އިޒްރޭލްގެ ހަމަލާ ތަކެއްގައި ހަމާސްގެ އިސް ކޮމާންޑަރު ޝަހީދު ކޮށްލައިފި

އިޒްރޭލް އިން ދިން ވަރުގަދަ ވައިގެ ހަމަލާތަކެއްގައި ހަމާސްގެ އަސްކަރީ ފައުޖު، އިއްޒުއްދީން އަލް ގައްސާމް ބްރިގޭޑްސްގެ ކޮމާންޑަރަކު ޝަހީދު ކޮށްލާފައިވާ ކަމަށް އިއުލާން ކޮށްފި އެވެ. 

ޣައްޒާގެ މިސްކިތް ތަކުން މިކަން އިއުލާން ކޮށްފައި މި ވަނީ، ހަމާސްގެ އިސް ކޮމާންޑަރަކަށް އަމާޒުކޮށް ހަމަލާ ދީފައިވާ ކަމަށް އިޒްރޭލް އިން އިއުލާން ކުރިތާ އެއް ދުވަސް ފަހުންނެވެ. 

ޣައްޒާގެ އުތުރުގައި ހުރި މިސްކިތް ތަކުން ހޮނިހިރު ދުވަހު އިއުލާން ކޮށްފައިވާ ގޮތުގައި، ޝަހީދުވެފައި ވަނީ ހަމާސްގެ އަސްކަރީ ފައުޖުގެ އިސް ކޮމާންޑަރެއް ކަމަށްވާ އިއްޒުއްދީން އަލް ހައްދާދު އެވެ. މަންޒަރު ދުށް މީހުންނާ ހަވާލާދީ ބައިނަލްއަޤުވާމީ މީޑިއާ ތަކުގައި ރިޕޯޓު ކޮށްފައިވާ ގޮތުގައި، ޣައްޒަ ސިޓީގެ އެކި މިސްކިތް ތަކުން ވަނީ އޭނާ ޝަހީދުވެފައިވާކަން އާންމުކޮށް އިއުލާން ކޮށްފަ އެވެ. 

އިޒްރޭލްގެ އަސްކަރިއްޔާ އިން ހުކުރު ދުވަހު ބުނެފައި ވަނީ، ހަމާސްގެ އަސްކަރީ ފައުޖުގެ އިސް ވެރިޔަކަށް އަމާޒުކޮށް ވައިގެ މަގުން ހަމަލާ ދީފައިވާ ކަމަށެވެ. ނަމަވެސް، އެ ހަމަލާ ތަކުގައި އަލް ހައްދާދު ޝަހީދުވިކަން ނުވަތަ ނޫންކަން އިޒްރޭލް އިން މިހާތަނަށް ރަސްމީކޮށް ކަށަވަރު ކޮށްދީފައި ނުވެ އެވެ. 

މި ހާދިސާއާ ގުޅިގެން ހަމާސް ޖަމާއަތުން މިހާތަނަށް އަދި ރަސްމީ އެއްވެސް ބަހެއް ބުނެފައި ނުވެ އެވެ. އެ ޖަމާއަތުގެ އަސްކަރީ ކޮމާންޑަރުގެ މަރާ ގުޅޭ ގޮތުން ނޫސްވެރިން ސުވާލު ކުރުމުން ވެސް، ހަމާސް އިން ވަނީ ވަކި އެއްޗެއް ބުނަން އިންކާރު ކޮށްފަ އެވެ. 

އިއްޒުއްދީން އަލް ހައްދާދު އަކީ ހަމާސްގެ އަސްކަރީ ޙަރަކާތް ތަކުގައި އިސް ދައުރެއް އަދާ ކުރައްވާ ބޭފުޅެކެވެ. އޭނާ ޝަހީދުވި ކަމުގެ ޚަބަރު މިސްކިތް ތަކުން އިއުލާން ކުރި ނަމަވެސް، އެކަމާ ގުޅޭ އިތުރު ތަފްސީލެއް މިހާތަނަށް އެއްވެސް ފަރާތަކުން ހާމަ ކޮށްފައި ނުވެ އެވެ.