އަޅުގަނޑު ހީކުރީ މިސްކިތާ ގުޅުވައިގެން ދޮގު ނުހައްދަވާނެ ކަމަށް، އެކަމަކު އައި ވޯޒް ރޯންގް

މިހާރުގެ ރައީސް ޑރ. މުހައްމަދު މުއިއްޒުގެ މި ސަރުކާރަކީ ދީނީ ސަރުކާރެކެވެ. ރާއްޖެއިން އިސްލާމް ދީން ގެއްލި، ފުހެވިގެންދާނެ ކަމުގެ "ބިރު" އޮވެގެން ދީނަށް ލޯބިކުރާ ބަޔަކު މިގައުމުގެ ވެރިކަމުގައި ތިބުމަށް އައި ސަރުކާރެކެވެ. ތެދުވެރިކަމާ އިޚްލާސްތެރިކަން މި ގައުމުގައި ނެތި ދާނެ ކަމުގެ "ބިރު" އޮވެގެން، އަންނަން އޮތް ޖީލުތަކަށް އެއީ ކޮން އެއްޗެއް ކަން ކިޔައިދީ، އިޚުލާސްތެރި، ދީނަށް ލޯބި ކުރާ، ތެދުވެރި ވެރިއަކު ވެރިކަން ކުރާނެ ގޮތް ދައްކައިދިނުމަށް އައި ސަރުކާރެކެވެ. މިއީ އޭރު ދީނީ އިލްމުވެރިންގެ ޓެގު އަޅުވައިގެން ތިބި ސިޔާސީ ބަޔަކު ރައްޔިތުންނަށް އެގޮތަށް ވިސްނައިދީގެން އައި ސަރުކާރެކެވެ. 

ނަމަވެސް ސަރުކާރު ހިންގުމާ ހަވާލުވިތާ މާ ގިނަ ދުވަހެއް ނުވެ، މިވެރީންގެ ހަގީގީ ކުލަވަރު ފެނިއްޖެ އެވެ. އެއްކަލަ ރައްޔިތުންގެ ޚިދުމަތުގައި އައި ދީނަށް ލޯބި ކުރާ ސަރުކާރުގެ އިސްވެރިން މިހާރު ރައްޔިތުންނަށް ދޮގު ހަދައި އޮޅުވާލަނީ މޫނަށް ރުލެއްވެސް އަރުވާ ނުލަ އެވެ. މި ސަރުކާރަކީ ދޮގު ހަދާ، ރައްޔިތުންނަށް އޮޅުވާލާ، މަކަރު ހަދާ ހީލަތްތެރި ސަރުކާރެއް ކަމަށް ރައްޔިތުން ތަކުރާރު ކޮށް ބުނަމުން އެ ދަނީ އެހެންވެ އެވެ. 

ދޮގު ހަދަމުން ހަދަމުން ގޮސް ދޮގު ނުހަދާނީ ވެސް ވަކި ކޮންކަމަކާ ތޯ އެވެ. މިއޮއްފަދަ ބަރަކާތްތެރި ރަމަޟާން މަހަށް ހަނދު ބެލީ ވެސް ހެދި ބޮޑު ދޮގަކުންނެވެ. އެވެސް މުގައްދަސް މިސްކިތްތަކާ ގުޅުވާ އެވެ. ރައީސް ޑރ. މުހައްމަދު މުއިއްޒު އިއުލާން ކުރެއްވި ގޮތަށް 15 މިސްކިތް ރޯދައަށް ހުޅުވާފައިވާ ކަމަށް މުއިއްޒުގެ އިސްލާމިކް މިނިސްޓަރު ޑރ. ޝަހީމް އަލީ ސައީދު އިއުލާނު ކުރެއްވީ އެކަމުގެ ހަގީގަތް ރައްޔިތުންނަށް ކިހާ ދުވަހަކަށް ފޮރުވޭނެ ކަމުގެ އުއްމީދުގައިތޯ ހަމަ ރަނގަޅަށް ވެސް ސުވާލު އުފެދެ އެވެ. 

