފުޅުވާ ބޭފުޅެއް، ދިމާވެގެން އުޅޭ މައްސަލަ އަކީ އެއީ: މައުރޫފް
ރައީސް ޑރ. މުއިއްޒު ވެރިކަން ކުރައްވަނީ އެހެން ފަރާތްތަކުގެ ބަސް ނާހައި ޚުދުމުހުތާރުކޮށް ކަމަށް ކެންދޫ ދާއިރާގެ މެމްބަރު މައުރޫފް ޒާކިރު ތުހުމަތު ކުރައްވައިފި. މައުރޫފް ވިދާޅުވީ މި ސަރުކާރުން މިނިވަން މުއައްސަސާތަކުގެ ބާރުތައް ހިފަހައްޓައި، ޚިޔާލުފާޅުކުރުމުގެ މިނިވަންކަން ހަނިކުރުމަށް މަސައްކަތް ކުރަމުންދާ ކަމަށް. އެހެންކަމުން، ސަރުކާރު ޖަވާބުދާރީ ކުރުވުމަށްޓަކައި އިދިކޮޅު އެމްޑީޕީން މަޖިލީހުގެ ތެރެއިންނާއި ބޭރުން ގިނަ މަސައްކަތްތަކެއް ކުރަމުންދާކަން އޭނާ ފާހަގަކުރެއްވި.
ކެންދޫ ދާއިރާގެ މަޖިލިސް މެމްބަރު މައުރޫފް ޒާކިރް | ރާއްޖެއެމްވީ
ރައީސް ޑރ. މުހައްމަދު މުއިއްޒު އަކީ ގިނިކަންޏާ ވެރިކަން ކުރައްވަން ބޭނުންފުޅުވާ ބޭފުޅެއްކަމަށާއި، ދިމާވެގެން އުޅޭ މައްސަލަ އަކީ އެއީ ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މައުރޫފް ޒާކިރު ވިދާޅުވެއްޖެ އެވެ.
މައުރޫފް އެފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.
އޭނާ ވިދާޅުވީ ރައީސް މުއިއްޒު އަކީ އެއްވެސް ވަރަކަށް އެހެން ބޭފުޅުން ދައްކަވާ ވާހަކަ އަޑު އައްސަވަން ބޭނުންފުޅުވާ ބޭފުޅެއް ނޫން ކަމަށެވެ. އަދި އެހެނިހެން އިދާރާތަކާއި މިނިވަން މުއައްސަސާތަކަކަކީ އެ ތަންތަނަށް ލިބިގެންވާ ވަކި ބާރުތަކެއް ހުރި ތަންތަން ކަން ޤަބޫލުކޮށް ބާރުތައް ދޫކޮށްލުމަކީ ރައީސް މުއިއްޒު އަށް ކުރެވޭ ކަަމަކަށް ނުވާ ކަމަށް މައުރޫފް ވިދާޅުވި އެވެ. ވުޒާރާތައް ވެސް ހިންގަވަމުން ގެންދަވަނީ ޚުދުމުހުތާރުކަމާއި އެކު އެވަގުތަކު ރައީސް ބޭނުންފުޅުވާ ގޮތަކަށް ކަމަށް ވެސް މައުރޫފް ވިދާޅުވި އެވެ.
"ކެބިނެޓަށް ގެންނެވި ބަދަލު. ވަރަށް ބޮޑަށް ރައްޔިތުންގެ ބަސް އަހާ ބަދަލުތަކެއް ގެނައި ކަމަށް ދައްކަން ކުރި ކަމެއް. ކާކު ބުނެގެން ކާކު ބޭނުން ވެގެން ގެނައި ބަދަލެއްތޯ އެއީ؟" މައުރޫފް ވިދާޅުވި އެވެ.
މައުރޫފް އިތުރަށް ވިދާޅުވީ ރައީސް މުއިއްޒު ބޭނުންފުޅު ވަނީ ވާދަވެރިންނާއި، ޚިޔާލުފާޅުކުރުން ވެސް އެއްކޮށް ނައްތާލަން ކަމަށެވެ. ޚިޔާލުފާޅުކުރުމުން އަދަބު ދެވޭ ގޮތަށް ޤާނޫނުތައް ހަދައިގެން އާއްމުން ފިއްތުމަށް މަސައްކަތް ކުރަނީ އެހެންވެގެން ކަމަށް މައުރޫފް ވަނީ ވިދާޅުވެފަ އެވެ.
އިތުރަށް ވާހަކަދައްކަވަމުން މައުރޫފް ވިދާޅުވީ ސަރުކާރުން ކުރަމުންދާ ނެއެއްގާނީ ކަންކަމާއި މެދު ޖަވާބުދާރީކުރުވުމަށް އެމްޑީޕީގެ ޕީޖީ ގްރޫޕުން ގިނަ މަސައްކަތްތައް ކޮށްފައިވާ ކަމަށެވެ. އެގޮތުން ނިމިދިޔަ އަހަރުގެ ތެރޭގައި ބޮޑު އެއްވުމެއް ބޭއްވުމަކީ މި ސަރުކާރު ބަލި ކުރެވިދާނެ ކަމަށް އާއްމުންނަށް ބޮޑު އުންމީދެއް ލިބިގެން ދިޔަ ކަމެއް ކަމަށް މައުރޫފް ވިދާޅުވި އެވެ. މީގެ އިތުރުން ނިމިދިޔަ ކައުންސިލް އިންތިޚާބާއި ދިމާކޮށް ވެސް ސަރުކާރު ޖަވާބުދާރީކުރުވުމަށް މަޖިލީހުގެ ތެރެއިންނާއި މަޖިލީހުގެ ބޭރުން ވެސް ވަރަށް ގިނަ މަސައްކަތްތަކެއް ކުރަމުންދާ ކަމަށް މައުރޫފް ވިދާޅުވި އެވެ.
އަދި ރައްޔިތުން ތިބީ މި ސަރުކާރާއި އެކު ނޫންކަން ވޯޓު ކަރުދާސް ލިބޭ ކޮންމެ ފަހަރަކު އާއްމުން އަންގަމުންދާ ކަމަށް މައުރޫފް ވަނީ ވިދާޅުވެފަ އެވެ.
