ލިޔުނު ޚަބަރަކާ ގުޅިގެން ކޯޓަށް ހާޒިރުކުރި ލީވާން އަށް ވަކީލަކު އައްޔަނު ކުރަން ދިނީ އެންމެ 2 ގަޑިއިރު
12 މެއި 2026 | އަންގާރަ 07:27ކްރިމިނަލް ކޯޓުން ނެރެފައިވާ "ގެގް އޯޑަރާ" ޚިލާފުވި ކަމަށް ބުނެ "އަދަދު" ނޫހުގެ ނޫސްވެރިޔާ ލީވާން އަލީ ނާސިރު ކޯޓަށް ހާޒިރުކޮށް، ވަކީލަކު ހަމަޖެއްސުމަށް އެންމެ ދެ ގަޑިއިރުގެ މުއްދަތެއް ދީފި. މި މައްސަލައަކީ "އައިޝާ" ޑޮކިއުމެންޓްރީއާ ގުޅޭ ވާހަކަތައް ނުދެއްކުމަށް ކޯޓުން ކޮށްފައިވާ އަމުރާ ގުޅުންހުރި ކަމެއް ކަމަށްވާއިރު، ހަމަ މި މައްސަލައިގައި އެ ނޫހުގެ ނޫސްވެރިޔާ މުހައްމަދު ޝަހުޒާން ވެސް ކޯޓަށް ހާޒިރުވުމަށް ވަނީ އަންގާފަ. ކޯޓުގެ އަމުރުގައި ބުނެފައިވަނީ މުޖުތަމައުގެ އަޚްލާގީ މިންގަނޑު ހިފެހެއްޓުމަށްޓަކައި މި މައްސަލައިގެ މައުލޫމާތު ފެތުރުމަކީ ކޯޓުގެ ހުރުމަތް ކެނޑުން ކަމަށް.
އަދަދު ނޫހުގެ ނޫސްވެރިޔާ ލީވާން އަލީ ނާސިރު: ލިޔުނު ޚަބަރަކާ ގުޅިގެން އޭނާ ވަނީ އަންގާރަ ދުވަހުގެ ކްރިމިނަލް ކޯޓަށް ހާޒިރު ކޮށްފައި | ދައުރު
ލިޔުނު ޚަބަރަކާ ގުޅިގެން ކްރިމިނަލް ކޯޓަށް ހާޒިރުކުރި އަދަދު ނޫހުގެ ނޫސްވެރިޔާ ލީވާން އަލީ ނާސިރު އަށް ވަކީލަކު ހަމަޖެއްސުމަށް އެންމެ 2 ގަޑިއިރު އެ ކޯޓުން ދީފި އެވެ.
ލީވާން ކޯޓަށް ހާޒިރުވުމަށް އަމުރުކޮށް ކޯޓުން ބުނެފައި ވަނީ އޭނާ ހާޒިރުކުރަނީ އޭނާ ލިޔުނު "އަނގަ ބަންދުކުރާ" އަމުރުގެ ޚަބަރާއި ގުޅިގެން އެ ހަބަރަކީ، ކޯޓުން ނެރެފައިވާ ގެގް އޯޑަރާ ހިލާފު ޚަބަރެއްތޯ ބެލުމަށް ކަމަށެވެ.
އަންގާރަ ދުވަހުގެ ހެނދުނު 11:00 އަށް ކޯޓަށް ލީވާން ހާޒިރުވެފައި ވަނީ ވަކީލާކާ ނުލަ އެވެ. ކޯޓުގައި ލީވާން އެދުނީ ވަކީލެއް ހަމަޖެއްސުމަށް އިތުރު ވަގުތު ދިނުމަށެވެ. ވަކީލަކު ހަމަޖެއްސުމަށް 10 ދުވަހުގެ މުއްދަތެއް ދިނުމަށް ލީވާން އެދުނު ނަމަވެސް މައްސަލަ ބައްލަވާ ގާޒީންގެ ބެންޗުން ނިންމެވީ ވަކީލެއް ހަމަޖެއްސުމަށް އެންމެ 2 ގަޑިއިރު ދިނުމަށެވެ.
