ނަމާދު ކުރާ އަޑު ތާޅަފިލިން ކަނޑާލަން އެންގި ކަމަށް ބުނާ ވާހަކަ މިނިސްޓަރު ޝަހީމް ދޮގު ކުރައްވައިފި
މާލޭގެ ބައެއް މިސްކިތްތަކުގެ ނަމާދުކުރާ އަޑު ބޭރަށް ނީވޭގޮތަށް ތާޅަފިލިތައް ކަނޑާލަން އިސްލާމިކް މިނިސްޓްރީން އެންގި އެންގުމާ ގުޅިގެން ދީނީ އިލްމުވެރިޔާ ޝެއިޚް ނިޝާން ވަނީ ކަންބޮޑުވުންފާޅު ކުރައްވާފައި. ނަމާދުގެ އަޑު ބޭރަށް އިވުމަކީ މީސްތަކުންނަށް ދެވޭ މަތިވެރި ހަނދާންކޮށްދިނުމެއްކަން ފާހަގަކުރައްވައި، މި ނިންމުން ބަދަލުކުރުމަށް އޭނާ ވަނީ ސަރުކާރަށް ގޮވާލައްވާފައިވޭ. ނަމަވެސް ޝެއިޚް ނިޝާންގެ މިވާހަކަތައް އިސްލާމިކް މިނިސްޓަރު ޝަހީމް ވަނީ ދޮގު ކުރައްވާފައި.
އިސްލާމިކް މިނިސްޓްރީގައި ބޭއްވި ރަސްމިއްޔާތެއްގައި މިނިސްޓަރު ޑރ. މުހައްމަދު ޝަހީމް އަލީ ސައީދު ވާހަކަ ދައްކަވަނީ. | އިސްލާމިކް މިނިސްޓްރީ
މާލެސިޓީގެ ބައެއް މިސްކިތްތަކުގެ ނަމާދު ކުރާ އަޑު ތާޅަފިލިން ކަނޑާލަން އިސްލާމިކް މިނިސްޓްރީން އަންގާފައިވާ ކަމަށް ބުނެ، ކަންބޮޑުވުންފާޅުކޮށް އެ ނިންމުން ބަދަލު ކުރުމަށް މަޝްހޫރު ޝެއިޚް އާދަމް ނިޝާން ބިން އަލީ އާދަމް އަލްމާލްދީފީ ގޮވާލެއްވިއިރު، އެއީ ކަނޑައެޅިގެން ދޮގެއް ކަމަށް އިސްލާމިކް މިނިސްޓަރު ޑރ މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
ރާއްޖެއެމްވީ އަށް މިނިސްޓަރު ޝަހީމް ވިދާޅުވީ، މިސްކިތްތަކުގެ ނަމާދު ކުރާ އަޑު ތާޅަފިލިން ކަނޑާލަން އަންގާފައިނުވާ ކަަމަށާއި، އިސްލާމިކް މިނިސްޓްރީ އަށް އިމާމުން ނުގެންދާ ކަމަށެވެ. އަދި ހޮނިހިރު ދުވަހުގެ ރޭގެ މަގްރިބް ނަމާދާއި، އިޝާ ނަމާދުގެ އަޑު ކަނޑާލާފައވާ ކަމަށް ޝެއިޚް ނިޝާން ވިދާޅުވެފައިވާއިރު، އެއީ ވެސް ދޮގެއް ކަމަށް މިނިސްޓަރު ޝަހީމް ވިދާޅުވި އެވެ.
މިނިސްޓަރު ޝަހީމް މިކަން ދޮގު ކުރެއްވިއިރު، ހޮނިހިރު ދުވަހުގެ ރޭ ޝެއިޚް ނިޝާންގެ ރަސްމީ ފޭސްބުކް ޕޭޖުގައި ހިއްސާކޮށްފައިވާ ވީޑީއޯއެއްގައި ވިދާޅުވީ މިސްކިތްތަތަކީ މާތްﷲގެ ގެކޮޅުތައް ކަމަށާއި، މި ބިންމަތީގައި އެންމެ މަތިވެރި އަޅުކަން އަދާކުރަމުންދާ ގެކޮޅުތައް ކަމަށެވެ.
މިމަތިވެރި ގެކޮޅުތަކުގެ އަޑު ކަނޑުވާލުމަކީ ވަރަށް ހިތާމަ ހުރި ކަމެއްކަން ފާހަގަކުރައްވައި ޝެއިޚް ނިޝާން ވިދާޅުވީ މިސްކިތްތަކުގެ އިމާމުން އިސްލާމިކް މިނިސްޓްރީއަށް ގެންގޮސް، މިސްކިތްތަކުގެ ނަމާދު ކުރާ އަޑު އިވޭގޮތަށް ބޭރަށް ހުންނަ ތާޅަފިލި ނުވަތަ ސްޕީކަރުތަކުގެ އަޑު ކަނޑުވާލުމަށް އަންގާފައިވާ ކަމަށެވެ.
