އީދަށް ވަރަށް ބޮޑަށް ކަމަދޫ ތައްޔާރުވެފައި، 2000 އަށް ވުރެ ގިނަ މީހުން ރަށަށް ޒިޔާރަތް ކުރާނެ: ކައުންސިލްގެ ރައީސް ޒަރީރު
ކައުންސިލްގެ ރައީސް ޒަރީރު ވިދާޅުވީ މިއަހަރުގެ އަޟްޙާ އީދަށް ކަމަދޫގެ ރައްޔިތުން ގުޅިގެން ފޯރިއާއެކު ތައްޔާރުވަމުންދާ ކަމަށާއި، އީދު ބަންދާ ދިމާކޮށް އެ ރަށަށް 2000 އަށް ވުރެ ގިނަ މީހުން ޒިޔާރަތްކުރާނެ ކަމަށް. ރަށަށް އަންނަ މެހެމާނުންނަށް ފުރިހަމަ މަރުހަބާއެއް ކިޔުމަށް ތައްޔާރުވަމުންދާއިރު، ރަށުތެރެ ސާފުތާހިރުކޮށް ބޭއްވުމަށާއި އިޖުތިމާއީ މައްސަލަތައް މަދުކުރުމަށް ކައުންސިލާއި ރައްޔިތުން ގުޅިގެން ޚާއްޞަ އިންތިޒާމުތަކެއް ވަނީ ހަމަޖައްސާފައި. ދަ ހޯކްސްގެ އެހީތެރިކަމާއެކު ކުލަގަދަ ހަރަކާތްތަކެއް ރާވާފައިވާ މި އީދަކީ މުޅި ރަށް ޝާމިލުވާނެ އުފާވެރި މުނާސަބަތަކަށް ވާނެ ކަމަށް ޒަރީރު ވިދާޅުވި.
ބުދަ ދުވަހުގެ ފަށާއިރު ޕްރޮގްރާމްގައި ބ.ކަމަދޫ ކައުންސިލްގެ ރައީސް ހަސަން ޒަރީރު ވާހަކަ ދައްކަވަނީ. | ރާއްޖެއެމްވީ
ބ. ކަމަދޫ އަޟްޙާ އީދަށް 95 އިންސައްތަ އަށް ތައްޔާރުވެފައިވާ ކަމަށާއި، އީދާ ގުޅިގެން 2000 އަށް ވުރެ ގިނަ މީހުން ރަށަށް ޒިޔާރަތް ކުރާނެ ކަމަށް އެރަށުގެ ކައުންސިލްގެ ރައީސް ހަސަން ޒަރީރު ވިދާޅުވެއްޖެ އެވެ.
ރާއްޖެޓީވީގެ ބުދަ ދުވަހުގެ ފަށާއިރު ޕްރޮގްރާމްގައި ޒަރީރު ވިދާޅުވީ ޒަމާނުއްސުރެ ރަށުގެ ރައްޔިތުންނަކީ ވަރަށް ގުޅިގެން މަސައްކަތް ކުރާ ބައެއް ކަމަށާއި، ޚާއްޞަކޮށް އީދު ފަދަ ހަރަކާތްތައް ހިންގުމުގައި ރައްޔިތުންގެ ގުޅުން ވަރަށް ރަނގަޅުވާނެ ކަމަށެވެ.
މި އަހަރުގެ އަޟްހާ އީދަށް ވަމުންދާ ތައްޔާރީތަކަށް އިޝާރާތް ކުރައްވައި ޒަރީރު ވިދާޅުވީ، ވާންޖެހޭ ތައްޔާރީގެ 95 އިންސައްތަ މަސައްކަތް ނިމިފައިވާ ކަމަށާއި، މިހާރު ވެސް ވަރަށް ފޯރިއާއި، ޖޯޝުގައި މަސައްކަތްތައް ކުރިއަށްދާ ކަމަށެވެ. އަދި އެކިއެކި ޓީމުތަކަށް ބެހިގެން އެ މަސައްކަތުގައި މުޅި ރަށް އެކުއެކީގައި ޝާމިލްވާ ކަމަށް އޭނާ ވިދާޅުވި އެވެ.