މި ރަމަޟާން މަހު ހުޅުވި 15 މިސްކިތުގެ ތެރެއިން 10 މިސްކިތަކީ ހެޔޮ އެދޭ ފަރާތްތަކުގެ ދީލަތި އެހީގައި އިމާރާތްކޮށް ހުޅުވި މިސްކިތްތަކެއް ކަން މިހާރު މިވަނީ ހާމަވެފަ އެވެ. މިއިން އެއްވެސް މިސްކިތެއް އިމާރާތް ކުރުމުގައި ސަރުކާރުގެ އެއްވެސް ހިއްސާއެއް ނެތެވެ. ސަރުކާރުން މިކަމަށް ލޯ ލާރިއެއް ވެސް ޚަރަދު ކޮށްފައެއް ނުވެ އެވެ. 

މިނިސްޓަރު ޝަހީމް އެ ވިދާޅުވާ ހެން  ރައީސް މުއިއްޒު އިއުލާން ކުރެއްވި ގޮތަށް މިސްކިތް ހުޅުވަން މި ސަރުކާރުން ޚަރަދު ކޮށްގެން ހުޅުވީ އެންމެ 5 މިސްކިތެވެ.  އެ 5 މިސްކިތަކީ ވެސް ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި އިމާރާތް ކުުރުމަށް ހުރިހާ ކަމެއް ނިންމައި ހަވާލު ކޮށްފައި ހުރި މަޝްރޫއު ތަކެކެވެ. މިފަދަ ކަމެއްގައި މިއޮތްފަދަ ބަރަކާތްތެރި ރަމަޟާން މަހު ދޮގު ހަދާ ރައްޔިތުންނަށް އޮޅުވާލަން މި، ދީނީ ސަރުކާރަށް ހަމަ އެހާވެސް ފަސޭހަ އެވެ. 

މި އަހަރުގެ ރިޔާސީ ބަޔާނުގައި ވެސް ރައީސް މުއިއްޒު ވަނީ ހަމަ މިފަދަ "މޮޅު" ވާހަކަތަކެއް ވިދާޅުވެ ކުރީ ސަރުކާރުގެ މަޝްރޫއުތަކުގެ ކްރެޑިޓް ނަންގަވަން މަސައްކަތް ކުރައްވާފަ އެވެ. ރިޔާސީ ބަޔާނުގައި ރައީސް މުއިއްޒު ވަނީ ކުރީ ސަރުކާރުގައި ކުރިއަށް ގެންދިޔަ މިސްކިތްތައް އިމާރާތް ކުރުމުގެ މަޝްރޫއުތައް މިސަރުކާރުގެ މަޝްރޫއުތަކެއްގެ ގޮތުގައި ފާހަގަކުރައްވާފަ އެވެ. ހަގީގަތަކީ މިއީ ކުރީ ސަރުކާރުގެ "ފޮޓޯ ފްރޭމް" ތަކެއްގައި މި ސަރުކާރުން އާ ކުލައެއް ޖައްސައިގެން ދައްކާ ވާހަކަތަކަކަށް ވުމެވެ. 

އިސްލާމިކް މިނިސްޓަރު ޑރ. ޝަހީމް އަކީ ދީނީ އިލްމުވެރިއަކަށް ވެ ހުރެ، އަމިއްލަ ފަރާތްތަކުން ކުރި ހެޔޮ އަމަލުތަކެއް އަމިއްލަ ނަމަށް ބަދަލު ކޮށް އެއީ ތިމާކުރި ކަމެއް ކަމަށް ދައްކަވަން އުޅުނީމާ ދެން އެއީ ބޮޑުވަރެވެ. "ދީނަކީ އެންމެ އިސްކަންދޭ ކަންތައް" ކަމަށް ވިދާޅުވެ ވެރިކަމަށް ވަޑައިގެންނެވި ރައީސް މުއިއްޒު، މިސްކިތް ފަދަ މުގައްދަސް ބިނާތަކުގެ ބޭނުން ހިފައިގެން ސިޔާސީ މަންފާ ހޯއްދަވަން އުޅުއްވީމާ ދެން އެކަމަށް ބުނާނެ އެއްޗެއް ހަގީގަތުގައި ނެތެވެ.