ކުރިއަށް އޮތް ހައްޖު މޫސުމަށް "ޑައިރެކްޓް ހައްޖު ޕްރޮގްރާމް" ގެ ދަށުން ހައްޖަށް ދާން އެދޭ ފަރާތްތަކަށް، ބޭނުންވާ ޕެކޭޖުތައް އިޚްތިޔާރުކުރުމުގެ ފުރުސަތު ސައުދީން ހުޅުވާލައިފި

ސައޫދީ އަރަބިއްޔާގެ މިނިސްޓްރީ އޮފް ހައްޖު އެންޑް އުމްރާ އިން، 2026 ވަނަ އަހަރުގެ ހައްޖު މޫސުމަށް "ޑައިރެކްޓް ހައްޖު ޕްރޮގްރާމް" ގެ ދަށުން ހައްޖަށް ދާން އެދޭ ފަރާތްތަކަށް، ބޭނުންވާ ޕެކޭޖުތައް އިޚްތިޔާރުކުރުމުގެ ފުރުސަތު ހުޅުވާލައިފި އެވެ.

މި ފުރުސަތު ހުޅުވާލާފައިވަނީ "ނުސުކް ހައްޖު" (Nusuk Hajj) ޕްލެޓްފޯމް މެދުވެރިކޮށެވެ. މި މަރުހަލާގައި، ޝަރުތުހަމަވާ ޤައުމުތަކުގެ ހައްޖާޖީންނަށް އެކި ފެންވަރުގެ ޕެކޭޖުތަކާއި، އޭގައި ހިމެނޭ ޚިދުމަތްތަކާއި އަގުތައް އަޅާކިޔައި، އެންމެ ބޭނުންވާ ފަސް ޕެކޭޖެއް އިސްކަންދޭ ތަރުތީބުން އިޚްތިޔާރު ކުރުމުގެ ފުރުސަތު ލިބިގެންދާނެ އެވެ.

މިނިސްޓްރީން ހާމަކުރި ގޮތުގައި، މި ފިޔަވަޅުގެ މަޤްޞަދަކީ ރަސްމީކޮށް ބުކިންގް ހެދުމުގެ މަރުހަލާ ފެށުމުގެ ކުރިން، ހައްޖާޖީންނަށް މަޢުލޫމާތު ފުރިހަމަ އަށް އެނގި ތިބެ ގޮތް ނިންމުމަށް އެހީތެރިވުމާއި، ޚިދުމަތް ދޭ ފަރާތްތަކަށް ކުރިއަށް އޮތް މޫސުމަށް ތައްޔާރުވުމަށް ބޭނުންވާ މަޢުލޫމާތު ކުރިއާލައި ފޯރުކޮށްދިނުމެވެ.

މި ޕްލެޓްފޯމުގައި ހިމެނޭ ޑިޖިޓަލް ވަސީލަތްތަކުގެ ތެރޭގައި ޕެކޭޖުތައް އަޅާކިޔުމާއި، ޑިމާންޑް ހުރި ގޮތް ބަލާލުމާއި، ޑިޖިޓަލް ވޮލެޓެއް މެދުވެރިކޮށް އިންސްޓޯލްމަންޓް އުސޫލުން ފައިސާ ދެއްކުމުގެ އިތުރުން، ރަސްމީކޮށް ހުއްދަދީފައިވާ ޚިދުމަތްދޭ ފަރާތްތަކުގެ ލިސްޓު ބަލާލުމުގެ ފުރުސަތު ތަނަވަސް ކުރުމެވެ.

ހައްޖަށް ދާން އެދޭ ފަރާތްތަކުން ޕްލެޓްފޯމުގައި ރަޖިސްޓްރީވުމަށާއި، އަމިއްލަ މަޢުލޫމާތާއި ލިޔެކިޔުންތަކުގެ ސައްހަކަން ކަށަވަރުކުރުމަށް މިނިސްޓްރީން އިލްތިމާސްކުރެ އެވެ. އަދި އާއިލާގެ މެންބަރުންނާއެކު ހައްޖަށް ދާން ބޭނުންވާ ފަރާތްތަކުން އެއް އެޕްލިކޭޝަނެއްގެ ދަށުން އެ މެންބަރުން އިތުރުކުރުމުން، މަޢުލޫމާތު ކަށަވަރުކުރުމާއި ހުއްދަ ދިނުމުގެ ކަންކަން އަވަސްވެ، ފަސޭހަވެގެންދާނެ ކަމަށްވެސް މިނިސްޓްރީން ބުނެފައިވެ އެވެ.

މިނިސްޓްރީން އަލުން ހަނދާންކޮށްދީފައިވާ ގޮތުގައި، "ނުސުކް ހައްޖު" އަކީ ޑައިރެކްޓް ހައްޖު ޕްރޮގްރާމްގެ ދަށުން ހިމެނޭ ޤައުމުތަކަށް ހައްޖުގެ ޚިދުމަތް ދިނުމަށް ކަނޑައަޅާފައިވާ ހަމައެކަނި ރަސްމީ އަދި ހުއްދަދެވިފައިވާ ޕްލެޓްފޯމެވެ. އެހެންކަމުން، ހުއްދަ ނެތް ނުވަތަ އެކްރެޑިޓް ކޮށްފައި ނުވާ އެއްވެސް ފަރާތަކާއެކު މުޢާމަލާތް ނުކުރުމަށް އިލްތިމާސް ކޮށްފައިވެ އެވެ.

ހައްޖާޖީންގެ ހައްގުތައް ހިމާޔަތްކުރުމަށާއި ކަންކަން ރަނގަޅު ތަރުތީބުން ކުރިއަށް ގެންދިއުމަށްޓަކައި، ހުރިހާ ފައިސާގެ މުޢާމަލާތްތަކާއި ބުކިންގްތައް ނިންމަންވާނީ ހަމައެކަނި މި ޕްލެޓްފޯމް މެދުވެރިކޮށް ކަމަށްވެސް ބަޔާނުގައިވެ އެވެ.

މި ނިންމުމަކީ ހަމައެކަނި "ޑައިރެކްޓް ހައްޖު ޕްރޮގްރާމް" ގައި ހިމެނޭ ޤައުމުތަކަށް އަމާޒުކޮށްފައިވާ ނިންމުމެކެވެ. އެހެން ޤައުމުތަކުގައި ހައްޖުގެ ކަންކަން ކުރިއަށްދާނީ އެ ޤައުމެއްގެ ކަނޑައެޅިފައިވާ ރަސްމީ އުސޫލުތަކާއި ޤަވާއިދުތަކުގެ ތެރެއިންނެވެ.

އިތުރު މަޢުލޫމާތު ހޯދުމަށް Nusuk.sa އަށް ޒިޔާރަތްކުރެއްވޭނެ ކަމަށް ވެސް ބުނެފައިވެ އެވެ. އަދި ރަޖިސްޓްރީވުމާއި މަޢުލޫމާތު އަދާހަމަކުރުމަށް Hajj.nusuk.sa ބޭނުންކުރެވޭނެ އެވެ.