އަމާޒަކަށް ވާންވީ ރައީސް މުއިއްޒު ބަލިކޮށް ވެރިކަމުން ދުރުކުރުން: މީކާއީލް
އެމްޑީޕީގެ އެތެރޭގެ އިންތިޚާބަށްފަހު ހުރިހާ މެންބަރުން އެކަތިގަނޑަކަށްވެ، ރައީސް މުޢިއްޒުގެ ސަރުކާރު ބަލިކޮށް ވެރިކަމުން ދުރުކުރުމަށް މަސައްކަތްކުރުމަށް މީކާއިލް އަހުމަދު ނަސީމް ގޮވާލައްވައިފި. މީގެ އިތުރުން، "އަދަދު" ނޫހުގެ ނޫސްވެރިންނަށް ސަރުކާރުން ބިރުދައްކައި ދަޢުވާކުރަން ފަށާފައިވާތީ އެކަމާ ކަންބޮޑުވުން ފާޅުކުރައްވައި، ޚިޔާލުފާޅުކުރުމުގެ މިނިވަންކަން ހަނިކުރަމުންދާ ދަނޑިވަޅެއްގައި ޑިމޮކްރަސީގެ ދިފާޢުގައި އެމްޑީޕީން ތެދުވަންޖެހޭކަމަށް އޭނާ ވިދާޅުވި.
ހޯމަ ދުވަހުގެ ރޭ ބޭއްވި "އިތުބާރު" ހަރުގެ ޖަލްސާ ގައި މީކާއިލް ވާހަކަދައްކަވަނީ | ރާއްޖެ އެމްވީ
އެމްޑީޕީގެ ހުރިހާ މެންބަރުންގެ ވެސް އަމާޒަކަށް ވާންވީ ރައީސް ޑރ. މުހައްމަދު މުއިއްޒުގެ ސަރުކާރު ބަލިކޮށް، އެމަނިކުފާނު ވެރިކަމުން ދުރުކުރުން ކަމަށް އެމްޑީޕީގެ ޗެއާޕާސަން ކަމަށް ވާދަކުރައްވާ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވިދާޅުވެއްޖެ އެވެ.
ހޯމަ ދުވަހުގެ ރޭ ބޭއްވި "އިތުބާރު" ހަރުގެ ޖަލްސާގައި ވާހަކަދައްކަވަމުން މީކާއިލް ވިދާޅުވީ، އެމްޑީޕީގެ މެންބަރުންގެ މައިގަނޑު މަގްސަދަކަށް ވާންވީ ރައީސް މުއިއްޒުގެ ސަރުކާރު ބަލިކަށިކޮށް، އެމަނިކުފާނު ވެރިކަމުން ދުރުކުރުން ކަމަށެވެ. އަދި ކުރިއަށް އޮތް އެތެރޭގެ އިންތިޚާބަކީ ވާދަވެރި އިންތިޚާބެއް ނަމަވެސް، އިންތިޚާބަށްފަހު ހުރިހާ މެންބަރުން ވެސް ވާދަވެރި ޓީމާއެކު އެއްބައެއްގެ ގޮތުގައި މަސައްކަތް ކުރަންޖެހޭނެ ކަމަށް އޭނާ ފާހަގަކުރެއްވި އެވެ.
އަޅުގަނޑުމެންގެ އަމާޒަކަށް ވާންވީ، ރައީސް މުޢިއްޒު ބަލިކުރުން. އަޅުގަނޑުމެންގެ އަމާޒަކަށް ވާންވީ، ރައީސް މުޢިއްޒުގެ ސަރުކާރު ބަލިކަށިކުރުން. އޭނާ ވެރިކަމުން ދުރުކުރުން. އެހެންވީމާ، މި އިންތިޚާބުގައި ވެސް އަޅުގަނޑު ހަމަ ތަކުރާރުކޮށް ދަންނަވާލަން. ތިބޭފުޅުން މީގެ އެއް މަސްދުވަސް ފަހުން އަނެއްކާވެސް މަސައްކަތްކުރައްވަންޖެހޭނީ އަޅުގަނޑުމެންގެ ވާދަވެރި ޓީމާއެކު. އަޅުގަނޑުމެންނަކީ އެއް ބައެއް.އެމްޑީޕީގެ ޗެއާޕާސަން ކަމަށް ވާދަކުރައްވާ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް
އޭނާ އިތުރަށް އިލްތިމާސްކުރެއްވީ މިއީ އެތެރޭގެ އިންތިޚާބެއްކަން ދަނެގެން، އިހުތިރާމާއި ލޯތްބާއެކު އިންތިޚާބުގެ ކަންކަން ކުރިއަށް ގެންދިއުމަށެވެ.
