ޕާކިސްތާނުގެ އަސްކަރީ ކޯޓުތަކުގައި އާންމުންގެ ޝަރީއަތްތައް ހިންގުން ހުއްޓާލުމަށް އެމްނެސްޓީން ގޮވާލައިފި

ޕާކިސްތާނުގައި އާންމު ރައްޔިތުންގެ މައްސަލަތައް އަސްކަރީ ކޯޓު ތަކުގައި ބެލުން ހުއްޓާލުމަށް ބައިނަލްއަގުވާމީ އިންސާނީ ހައްގު ތަކަށް މަސައްކަތްކުރާ ޖަމިއްޔާ، އެމްނެސްޓީ އިންޓަނޭޝަނަލުން ގޮވާލައިފި އެވެ.

އެ ޖަމިއްޔާ އިން ބުނެފައި ވަނީ އާންމުންގެ މައްޗަށް އަސްކަރީ ކޯޓު ތަކުގައި ޝަރީއަތް ހިންގުމަކީ ބައިނަލްއަގުވާމީ ގާނޫނު ތަކާއި، އިންސާނީ ހައްގުތަކާ ހިލާފު ކަމެއް ކަމަށާއި، މީގެ ސަބަބުން އިންސާފުވެރި ޝަރީއަތެއް ލިބުމުގެ ހައްގު ގެއްލިގެންދާ ކަމަށެވެ. އެމްނެސްޓީ އިން މިކަމަށް ގޮވާލާފައި ވަނީ ޕާކިސްތާނުގެ ސުޕްރީމް ކޯޓުން، އާންމުންގެ މައްޗަށް އަސްކަރީ ކޯޓު ތަކުގައި ޝަރީއަތް ހިންގިދާނެ ކަމަށް ނިންމި ނިންމުމަށް އެއް އަހަރު ފުރުމާ ދިމާކޮށް ނެރުނު ބަޔާނެއްގަ އެވެ.

އެ ޖަމިއްޔާ އިން ފާހަގަކުރި ގޮތުގައި އަސްކަރީ ކޯޓު ތަކަކީ ސިއްރިއްޔާތުގައި ޝަރީއަތްތައް ހިންގާ ތަންތަނަށް ވުމުން، އެ ކޯޓު ތަކުން މިނިވަން އަދި މުސްތަގިއްލު ނިންމުން ތަކެއް ނިންމޭނެ ކަމުގެ ޔަގީން ކަމެއް ނޯވެ އެވެ. އަދި މިފަދަ ކޯޓު ތަކުން ކުރާ ހުކުމްތައް އިސްތިއުނާފު ކުރުމުގެ ފުރުސަތު އާންމުންނަށް ނުލިބޭކަން ވެސް އެމްނެސްޓީ އިން ވަނީ ފާހަގަ ކޮށްފަ އެވެ.

މި މައްސަލަ ބޮޑު ވެފައި ވަނީ 2023 ވަނަ އަހަރުގެ މެއި މަހު ޕާކިސްތާނުގެ ކުރީގެ ބޮޑުވަޒީރު އިމްރާން ޚާން ހައްޔަރު ކުރުމާ ގުޅިގެން ހިނގި ހަމަނުޖެހުން ތަކުގައި ބައިވެރިވި އާންމުންގެ މައްސަލަތައް އަސްކަރީ ކޯޓު ތަކުން ބަލަން ފެށުމުންނެވެ. އެމްނެސްޓީ އިންޓަނޭޝަނަލް އިން ވަނީ މިހާތަނަށް އަސްކަރީ ކޯޓު ތަކުން ކޮށްފައިވާ އާންމުންގެ ހުކުމްތައް ބާތިލު ކުރުމަށާއި، ހުރިހާ މައްސަލަތަކެއް ވެސް އާންމު މަދަނީ ކޯޓު ތަކަށް ބަދަލު ކުރުމަށް ޕާކިސްތާނު ސަރުކާރަށް ގޮވާލާފަ އެވެ.