ހަމަލާ ދީފި ނަމަ، ވަރުގަދަ ފިލާވަޅެއް ދަސްކޮށްދޭނަން: އީރާންގެ ޤާނޫނު ހަދާ މަޖިލީހުގެ ރައީސް

އީރާން އަށް އަލުން ހަމަލާއެއް ދީފި ނަމަ، އެފަދަ އުދުވާނެއް ހިންގާ ބަޔަކަަށް ވަރުގަދަ ފިލާވަޅެއް ދަސްކޮށްދޭނެ ކަމަށް ވިދާޅުވެ، އީރާންގެ ޤާނޫނު ހަދާ މަޖިލީހުގެ ރައީސް މުޙައްމަދު ބާގިރު ޣަލިބާފް އިންޒާރު ދެއްވައިފި އެވެ. 

ޣަލިބާފް މިހެން ވިދާޅުވީ، މެދު އިރުމަތީގައި އޮތް ހަަމަލާ ބަދަލު ކުރުން ހުއްޓާލުމުގެ އެއްބަސްވުން އޮތީ ވަރަށް ނާޒުކު ފައްތަރެއްގައި ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައި ވަނިކޮށެވެ. އެކަމަށް ރައްދު ދެއްވަމުން ޣަލިބާފް ވިދާޅުވީ، އީރާންގެ އަސްކަރިއްޔާ އޮތީ އެންމެ ފުރިހަމަ އަށް ތައްޔާރަށް ކަމަށެވެ. 

އެކްސްގައި ކުރެއްވި ޕޯސްޓެއްގައި ޣަލިބާފް ވިދާޅުވީ، ކޮންމެ ފަދަ އުދުވާާނަކަށް ރައްދު ދީ، އެކަން ކުރާ ބަޔަކަށް ފިލާާވަޅެއް ދަސްކޮށްދިނުމަށް އީރާންގެ ހަތިޔާރު އެޅި ސިފައިން ތިބީ ތައްޔާރަށް ކަމަށެވެ. އަދި ނުވައި ސިޔާސަތު ތަކާއި، ނުބައި ނިންމުން ތަކުގެ ނަތީޖާ އަބަދު ވެސް ނިކުންނާނީ ގޯސްކޮށް ކަމަށާއި، އެކަން މިއަދު މުޅި ދުނިޔެ އަށް ވެސް ސާފު ވާނެ ކަމަށް އޭނާ ވިދާޅުވި އެވެ. 

އެމެރިކާގެ ރައީސް ޑޮނަލްޑް ޓްރަމްޕް ހޯމަ ދުވަހު ވިދާޅުވީ، އީރާން އާއެކު ޤާއިމު ކޮށްފައި އޮތް ހަމަލާ ބަދަލު ކުރުން މެދު ކަނޑާލުމުގެ އެއްބަަސްވުން މިހާރު އޮތީ ނާޒުކު ޙާލަތެއްގައި ކަަމަށެވެ. ނުވަތަ އެ އެއްބަސްވުން އޮތީ ނެތި ދިޔުމުގެ މަގު މަތީގައި ކަމަށް ޓްރަމްޕް ވިދާޅުވި އެވެ. ޓްރަމްޕް މިހެން ވިދާޅުވީ، އެމެރިކާ އިން ހުށަހެޅި ހުށަހެޅުން ތަކަށްް އީރާން އިން ދިން ޖަވާބަކީ، ބަލައި ގަނެވޭނެ ޖަވާބެއް ނޫން ކަމަށް ވިދާޅުވުމަށް ފަހު އެވެ. 

އީރާން އިން ދިން ޖަވާބު ބަލައި ނުގަންނަން ޓްރަމްޕް ނިންމުމާ ގުޅިގެން، މިހާރު 10 ހަފުތާ އަށް ދެމިގެން ގޮސްފައިވާ މި ހަަމަނުޖެހުންތައް އިތުރަށް ދިގުލައިގެން ހިނގައި ދާނެ ކަމުގެ ބިރު ވަނީ ބޮޑުވެފަ އެވެ. މީގެ އިތުރުން، ހޮރްމޫޒް ކަނޑު އޮޅިން ކުރާ މުދާ އުފުލުމުގެ ދަތުރު ފަހަރު ތަކަށް މީގެ ސަބަބުން ބޮޑެތި ހުރަސް ތަކެއް ކުރިމަތި ވަމުންދާނެ ކަމަށް މަސްރަހު ދިރާސާ ކުރާ ފަރާތްތަކުން ލަފާ ކުރެ އެވެ. 

މި ޙާލަތާ ގުޅިގެން ހޯމަ ދުވަހު ޓްރަމްޕް ވަނީ އެމެރިކާގެ ޤައުމީ ސަލާމަތާ ބެހޭ ކޮމެޓީއާ ބައްދަލު ކުރައްވައި، އީރާން އަށް ހަަމަލާ ދެވިދާނެ ގޮތްތަކާ މެދު މަޝްވަރާ ކުރައްވައިފަ އެވެ.