މީގެ އިތުރުން މީކާއިލް ވަނީ އަދަދު ނޫހުން ގެނެސްދިން ޑޮކިއުމެންޓްރީއާ ގުޅިގެން ސަރުކާރުން އަޅަމުންދާ ފިޔަވަޅުތަކާމެދު ކަންބޮޑުވުން ފާޅުކުރައްވާފަ އެވެ.
މީކާއިލް ވިދާޅުވީ އަދަދު ނޫހުގެ ހަތަރު ނޫސްވެރިޔަކަށް ސަރުކާރުން ދަނީ ދައުވާކުރަން ފަށަމުން ކަމަށެވެ. އަދަދު ނޫހުގެ ބައެއް ނޫސްވެރިންނަށް ރާއްޖެ އިން ފުރުން މަނާކޮށްފައިވާއިރު އެ ނޫހުގެ އޮފީސް ރޭޑުކޮށް އެކިއެކި އާލާތްތައް ފުލުހުންގެ ބެލުމުގެ ދަށަށް ގެންގޮސް މިހާރު ވަނީ ބިރުދެއްކުމުގެ ސިލްސިލާ އެއް ސަރުކާރުން ފަށާފައި ކަމަށް މީކާއިލް ވިދާޅުވި އެވެ.
އަދަދު ނޫހުގެ ހަތަރު ނޫސްވެރިޔަކަށް ސަރުކާރުން ދަނީ ދަޢުވާކުރަން ފަށަމުން. އަދަދު ނޫހުގެ ބައެއް ނޫސްވެރިންނަށް ރާއްޖެއިން ފުރުން މަނާކޮށްފައިވާއިރު، އެ ނޫހުގެ އޮފީސް ރޭޑުކޮށް، އެކިއެކި އާލާތްތައް ފުލުހުންނަށް ފުލުހުންގެ ބެލުމުގެ ދަށަށް ގެންގޮސް މިހާރު މި ވަނީ ބިރުދެއްކުމުގެ ސިލްސިލާ އެއް ސަރުކާރުން ފަށާފަ. ކްރިމިނަލް ކޯޓުން ހުރިހާ ދިވެހި ރައްޔިތުންގެ މައްޗަށް، ވަކި މީހެއް ނޫން، ހުރިހާ ދިވެހި ރައްޔިތުންގެ މައްޗަށް، ވަކި ވާހަކައެއް، ވަކި ގޮތަކަށް ނުދައްކަން އަމުރު ނެރެފައިވާ މި ދަނޑިވަޅުގައި އަޅުގަނޑު ހަމަ ހިތަށްއަރަނީ ވިސްނާލަން ރަނގަޅޭ އަޅުގަނޑުމެން މި ހިސާބަށް، މި ދަނޑިވަޅާ ހަމައަށް، މި ވަގުތާ ހަމައަށް އަޅުގަނޑުމެން އައީ ކިހިނެއްތޯ؟އެމްޑީޕީގެ ޗެއާޕާސަން ކަމަށް ވާދަކުރައްވާ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް
މީކާއިލް ވިދާޅުވީ ކްރިމިނަލް ކޯޓުން ވަކި ވާހަކައެއް ވަކި ގޮތަކަށް ނުދެއްކުމަށް އަމުރު ނެރެފައިވާ މި ދަނޑިވަޅުގައި، ރާއްޖޭގެ ޑިމޮކްރަސީ އާއި އިންސާނީ ހައްގުތަކުގެ ހާލަތާމެދު ވިސްނާލަން ޖެހޭ ކަމަށެވެ. އެމްޑީޕީ އުފެދުނީ އިންސާނީ ހައްގުތަކާއި، ޚިޔާލު ފާޅުކުރުމުގެ މިނިވަންކަމާއި ނޫސްވެރިކަމުގެ މިނިވަންކަން ކަށަވަރުކޮށްދޭން ކަމަށް އޭނާ ހަނދާންކޮށްދެއްވި އެވެ.
ވާހަކަ ނިންމަވާލަމުން މީކާއިލް ވިދާޅުވީ، އެމްޑީޕީ އަށް 20 އަހަރު ވެގެންދާއިރުވެސް، ގާނޫނުއަސާސީން ލިބިދޭ އެންމެ އަސާސީ ހައްގުތައް ސަރުކާރުން ނިގުޅައިގަންނާތީ އަނެއްކާވެސް އެ ވާހަކަތައް ދައްކަން ޖެހުމަކީ ހިތާމަހުރި ކަމެއް ކަމަށެވެ.
