އަލް އަބްރާރް ގްރޫޕުގެ ހަވާލުގައި އުމްރާއަށް ދިއުމަށް ފައިސާ ދެއްކި 110 މީހުންގެ ދަތުރު ފަހުވަގުތު ކެންސަލް ކުރި މައްސަލަ ފުލުހުންނާއި، އިސްލާމިކް މިނިސްޓްރީން ތަހުގީގު ކުރަނީ

އަލް އަބްރާރް ހައްޖު އަދި އުމްރާ ގްރޫޕުގެ ހަވާލުގައި އުމްރާއަށް ދިއުމަށް ފައިސާ ދެއްކި 110 މީހުންގެ ދަތުރު ފަހުވަގުތު ކެންސަލް ކުރި މައްސަލަ ބޮޑުވެ، އެމައްސަލަ  ފުލުހުންނާއި އިސްލާމިކް މިނިސްޓްރީން ތަހުގީގު ކުރަން ފަށައިފި އެވެ.

ބުދަ ދުވަހު ފުލުހުން ބުނީ، ރަމަޟާން މަހު އުމްރާއަށް މީހުން ގެންދިއުމަށްޓަކައި ގުރޫޕަކުން ފައިސާ ނެގުމަށްފަހު ދަތުރު ކެންސަލް ކޮށްފައިވާ ޝަކުވާއެއް 4 މަރޗް 2026 ވަނަ ދުވަހު ފުލުހުންނަށް ހުށަހަޅާފައިވާ ކަމަށެވެ. 

މިކަމާއި ގުޅިގެން ބަލަންޖެހޭ ކަންކަން ބަލަމުންދާ ކަމަށް ފުލުހުން ބުނެ އެވެ. 

މީގެ އިތުރުން އިސްލާމިކް މިނިސްޓްރީން ބުނީ، މި މައްސަލަ ސަމާލު ކަމަށް އައިސްފައިވާ ކަމަށާއި، އެކަން ހިނގި ގޮތް މިނިސްޓްރީން ބަލަމުންދާ ކަމަށެވެ.

މި މައްސަލައާ ގުޅިގެން އަންގާރަ ދުވަހުގެ ރޭ އަލް އަބްރާރް ހައްޖު އަދި އުމްރާ ގްރޫޕުގެ އޮފީސް ހުންނަ ސަރަހައްދަށް އެއްވެ އަޑު އުފުލާފައިވެ އެވެ.

އަޑު އުފުލި މީހުން ބުނީ، ދަތުރު ކެންސަލް ކުރިކަން ކުއްލި އަކަށް އެންގިއިރު، އަންގާރަ ދުވަހުގެ ހެނދުނު 10:00 އާއި 11:00އާ ދެމެދު އެއަރޕޯޓަށް ފޮށިތައް ގެންދިޔަ ކަމަށެވެ. އަދި ފަހުން އެއރޕޯޓުން ދަބަސްތައް ގެންދިއުމަށް އަންގައި ބައްދަލުވުމެއް ބޭއްވި ކަމަށެވެ. އެ ބައްދަލުވުމުގައި ދަތުރު ކެންސަލް ކުރަން ޖެހުނު ސަބަބެއް ކަމަށް ދެއްކީ މިހާރު މެދުއިރުމަތީގައި ހިނގަމުންދާ ހަނގުރާމަ ކަމަށާއި، ވާނުވާ ނޭނގޭ ކަމަށެވެ.

ނަމަވެސް އެއީ ކަނޑައެޅިގެން ދޮގު ކަމަށާއި، ދަތުރުގެ ހުރިހާ ކަމެއް ހަމަޖައްސާފައި އޮތްނަމަ އަންގާރަ ދުވަހުގެ ރޭ ފުރުވާލެވޭނެ ކަމަށް އިސްލާމިކް މިނިސްޓަރު ޑރ.ޝަހީމް އަލީ ސައީދު ވެސް އަންގަވާފައިވާ ކަމަށެވެ. އަދި ހަނގުރާމައިގެ ސަބަބުން އުމްރާގެ އަޅުކަމަށް އެއްވެސް ނުރައްކަލެއް ނެތް ކަަމަށް މިނިސްޓަރު ޝަހީމް ވިދާޅުވި އެވެ.

އެ ގުރޫޕްގެ ހަވާލުގައި އުމްރާއަށް ދިއުމަށްޓަކައި ކޮންމެ މީހަކު ވެސް 45،000 ރުފިޔާ ދައްކާފައިވެ އެވެ. އެ އޮފީސް ދޮށަށް އެއްވެ، މީހުން ވަނީ އެ މީހުންގެ ރިފަންޑު ދިނުމަށް ގޮވާލާފަ އެވެ. 

މައުލޫމާތު ލިބޭ ގޮތުގައި، މިހާރު ޓިކެޓަށްވާ ފައިސާ ކެނޑުމަށްފަހު، އެއްބައި މިހާރު ވަނީ ބައެއް މީހުންނަށް އަނބުރާ ދީފަ އެވެ. 

ބައެއް މީޑިއާތަކަށް އެ ގުރޫޕުން ބުނީ، މި މައްސަލަ ދިމާވީ އެ ގުރޫޕުގެ ފަރާތުން އިސްލާމިކް މިނިސްޓްރީއަށް ފޮނުވި ބައެއް ލިޔެކިއުންތައް ލިބިފައިނުވާތީ ކަމަށާއި، މިހާރު ބަލަން ޖެހޭ ކަންކަން ބަލަމުންދާ ކަމަށެވެ. އަދި މިހާރު ރީފަންޑު ދިނުމުގެ މަސައްކަތް ކުރަނީ ދީލަތި ބައެއް ފަރާތްތަކުގެ އެހީގައި ކަމަށާއި، އުމްރާއަށް ދިއުމަށް މީހުން ދެއްކި ފައިސާ އެ މީހުން އުމްރާ އަށް ގެންދިއުމުގެ ކަންކަމަށް ހަރަދު ކޮށްފައިވާ ކަމަށެވެ.

އަލް އަބްރާރް ގްރޫޕަކީ އުމްރާ އަށް މީހުން ގެންދިއުމުގެ ހުއްދަ އޮތް ގުރޫޕަކަށްވާއިރު، މީގެ ކުރިން ގިނަ ބަޔަކު އެ ގުރޫޕްގެ ހަވާލުގައި އުމްރާއަށް ގޮސްފައިވެ އެވެ.