ފުރުގާން މިސްކިތަށް އިޝާރާތް ކުރައްވައި ޝެއިޚް ނިޝާން ވިދާޅުވީ މިއީ މާލޭގައި ހުންނަ ބޮޑު މިސްކިތެއް ކަމަށާއި، އެތައް ބަޔަކު ނަމާދު ކުރުމަށް އަންނަ މިސްކިތެއް ކަމަށެވެ. އެ މިސްކިތަކީ އޭސީކޮށްފައި ހުންނަ މިސްކިތަކަށްވާތީ ހުރިހާ ދޮރެއް ހުންނަނީ ލައްޕާފައި ކަމަށާއި، ސްޕީކަރުގެ އަޑު ކަނޑާލުމުން އެއްވެސް ވަރަކަށް ބޭރަށް ބަންގީގެ އަޑާއި، ނަމާދު ކުރާ އަޑު ނީވޭ ކަމަށް އޭނާ ވިދާޅުވި އެވެ. އަދި ވިދާޅުވީ ހޮނިހިރު ދުވަހުގެ ރޭގެ މަގްރިބް ނަމާދާއި، އިޝާ ނަމާދުގެ އަޑު މިސްކިތުގެ ބޭރު ފާރު ކައިރީގައި ހުންނައިރު ވެސް އެއްވެސް ވަރަކަށް ނީވޭ ކަމަށެވެ.
ޝެއިޚް ނިޝާން ވިދާޅުވީ ބަންގީގެ އަޑާއި، ނަމާދު ކުރާ އަޑު ނީވޭ ކަމުގެ ޝަކުވާ ގިނަ ބަޔަކު ކުރަމުންދާ ކަމަށާއި، މިމައްސަލަ އަވަހަށް ހައްލު ކުރަން ޖެހޭ ކަމަށެވެ.
އަޅުގަނޑުމެންގެ މުޖުތަމައުގައި ނަމާދު ކުރެވެމުންދާއިރު، މީސްކިތަކުން ގެ ތެރެއިން ގާފިލު ކަންމަތީގައި ތިބި އެތައް ބައެއް ހޮޓާ ރެސްޓައުރެންޓުތަކާއި، ކުޅިވަރު ކުޅޭ ތަންތަނުގައި އެމީހުންނަށް ވެސް އެއީ ދެވޭ މެސެޖެއް. ހަނދުމަކޮށްދިނުމެއް ނަމާދުގެ އަޑު އިވުމަކީ. އާދެ އަޅުގަނޑުމެންގެ މި މަތިވެރި ޝިއާރަށް ދޭ އަހައްމިއްލަޔުކަން ކުޑަ ވެގެންދާނެ ކަމެއް އަޅުގަނޑުމެން ނަމާދަށް އަންނައިރު ވެސް ނަމާދު ކުރެވޭނެކަން އަދި ނަމާދު ލިބޭނެކަން އެ އަޑު އިވުމުން އެބަ އެނގޭ. އެހެންނަމަވެސް ނާމަދުގެ އެ އަޑު އެކީ އެކައްޗަކަށް ކަނޑާލުމުން ނަމާދު ކުރާކަމުގެ އިހުސާސްއެއް ވެސް މިތާ ކައިރިން ދާއިރު ވެސް އަޅުގަނޑުމެންނަށް މިރޭ ހަމަ އެ ތަޖުރިބާ ކުރިން. އަޅުގަނޑަށް ނަމާދަށް އާދެވުނީ ގަމަތް ދީދީ ހުއްޓާ. އެކަމަކު މިސްކިތަށް ނާދެވޭއިރު، ގަމަތްދީ ނިމިގެން ނަމާދު ފެށިކަމެއް ނޭނގޭ. މިސްކިތުގެ މި ބޭރު ފާރާ ހިސާބަށް އައިރުގަ ވެސް ނަމާދު ފެށި ކަމެއް ނޭނގޭ. އަޅުގަނޑު ހީކުރީ މައްސަލައެއް ޖެހުނީ ކަމަށް. އެކަމަކު މިސްކިތަށް ވަދެ ދޮރު ހޮޅުވާލި ހިސާބުން މިއަޑު އިވުނީ. އޭރުގައި އަލްހަމްދު ނިމިގެން އަނެއް ސޫރަށް ފަށައިގެން ކިޔަމުން ދިޔައީ.މަޝްހޫރު ޝެއިޚް އާދަމް ނިޝާން ބިން އަލީ އާދަމް އަލްމާލްދީފީ
ޝެއިޚް ނިޝާން ވިދާޅުވީ ޒަމާނުއްސުރެ ރާއްޖޭގެ މިސްކިތްތަކުން ބަންގީގެ އަޑާއި، ނަމާދު ކުރާ އަޑު ބޭރަށް އިވޭ ކަމަށާއި، އެކަމުގައި މައްސަލައެއް ދިމާ ނުވާ ކަމަށެވެ. އަދި ގޮތަކަށް މިކަން ހުއްޓުވުމުގެ މަގުސަދާ މެދު ޝެއިޚް ނިޝާން ވަނީ ސުވާލު އުފައްދަވާފަ އެވެ.
