އދ މަޖިލީހުގެ ރައީސުންގެ ބައްދަލުވުމަށް ޝާހިދު ޗައިނާއަށް
11 މެއި 2026 | ހޯމަ 17:45އދ. ގެ އާންމު މަޖިލީހުގެ 76 ވަނަ ދައުރުގެ ރައީސް ޢަބްދުﷲ ޝާހިދު ޗައިނާއަށް ކުރައްވާ މި ދަތުރުފުޅަކީ ދުނިޔޭގެ މުހިންމު މައްސަލަތަކާ ގުޅޭގޮތުން މަޝްވަރާކުރުމަށް ބާއްވާ މަތީ ފަންތީގެ ބައްދަލުވުމެއްގައި ބައިވެރިވެވަޑައިގަތުމަށް ކުރައްވާ ދަތުރުފުޅެއް. އދ. ގެ އާންމު މަޖިލީހުގެ ރައީސްކަން ކުރައްވާފައިވާ ބޭފުޅުންގެ ތަޖުރިބާގެ ބޭނުން ހިފުމަށް އުފައްދާފައިވާ މި ކައުންސިލްގެ ބައްދަލުވުމުގައި، ބައިނަލްއަގުވާމީ ގޮންޖެހުންތަކަށް ހައްލު ހޯދުމާއި އދ. އިސްލާހުކުރުމާ ގުޅޭގޮތުން ޝާހިދު ލަފާދެއްވާނެ. މީގެ ކުރިންވެސް އެކި ގައުމުތަކުގައި ބޭއްވި މިފަދަ ބައްދަލުވުންތަކުގައި ބައިވެރިވެވަޑައިގެން، ސުލްހައާއި ތަރައްގީއަށް މުހިންމު ހިޔާލުތަކެއް އެމަނިކުފާނު ވަނީ ހުށަހަޅުއްވާފައި.
އެމްޑީޕީގެ ރައީސް އަދި ކުރީގެ ޚާރިޖީ ވަޒީރު ޢަބްދުﷲ ޝާހިދު. | އަބްދުﷲ ޝާހިދު
އެމްޑީޕީގެ ރައީސް އަދި ކުރީގެ ޚާރިޖީ ވަޒީރު ޢަބްދުﷲ ޝާހިދު، އދ. ގެ އާންމު މަޖިލީހުގެ ރައީސުންގެ ކައުންސިލް، ކައުންސިލް އޮފް ދަ ޕްރެޒިޑެންޓްސް އޮފް ދަ ޖެނެރަލް އެސެމްބްލީގެ ބައްދަލުވުމެއްގައި ބައިވެރިވެވަޑައިގަތުމަށް ޗައިނާގެ ޝަންހާއީއަށް ފުރާވަޑައިގެންފި އެވެ.
އާދިއްތަ ދުވަހު ޝަންހާއީގައި ފެށުމަށް ހަމަޖެހިފައިވާ މި ބައްދަލުވުމަކީ ދުނިޔޭގެ މުހިންމު މައްސަލަތަކާއި، އދގެ މުހިއްމު އަމާޒުތަކާ ގުޅޭގޮތުން މަޝްވަރާކުރުމަށް ބާއްވާ މަތީ ފަންތީގެ ބައްދަލުވުމެކެވެ. ޝާހިދަކީ އދގެ އާއްމު މަޖިލީހުގެ 76 ވަނަ ދައުރުގެ ރައީސެވެ.
"އުންމީދުގެ ރިޔާސަތު" ގެ ނަމުގައި އެމަނިކުފާނު ކުރިއަށްގެންދެވި ދައުރުގައި، ކޮވިޑް-19 ގެ ބަލިމަޑުކަމުން އަރައިގަތުމަށާއި، މޫސުމީ ބަދަލުތަކާ ދެކޮޅަށް މަސައްކަތް ކުރުމުގެ އިތުރުން އދ. އިސްލާހުކުރުމަށް ގިނަ މަސައްކަތްތަކެއް ކުރެއްވި އެވެ. ވަކިން ހާއްސަކޮށް އަންހެނުންނާއި ޒުވާނުން ބާރުވެރިކުރުވުމަށާއި، ސިޔާސީ އަދި ޑިޕްލޮމެޓިކް ދާއިރާގައި އަންހެނުންނާއި ޒުވާނުންގެ ދައުރު ފުޅާކުރުމަށް އެމަނިކުފާނު ދެއްވި އަހައްމިއްޔަތުކަން ބައިނަލްއަގުވާމީ މުޖުތަމައުން ބަލައިގަނެފައިވެ އެވެ.
ކައުންސިލް އޮފް ދަ ޕްރެޒިޑެންޓްސް އޮފް ދަ ޖެނެރަލް އެސެމްބްލީއަކީ އދ. ގެ އާންމު މަޖިލީހުގެ ރައީސްކަން ކުރައްވާފައިވާ ބޭފުޅުންގެ ތަޖުރިބާގެ ބޭނުން ހިފުމަށް 1997 ވަނަ އަހަރު އުފެއްދި ކައުންސިލެކެވެ. މި ކައުންސިލުން މަސައްކަތް ކުރަނީ އދ. ގެ މަސައްކަތްތަކަށް، ވަކިން ޚާއްސަކޮށް އދގެ އާއްމު މަޖިލީހުގެ އެއިރެއްގައި ހުންނަވާ ރައީސަކަށް ލަފާދިނުމަށާއި، ދުނިޔޭގައި އުފެދޭ ބޮޑެތި ގޮންޖެހުންތަކަށް ހައްލު ހޯދުމުގައި އާންމު މަޖިލީހުގެ ދައުރު ހަރުދަނާ ކުރުމަށެވެ.
ޝާހިދަކީ މި ކައުންސިލްގެ މަސައްކަތްތަކުގައި ވަރަށް ހަރަކާތްތެރި މެންބަރެކެވެ. އެގޮތުން މިދިޔަ އަހަރު ސައުދީ އަރަބިއްޔާގެ ރިޔާޒާއި، ގަތަރުގެ ދޯހާ އަދި ސްލޮވާކިއާގެ ބްރަޓިސްލާވާގައި ބޭއްވި މި ކައުންސިލްގެ ބައްދަލުވުންތަކުގައި ވެސް އެމަނިކުފާނު ބައިވެރިވެވަޑައިގެން، ބައިނަލްއަގުވާމީ ސުލްހައާއި ތަރައްގީއަށް މުހިންމު ހިޔާލުތަކެއް ހުށަހަޅުއްވާފައިވެ އެވެ.
