މިދިޔަ މަހު ރާއްޖޭގެ ހުރިހާ އަތޮޅެއްގައި ރޯގާގެ ގޮތުގައި ފެތުރޭ ބަލިތައް ވަރަށް ބޮޑަށް އިތުރު، މާލެ ސަރަހައްދުން އެކަނި ވެސް 7000ށް ވުރެ ގިނަ މީހުންނަށް ބޭރަށް ހިންގުން ޖެހިފައިވޭ
މިދިޔަ ޑިސެންބަރު މަހާ އަޅާބަލާއިރު ޖަނަވަރީ މަހު ޑެންގީ ހުން، އަރިދަފުސް ރޯގާ އަދި ބޭރަށް ހިންގުން ޖެހިގެން ރިޕޯޓުކުރި މިންވަރު މުޅި ރާއްޖޭގައި ވަނީ ވަރަށް ބޮޑަށް އިތުރުވެފައި. މީގެ އިތުރުން އިންފްލުއެންޒާގެ ކޭސްތައް ވެސް ފެންނަމުންދާތީ، ބަލިތަކުން ރައްކާތެރިވުމަށް ސާފުތާހިރުކަމަށް ސަމާލުކަންދީ ރައްކާތެރިކަމުގެ ފިޔަވަޅުތައް އެޅުމަށް އެޗްޕީއޭއިން ވަނީ އިލްތިމާސްކޮށްފައި.
ސްކޫލް ދަރިވަރުން ސްކްރީން ކުރުމުގެ ޕްރޮގްރާމުގެ ތެރެއިން ކަލާފާނު ސްކޫލް ދަަރިވަރުން ސްކްރީން ކުރަނީ. ފައިލް ފޮޓޯ | igmh
މިދިޔަ މަހު ރާއްޖޭގެ ހުރިހާ އަތޮޅެއްގައި ރޯގާގެ ގޮތުގައި ފެތުރޭ ބަލިތައް ވަރަށް ބޮޑަށް އިތުރުވެފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނެފި އެވެ.
ރޯގާގެ ގޮތުގައި ފެތުރެމުންދާ ބަލިތަކުގެ ހާލަތާ ގުޅޭގޮތުން ބުރާސްފަތި ދުވަހު އެޗްޕީއޭއިން ބުނީ، މިދިޔަ އަހަރުގެ ޑިސެންބަރު މަހާ އަޅާބަލާއިރު މިއަހަރު ޖަނަވަރީ މަހު ޑެންގީހުން ޖެހިގެން ރިޕޯޓު ކުރެވުނު އަދަދު ވަނީ އިތުރުވެފައިވާ ކަމަށާއި، ޑިސެންބަރު 2025 ގައި 424 ކޭސް، ޖެނުއަރީ މަހު 647 ކޭސް ރިޕޯޓު ކޮށްފައިވާ ކަމަށެވެ.
އެޗްޕީއޭއިން ބުނީ އަރިދަފުސް ރޯގާ ޖެހިގެން ޑިސެންބަރު 2025 ގައި 29461 ކޭސް، ޖަނަވަރީ 2026 ގައި 34840 ކޭސް، ބޭރަށް ހިންގުން ޖެހިގެން ޑިސެންބަރު މަހު 3405 ކޭސް، ޖަނަވަރީ މަހު 7792 ކޭސް ރިޕޯޓު ކޮށްފައިވާ ކަމަށެވެ.
މާލެސިޓީގެ އިތުރުން ރާއްޖޭގެ ހުރިހާ އަތޮޅެއްގައި ބޭރަށް ހިންގުން ޖެހިގެން ރިޕޯޓު ކުރި މީހުންގެ ނިސްބަތް އިތުރުކަން ފާހަގަކޮށް އެޗްޕީއޭއިން ބުނީ ޑެންގީ ހުން، ވައިރަލް ހުން އަދި އަރިދަފުސް ރޯގާ ރާއްޖޭގެ ގިނަ އަތޮޅުތަކުގައި އިތުރުވެފައިވާ ކަމަށެވެ.
މީގެ އިތުރުން އެޗްޕީއޭއިން ބުނީ އިންފްލުއެންޒާ އަށް މި އަހަރުގެ މިހާތަނަށް ޓެސްޓު ކުރެވުނު 791 ސާމްޕަލްގެ ތެރެއިން 96 ސާމްޕަލެއް ޕޮޒިޓިވްވެފައިވާ ކަމަށެވެ.
މުޅި ރާއްޖޭގައި ރޯގާތައް އިތުރުވަމުންދާތީ، ބަލިން ރައްކާތެރިވުމުގެ ފިޔަވަޅު އެޅުމަށް އެޗްޕީއޭއިން ވަނީ އިލްތިމާސްކޮށްފަ އެވެ.
އެގޮތުން ބަލި ޖެހިއްޖެނަމަ، މީހުންގެ ތެރެއަށް ނުދިއުމާއި، މާސްކް އެޅުމަށާއި، ގިނަގިނައިން އަތް ދޮވުމަށް އެދިފައިވެ އެވެ. އަދި ބަލިވުމުން ޑޮކްްޓަރަށް ދައްކައި، ފަރުވާ ހޯދުމަށް ވެސް އެދިފައިވެ އެވެ.