ހުދު ރަސޫލާ مُحَمَّدُ صَلَّى اللهُ عَلَيْهِ وَسَلَّمَ ޒަމާނުގައި ވެސް މިސްކިތުގެ ބޭރަށް ނަމާދު ކުރާ އަޑާއި، އަދި ކިޔެއް މިސްކިތުގައި އެކަލޭގެފާނުގެ ވައުދު ނަސޭހަތްޕުޅާއި، ޚުތުބާތަކުގެ އަޑު ހުންނެވި ކަމަށް އެތައް ސައްހަ ދަލީލުތަކުން އެބަހުރި. އެކަން ފެނި އެނގި ބަޔާންވާން. އެގޮތުން ހުކުރު ނަމާދުގެ ޚުތުބާގައި އެކަލޭގެފާނު ޚުތުބާގައި ކާފު ސޫރަތުގެ އާޔަތްތައް ވިދާޅުވާލެއް ގިނަކަމުން އެހިސާބު ކައިރި އަންހެން ކަނބަލުން އެބަހުރި ނަގުލު ކުރައްވާފައި ތިމަންކަނބަލުންނަށް އެ ސޫރަތް އެކީ ހިތު ދަސްވިއޭ އެކަލޭގެފާނު ޚުތުބާގައި ކާފު ސޫރަތުގެ އާޔަތްތައް ބަޔާން ކުރައްވާލެއް ގިނަކަމުން. އަދި ހަމައެހެންމެ އެހެން ސަހާބީން އެބަހުންނެވި ވިދާޅުވެފައި މަދީނާގެ މަގުތަކުގެ މިވެނި ހިސާބަކަށް މިސްކިތުގައި ނަމާދުކުރާ އަޑު ތިމަން ވަޑައިގެންނެވިއިރު އިވިވަޑައިގެންނެވި. ބައެއް ބޭކަލުން އެކަލޭގެފާނު މިސްކިތުގައި ނަމާދަށްފަހު ދުރުސް ދެއްވާ ވާހަކަ ވިދާޅުވިއިރު އެ ވިދާޅުވި ބަސްފުޅުތަކަށް އަމަލު ކުރައްވައި އިށީނަވަން އަމުރު ކުރެއްވީމަ މިސްކިތުގެ ބޭރުގައި ހުންނަވައި އިށީންނަވާފައި އެބަހުރި. މިފަދަ އެތައް ސައްހަ ދަލީލުތައް އެބަހުރި. އަދި އިސްލާމީ އުންމަތުގެ އެތައް ގައުމުތަކެއްގައި މިގޮތަށް އަމަލު ކުރަމުން އައީ.މަޝްހޫރު ޝެއިޚް އާދަމް ނިޝާން ބިން އަލީ އާދަމް އަލްމާލްދީފީ
ޝެއިޚް ނިޝާން ވިދާޅުވީ މިޒަމާނުގައި މިސްކިތްތަކުގެ ބަންގީގެ އަޑާއި، ނަމާދު ކުރާ އަޑު އިވުމުން އުދަނގޫވާ ވާހަކަ އަކީ ދައްކާ ބަހަނާއެއް ކަމަށާއި، އެއީ ގަބޫލު ކުރެވޭނެ ކަމެއް ނޫން ކަމަށެވެ. މިއީ އިސްލާމް ދީނަށް ކުރެވޭ ކުޑާމީސް އަމަލެއް ކަމަށް އޭނާ ވިދާޅުވި އެވެ. އަދި އިސްލާމިކް މިނިސްޓްރީންނާއި، ސަރުކާރުން މި މައްސަލައަށް އަވަސް ހައްލެއް ހޯދައިދީ، މިގޮތަށް މިކަން ނުކުރުމަށް ވަނީ ނަސޭހަތްތެރިވެފަ އެވެ.