އަދަދު ނޫހުން ގެނެސްދިން "އައިޝާ" ޑޮކިއުމެންޓްރީގެ މައްސަލައިގައި ކޯޓުން ވަކިގޮތެއް ކަނޑައަޅަންދެން ދައުވާ ކުރެވިފައިވާ ހާދިސާއާ (އައިޝާ ޑޮކިއުމެންޓްރީ) ގުޅުން ހުރި ވީޑިއޯ ޑޮކިއުމަންޓަރީ މުޖުތަމައުގެ ތެރޭގައި ދައުރު ނުކުރުމަށާއި، މި ޑޮކިއުމަންޓަރީ ގައި ގެނަސްދީފައިވާ އެއްވެސް ވާހަކައެއް ސީދާ ގޮތުންނާއި ނުސީދާ ގޮތުންވިޔަސް ނުދެއްކުމަށާއި، ޝަރީއަތަށް ހުށަހެޅިފައިވާ ޑޮކިއުމަންޓަރީ އާ ގުޅޭ މައްސަލައިގެ ހަސްމަކާއި ނުވަތަ ކުށުގެ ޝިކާރައަށްވީ މީހާ ގެ އެއްވެސް ވާހަކައެއް ނުދެއްކުމަށް ކްރިމިނަލް ކޯޓުން ވަނީ އަމުރުކޮށްފަ އެވެ.
ކްރިމިނަލް ކޯޓުގެ އަމުރުގައި ބުނެފައި ވަނީ މިބާވަތުގެ މައްސަލަތަކަކީ ގާނޫނު އަސާސީގެ 42 ވަނަ މާއްދާގެ (ނ) ގެ (1) ވަނަ ނަންބަރުގައި ބަޔާންކުރާ މުޖްތަމައުގެ އަޚްލާގީ އުސޫލުތައް ހިފެހެއްޓުމުގެ ގޮތުން، އާންމުކޮށް ހުޅުވާނުލައި ސިއްރު ކޮށްގެން ކުރިއަށް ގެންދެވޭނެ ޝަރީޢަތްތަކެއް ކަމުގައިވާއިރު، މައްސަލާގައި ހުށަހަޅާފައިވާ ލިޔުންތަކާއި ޝަރީއަތާއި ގުޅުންހުރި މައުލޫމާތުތައް ނުފެތުރުމަށް އަމުރުކޮށް މިފަދަ ކޮންމެ ކަމަކީ ކޯޓުގެ ހުރުމަތް ކެނޑުންކަމުގައި ބެލިދޭނެ އަމަލެއްކަމުގައި އަންގާ ކަމަށެވެ.
ލީވާން ކްރިމިނަލް ކޯޓަށް ހާޒިރު ކޮށްފައިވާއިރު އަދަދު ނޫހަށް ލިބިފައިވާ މައުލޫމަތަކަށް ބިނާކޮށް ރައީސް ޑރ. މުހައްމަދު މުއިއްޒު އާއި ނޫސްވެރިންގެ ބައްދަލުވުމުގައި ސުވާލުކުރުމުން، އަދަދު ނޫހުގެ ނޫސްވެރިޔާ މުހައްމަދު ޝަހުޒާން ކްރިމިނަލް ކޯޓޫގެ އަމުރާއި ހިލާފުވެއްޖެ ކަމަށް ރައީސް މުއިއްޒު ކަނޑައެޅުއްވުމާއެކު ޝަހުޒާން ކޯޓަށް ހާޒިރުވުމަށް ވެސް ވަނީ އަންގާފަ އެވެ.
ޝަހުޒާން ހާޒިރުވާން އަންގާފައިވަނީ އަންގާރަ ދުވަހުގެ މެންދުރު 1:00 އަށެވެ.
