ޕާކިސްތާންގައި މަޝްވަރާތައް ކުރިއަށް ދާނެ ކަމުގެ ޔަޤީންކަން އެމެރިކާ އިން ދީފި

އެމެރިކާ އާއި އީރާންއާ ދެމެދު ޤާއިމު ކުރުމަށް މަސައްކަތް ކުރާ ސުލްޙައިގެ އެއްބަސްވުމާ ގުޅޭ ގޮތުން ޕާކިސްތާންގައި ބޭއްވުމަށް ހަމަޖެހިފައިވާ މަޝްވަރާތައް ކުރިއަށް ދާނެ ކަމުގެ ފުރިހަމަ އިތުބާރު އެމެރިކާ އިން ފާޅު ކޮށްފި އެވެ. 

އީރާން ސަރުކާރުގެ އިސް އޮފިޝަލަކު ވިދާޅުވީ، މި މަޝްވަރާ ތަކުގައި ބައިވެރިވުމާ މެދު އީރާން އިން ވިސްނަމުން އަންނަ ކަމަށެވެ. ނަމަވެސް، ހަނގުރާމަ ހުއްޓާލުމަށް އެއްބަސްވެފައިވާ މުއްދަތު ހަމަވާން ކައިރިވެފައިވާއިރު، މި މަޝްވަރާ ތަކަށް އަދިވެސް ބޮޑެތި ހުރަސްތަކާއި ނޭނގުން ތަކެއް ކުރިމަތިވެފައިވާކަން ފާހަގަ ކޮށްފައިވެ އެވެ. 

އެމެރިކާގެ ރައީސް ޑޮނަލްޑް ޓްރަމްޕް ބޭނުންފުޅު ވަނީ ދުނިޔޭގެ ބާޒާރުގައި ތެލުގެ އަގު އުފުލުމާއި، ހިއްސާގެ ބާޒާރަށް އަތުވެދާނެ ލޮޅުން ތަކުން ސަލާމަތްވުމަށްޓަކައި އެއްބަސްވުމަކަށް އައުމަށެވެ. އެހެން ނަމަވެސް، ނިއުކްލިއާ ހަތިޔާރު އުފެއްދުމުގެ އެއްވެސް ފުރުސަތެއް އީރާން އަށް ލިބިގެން ނުވާނެ ކަމަށް ވެސް ޓްރަމްޕް ގެންދަވަނީ ފާޅުގައި ވިދާޅުވަމުންނެވެ. 

މި މައްސަލައިގައި އީރާން އިން އުންމީދު ކުރަނީ ހޮރްމޫޒް ކަނޑު އޮޅީގެ މައްޗަށް އެ ޤައުމަށް އޮތް ބާރުގެ ބޭނުން ހިފައިގެން، އަލުން ހަނގުރާމައެއް ފެށުން ހުއްޓުވައި، އެ ޤައުމާ ދެކޮޅަށް އަޅާފައިވާ ދަތި ކުރުމުގެ ފިޔަވަޅު ތަކަށް ލިޔެއް ހޯދުމެވެ. އެހެން ނަމަވެސް، އެ ޤައުމުގެ ނިއުކްލިއާ ޕްރޮގްރާމް އަށް ހުރަސް އެޅޭ ފަދަ އެއްވެސް ކަމަކަށް އެއްބަސްނުވުމަކީ އީރާންގެ އަމާޒެކެވެ. 

ރޮއިޓާސް ނިއުސް އެޖެންސީއާ ވާހަކަ ދެއްކެވި އީރާންގެ އިސް އޮފިޝަލަކު ވިދާޅުވީ، ކުރިން މި މަޝްވަރާ ތަކުގައި ބައިވެރި ނުވާނެ ކަމަށް ބުނި ނަމަވެސް، މިހާރު އެ ނިންމުން ބަދަލުކޮށް މަޝްވަރާ ތަކުގައި ބައިވެރިވުމާ މެދު "ޕޮޒިޓިވްކޮށް" ވިސްނަމުންދާ ކަމަށެވެ. އެހެން ނަމަވެސް، މިކަމުގައި އަދި ވަކި ނިންމުމެއް ނިންމާފައި ނުވާ ކަމަށް ފާހަގަ ކޮށްފައިވެ އެވެ.

މި މަޝްވަރާ ތަކުގައު ބައިވެރިވާ ޕާކިސްތާންގެ މަސްދަރަކުން މައުލޫމާތު ދިން ގޮތުގައި، ބުދަ ދުވަހު މަޝްވަރާތައް އަލުން ފެށުމަށް ބޭނުންވާ މާހައުލު މިހާރު ވަނީ ތަނަވަސްވެފަ އެވެ. އަދި އެއްބަސްވުމުގައި ސޮއި ކުރާ ހިސާބަށް ކަންކަން ގޮސްފި ނަމަ، އެމެރިކާގެ ރައީސް ޑޮނަލްޑް ޓްރަމްޕް ސީދާ އެ ތަނަށް ވަޑައިގެން، ނުވަތަ ވީޑިއޯ ކޮންފަރެންސް މެދުވެރިކޮށް ބައިވެރިވެ ވަޑައިގެންނެވުމަކީ އެކަށީގެންވާ ކަމެއް ކަމަށް ވެސް މަސްދަރު ތަކުން ވަނީ ބުނެފަ އެވެ. 

ނަން ހާމަ ނުކުރަން އެދި، އިތުރު މަސްދަރަކުން އަންގާރަ ދުވަހު ބުނެފައި ވަނީ ކަންކަން ކުރިއަށް ދަނީ ރަނގަޅު މިސްރާބެއްގައި ކަމަށާއި، ބުދަ ދުވަހު ބޭއްވުމަށް ހަމަޖެހިފައިވާ މަޝްވަރާތައް ތާވަލްއާ އެއްގޮތަށް ކުރިއަށް ދާނެ ކަމުގެ ނިޝާންތައް ފެންނަމުންދާ ކަމަށެވެ.