ރާއްޖޭގެ މޫސުން ގޯސް، ކުރިއަށް އޮތް 4 ދުވަހު ދުންފުހުގެ އަސަރު އުތުރާއި މެދު ރާއްޖެތެރޭގެ އަތޮޅުތަކަށް ވަރަށް ބޮޑަށް ކުރާނެ، ސަމާލުވޭ
ކުރިއަށް އޮތް 24 ގަޑިއިރު ރާއްޖޭގެ އެކި ހިސާބަށް ވިއްސާރަ ކުރާނެ ކަމަށާއި، ގުގުރުން އެކަށީގެން ވާ ކަމަށް. މެދުރާއްޖެތެރެ އާއި ދެކުނުގެ ބައެއް ރަށްރަށަށް ބޯކޮށް ވާރޭވެހުން އެކަށީގެންވޭ. ނަމަވެސް އުތުރުގެ މޫސުން ރަނގަޅު ވާނެ. އަދި ރާއްޖޭގެ ސަރައްހަދުތަކަށް ޚާއްސަކޮށް އުތުރާއި މެދު ރާއްޖެތެރޭގެ އަތޮޅުތަކަށް ދުންފުހުގެ އަސަރު ވަރަށް ބޮޑަށް ކުރާއިރު، ބައެއް ސަރަހައްދުތަކުގައި ވައިގެ ނުސާފުކަން ހުރީ ސިއްހީ ގޮތުން ނުރައްކާވާ މިންވަރުގައި.
މާލެ ސަރަހައްދު ވައި ނުސާފުވެފައި | ރާއްޖެއެމްވީ
ކުރިއަށް އޮތް 24 ގަޑިއިރު ރާއްޖޭގެ މޫސުން ގޯސްވާނެ ކަމަށާއި، ކުރިއަށް އޮތް 4 ދުވަހު ދުންފުހުގެ އަސަރު ވަރަށް ބޮޑަށް އުތުރާއި މެދު ރާއްޖެތެރޭގެ އަތޮޅުތަކަށް ކުރާނެ ކަމަށް މޫސުމާބެހޭ ގައުމީ އިދާރާއިން ބުނެފި އެވެ.
މޫސުމާބެހޭ ގައުމީ އިދާރާއިން ބުނީ، ކުރިއަށް އޮތް 24 ގަޑިއިރު ރާއްޖޭގެ އެކި ހިސާބަށް ވިއްސާރަ ކުރާނެ ކަމަށާއި، ގުގުރުން އެކަށީގެން ވާ ކަމަށެވެ. މެދުރާއްޖެތެރެއާއި ދެކުނުގެ ބައެއް ރަށްރަށަށް ބޯކޮށް ވާރޭވެހުން އެކަށީގެންވާ ކަމަށާއި، ނަމަވެސް އުތުރުގެ މޫސުން ރަނގަޅު ވާނެ ކަމަށް މޫސުމާބެހޭ ގައުމީ އިދާރާއިން ބުންޏެވެ.
މޫސުމާބެހޭ ގައުމީ އިދާރާއިން ބުނީ، އިރުއުތުރާއި އިރުން ގަޑިއަކު 05 މޭލާއި 15 މޭލާ ދެމެދުގެ ބާރުމިނުގައި ވައި ޖެހޭނެ ކަމަށާއި، ވިލާގަނޑުގައި ގަޑިއަކު 35 މޭލު ބާރުމިނަށް ވައި ގަދަވާނެ ކަމަށެވެ. އަދި ކަނޑުތައް އާދައިގެ ވަރަކަށް މަޑުވެފައި ވިލާގަނޑުގައި އާދައިގެ ވަރަކަށް ގަދަވާނެ ކަމަށާއި، ރާޅުގެ އުސްމިނުގައި 2 ނުވަތަ 4 ފޫޓު ހުންނާނެ ކަމަށް ވަނީ ލަފާކޮށްފަ އެވެ.
މީގެ އިތުރުން ހޯމަ ދުވަހުގެ މެންދުރު 12:30ން އިރުއޮއްސި 6:30ށް ކ.އަތޮޅުން ފެށިގެން އައްޑޫ ސިޓީ އަށް ވަނީ ވައިޓް އެލާޓް ނެރިފަ އެވެ.
ރާއްޖޭގެ ސަރައްހަދުތަކަށް ޚާއްސަކޮށް އުތުރާއި މެދު ރާއްޖެތެރޭގެ އަތޮޅުތަކަށް ދުންފުހުގެ އަސަރު ކުރަމުންދާކަން ފާހަގަކޮށް މޫސުމާ ބެހޭ ގައުމީ އިދާރާއިން ބުނީ، ދުރު ފެންނަ މިންވަރު 3 ކިލޯމީޓަރަށް ވުރެ ދަށުން ރިޕޯޓު ކުރަމުންދާ ކަމަށެވެ. އަދި ކުރިއަށް އޮތް 4 ދުވަހުވެސް ދުންފުހުގެ އަސަރު ރާއްޖޭގެ ސަރަހައްދުގައި ހުންނާނެ ކަމަށް ބެލެވޭ ކަމަށް އެ އިދާރާއިން ބުންޏެވެ.
ވައިގެ ކޮލެޓީ ދައްކުވައިދޭ އައިކިއު އެއާއިން ދައްކާ ގޮތުގައި މާލޭގައި ވައިގެ ކޮލެޓީ ހުރީ 118 ގަ އެެވެ. މިއީ ނުރައްކަލުގެ އޮރެންޖު ސަމާލެވެ. ވިލިމާލޭގައި ވައިގެ ކޮލެޓީ 158 ގައި ހުރިއިރު މިއީ ނުރައްކަލުގެ ރަތް ސަމާލެވެ. މީގެ އިތުރުން ކުޅުދުއްފުށި ސިޓީ ވެސް ނުރައްކަލުގެ އޮރެންޖު ސަމާލުގައި އޮތްއިރު އެ ސިޓީގައި ވައިގެ ކޮލެޓީ އުޅެނީ 115ގަ އެވެ. އަދި ށ. ފުނަދޫގައި ވައިގެ ކޮލެޓީ އުޅެނީ 63 ގައެވެ. މިއީ ރީނދޫ ސަމާލެކެވެ.
އެހެންކަމުން ބޭރުގައި އެކި ހަރަކާތްތަކުގައި އުޅޭ މީހުން ސަމާލުވުމަށް މޫސުމާބެހޭ ގައުމީ އިދާރާގެ އިތުރުން ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ވަނީ އިލްތިމާސްކޮށްފަ އެވެ.