މީގެ އިތުރުން ޒަރީރު ވިދާޅުވީ މިދިޔަ އަހަރެކޭ ވެސް އެގޮތަށް މިއަހަރު ވެސް ގިނަ ބަޔަކު އެރަށަށް ޒިޔާރާތް ކުރާނެ ކަމަށް ބެލެވޭ ކަމަށާއި، އީދަށް އެކަނި ވެސް 2000 އަށް ވުރެ ގިނަ މީހުން އެރަށަށް ޒިޔާރަތް ކުރާނެ ކަމަށެވެ.
އަޅުގަނޑަށް ގަބޫލުކުރެވޭ ގޮތުގައި ގާތްގަނޑަކަށް އިންހައުސް ކަމަދޫގައި ތިބޭނެ ކަމަށް މި ބަލަނީ 2000 އެއްހާ މީހުން މި އީދުގަ. އެއީ މިފަހަރު އިތުރުވި ބެޑް ތަކާ ލައިގެން. ދެން އޭގެ އިތުރުން ރެއާ ދުވާލަށް 500 އެއްހާ މީހުން އިތުރަށް ޒިޔާރަތް ކުރާނެ ޑޭ ވިޒިޓަށް. އެގޮތަށް ޒިޔާރަތް ކުރާނެ ކަމަށް އަޅުގަނޑުމެންނަށް ބެލެވެނީ. އެއީ މިދިޔަ އަހަރުގެ ހިސާބުތަކަށް ބެލިއިރުގައި އެހެންވެފައި ހުރީ.ކަމަދޫ ކައުންސިލްގެ ރައީސް ހަސަން ޒަރީރު
އިޖްތިމާއީ ގޮތުން ދިމާވެދާނެ މައްސަލަތައް މަދު ކުރުމަށް ކުރަމުންދާ މަސައްކަތްތަކަށް ވެސް ޒަރީރު ވަނީ ވާހަކަ ދައްކަވާފަ އެވެ.
އެގޮތުން އޭނާ ވިދާޅުވީ އީދުގެ ހަރަކާތްތަކުގެ ތެރެއިން އަބަދުވެސް ކަންކަން ހަނދާން ކޮށްދެމުން ދާނެ ކަމަށާއި، އިލްތިމާސްތައް ކުރާނެ ކަމަށެވެ. އަދި މައްސަލަތައް މަދު ކުރުމަށްޓަކައި ނުވަތަ މައްސަލައެއް ކުރިމަތިނުވާނެ ގޮތަކަށް ކަންކަން ވަރަށް ބޮޑަށް އިންތިޒާމު ކުރާ ކަމަށް އޭނާ ވިދާޅުވި އެވެ.
މީގެ އިތުރުން ޒަރީރު ވިދާޅުވީ ރަށުތެރެ ސާފުކޮށް ބޭއްވުމަށްޓަކައި ވެސް ހުރިހާ ރައްޔިތުން އެކުއެކީގައި މަސައްކަތް ކުރާ ކަމަށެވެ. އަދި ކައުންސިލްގެ ފަރާތުން ވެސް 7 މުވައްޒަފުންގެ ޓީމަކުން އެމަސައްކަތުގައި ހަރަކާތްތެރިވާ ކަމަށާއި، ގޭބިސީތަކުން ކުނި ނެގުމުގެ މަސައްކަތް ކުރާ ކަމަށެވެ.
ޒަރީރު ވިދާޅުވީ އަޟްޙާ އީދާރަށް ކަމަދޫ ވަރަށް ބޮޑަށް ތައްޔާރުވާނެ ކަމަށާއި، ރަށަށް އަންނަ ހުރިހާ މެހަމާނުންނަށް ވަރަށް ފުރިހަމައަށް މަރުހަބާ ކިޔާނެ ކަމަށެވެ.
ކަމާދޫގައި ކުލަގަދަކޮށް އީދު ފާހަގަކުރާއިރު، މެއިން ސްޕޮންސަރ އަކީ ދަ ހޯކްސް ޕްރައިވެޓް ލިމިޓެޑެވެ.
