އެމެރިކާ މަސައްކަތްކުރަނީ އަލުން ހަނގުރާމަ ފެށުމަށް: އީރާން
20 މެއި 2026 | ބުދަ 16:13އެމެރިކާއިން އީރާނަށް އިގްތިސާދީ އަދި ސިޔާސީ ފިއްތުންތައް ކުރިމަތިކުރަނީ އަސްކަރީ މަގްސަދުތަކެއް ހާސިލުކޮށް، އާ ހަނގުރާމައެއް ފެށުމަށް ކަމަށް އީރާނުގެ އިސް އޮފިޝަލް މުޙައްމަދު ބާގިރު ގާލީބާފް ވިދާޅުވެއްޖެ. އެމެރިކާއާއި އިޒްރޭލުން ހަމަލާދީފިނަމަ މުޅި ސަރަހައްދަށް ހަނގުރާމަ ފެތުރިދާނެ ކަމުގެ އިންޒާރު އީރާނުގެ ރިވޮލިއުޝަނަރީ ގާޑްސްއިން ދީފައިވާއިރު، ގާލީބާފް ވަނީ އެއްވެސް ބިރުދެއްކުމަކަށް އީރާނުން ދޫނުދޭނެ ކަމަށް ވިދާޅުވެފައި. އަދި ގައުމީ އެއްބައިވަންތަކަން އިސްކޮށް، ކުރިމަތިވެދާނެ ކޮންމެ ހަމަލާއަކަށް ވަރުގަދަ ރައްދެއް ދިނުމަށް ތައްޔާރަށް ތިބުމަށް އޭނާ ގޮވާލެއްވި.
އީރާނުގެ މަޖިލީހުގެ ރައީސް މުޙައްމަދު ބާގިރު ގާލީބާފް. | އޭއެފްޕީ
އެމެރިކާއިން މަސައްކަތް ކުރަމުންދަނީ އަލުން ހަނގުރާމަ ފެށުމަށް ކަމަށާއި، އެމެރިކާގެ އުންމީދަކީ އީރާނުން އަމާންދިނުން ކަމަށް އީރާނުގެ އިސް ނެގޯޝިއޭޓަރު މުޙައްމަދު ބާގިރު ގާލީބާފް ބުދަ ދުވަހު ވިދާޅުވެއްޖެއެވެ.
ގާލީބާފްގެ ރަސްމީ ވެބްސައިޓުގައި އާންމުކުރި އޯޑިއޯ މެސެޖެއްގައި އޭނާ ވިދާޅުވީ، ދުޝްމަނުން ފާޅުގައާއި ސިއްރިއްޔާތުގައި ކުރަމުންދާ ހަރަކާތްތަކުން އެނގެނީ، އިގްތިސާދީ އަދި ސިޔާސީ ފިއްތުންތަކާއެކުވެސް އެމެރިކާއިން އަސްކަރީ މަގްސަދުތައް ދޫކޮށްނުލާ ކަމާއި، އާ ހަނގުރާމައެއް ފެށުމަށް އެ ގައުމުން މަސައްކަތް ކުރަމުންދާ ކަމެވެ.
ގާލީބާފް މިހެން ވިދާޅުވެފައި މިވަނީ، ފެބްރުއަރީ މަހުގެ 28 ވަނަ ދުވަހު ފެށުނު ހަނގުރާމަ ހުއްޓާލުމަށް ތެހެރާނާއި ވޮޝިންޓަނުން ހުށަހެޅުންތައް ބަދަލުކުރަމުންދާ ދަނޑިވަޅެއްގައި، ދެ ގައުމުގެ މެދުގައި ބަހުގެ ހަމަލާތަކާއި އިންޒާރުތައް ވަރުގަދަވެފައިވާ ވަގުތެއްގައެވެ. މި ހަނގުރާމައިގައި އޭޕްރިލް މަހުގެ 8 ވަނަ ދުވަހުން ފެށިގެން ވަނީ ހަމަލާބަދަލުކުރުން ހުއްޓާލާފައެވެ.
އީރާނުން ސުލްހައިގެ އެއްބަސްވުމަކަށް ނައިސްފިނަމަ އަލުން ހަމަލާދޭނެ ކަމަށް ރައީސް ޑޮނަލްޑް ޓްރަމްޕް ވިދާޅުވުމާ ގުޅިގެން، އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ބުދަ ދުވަހު ވަނީ، އެމެރިކާއާއި އިޒްރޭލުން އަލުން ހަމަލާދޭން ފަށައިފިނަމަ މި ހަނގުރާމަ މުޅި ސަރަހައްދަށް ފެތުރިގެންދާނެ ކަމުގެ އިންޒާރު ދީފައެވެ.
ގާލީބާފް ވިދާޅުވީ، އޭޕްރިލް 13 އިން ފެށިގެން ކުރިމަތިކޮށްފައިވާ އިގްތިސާދީ ފިއްތުންތަކާއި ކަނޑުގެ މަގުން ދަތިކުރުމުގެ ފިޔަވަޅުތައް ދަމަހައްޓައިގެން، ވޮޝިންޓަނުން ކުރާ "ބޮޑެތި ޑިމާންޑްތަކަށް" އީރާނުން އިޖާބަދީ، އަމާންދޭނެ ކަމަށް އެމެރިކާ އަދިވެސް އުންމީދު ކުރަމުންދާ ކަމަށެވެ.
"ކުރިމަތިވެދާނެ ކޮންމެ ހަމަލާއަކަށް ވަރުގަދަ އަދި ނަތީޖާ ނެރެވޭ ފަދަ ރައްދެއް ދިނުމަށްޓަކައި އަޅުގަނޑުމެންގެ ތައްޔާރީތައް އިތުރަށް ވަރުގަދަ ކުރަންޖެހޭ،" ގާލީބާފް ވިދާޅުވިއެވެ. އަދި އެއްވެސް ހާލަތެއްގައި ބިރުދެއްކުންތަކަށް އީރާނުން ދޫނުދޭނެ ކަމަށްވެސް އޭނާ ވިދާޅުވިއެވެ.
އީރާނުގެ ރައްޔިތުންނަށް ކުރިމަތިވެފައިވާ އިގްތިސާދީ ދަތިތައް ގަބޫލުކުރައްވަމުން، ގާލީބާފް ވަނީ "ގައުމީ އެއްބައިވަންތަކަން" އިސްކުރުމަށް އިލްތިމާސް ކުރައްވާފައެވެ.
އޭނާ އިތުރަށް ވިދާޅުވީ، މިއަދު އަޅުގަނޑުމެން މިތިބީ އަޒުމް ވަޒަންކުރާ ހަނގުރާމައެއްގެ ތެރޭގައިކަން ކުރިއަށްވުރެ ބޮޑަށް ސާފުވެފައިވާ ކަމަށާއި، މި ހަނގުރާމައިން މޮޅުވާ ބަޔަކު އީރާނުގެ ތާރީޚު ލިޔެ، ގައުމުގެ މުސްތަގުބަލު ކަނޑައަޅާނެ ކަމަށެވެ.
