ތިން އިންތިޚާބާ ގުޅޭގޮތުން 170 މައްސަލަ ހުށަހަޅާފައިވޭ، ކޮމިޝަންގެ ޖަވާބާ މެދު ހިތްހަމަ ނުޖެހޭނަމަ ކޯޓަށް ދެވޭނެ: ޒާހިދު
އޭޕްރީލް މަހު ބޭއްވި އިންތިޚާބުތަކުގައި ވޯޓުލުމުގެ ހައްގު ލިބިފައިވާ މީހުންގެ ތެރެއިން 215،346 މީހުން ވޯޓުލާފައިވާއިރު، މިއީ މިފަދަ އިންތިޚާބެއްގައި އެންމެ ގިނަ ބަޔަކު ވޯޓުލީ ފަހަރު. މި އިންތިޚާބާ ގުޅޭގޮތުން ޖުމުލަ 170 ޝަކުވާ ހުށަހަޅާފައިވާއިރު، ކޮމިޝަނުން ދޭ ޖަވާބާ މެދު ހިތްހަމަނުޖެހޭ ނަމަ 14 ދުވަހުގެ ތެރޭގައި ހައިކޯޓަށް މައްސަލަ ހުށަހެޅުމުގެ ފުރުސަތު އޮންނާނެ ކަމަށް ކޮމިޝަންގެ ރައީސް ޒާހިދު ވިދާޅުވެފައިވޭ.
އިންތިޚާބުތަކާ ގުޅޭގޮތުން އިލެކްޝަންސް ކޮމިޝަން (އީސީ) ގެ ރައީސް މުހައްމަދު ޒާހިދު ވާހަކަ ދައްކަވަނީ. | ރާއްޖެއެމްވީ
އޭޕްރީލް މަހުގެ 4 ވަނަ ދުވަހު ކުރިއަށް ގެންދިޔަ 3 އިންތިޚާބާ ގުޅޭގޮތުން 170 މައްސަލަ ހުށަހަޅާފައިވާ ކަަމަށް އިލެކްޝަންސް ކޮމިޝަން (އީސީ) ގެ ރައީސް މުހައްމަދު ޒާހިދު ވިދާޅުވެއްޖެ އެވެ.
ލޯކަލް ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބު އަދި ރައްޔިތުންގެ ޚިޔާލު ހޯދުމުގެ ޢާންމު ވޯޓު 2026 ގެ މަސައްކަތްތަކާ ގުޅޭގޮތުން ހޮނިހިރު ދުވަހު މީޑީއާތަކަށް ދެއްވި އިންޓަވިޔުއެއްގައި ޒާހިދު ވިދާޅުވީ 294876 ވޯޓު ލުމުގެ ހައްގު ލިބިގެން ދިޔައިރު 215346 ފަރުދީ ޒިންމާ އަދާކޮށްފައިވާ ކަމަށެވެ. މިއީ ލޯކަލް ކައުންސިލްގެ އިންތިޚާބާއި އަންހެނުންގެ ތަރައްގީ އަށް މަސައްކަތްކުރާ ކޮމިޓީގެ އިންތިޚާބެއްގައި އެންމެ ގިނައިން އަދަދެއްގެ ބަޔަކު ވޯޓުލުމަށް ނުކުތް ފަހަރު ކަމަށް އޭނާ ވިދާޅުވި އެވެ.
އެހެން އިންތިޚާބުތަކެކޭވެސް އެއްގޮތަށް މި ފަހަރުވެސް އިންތިޚާބު އޮބްޒާވް ކުރުމަށްޓަކައި ލޯކަލް އޮބްޒާވަރުންގެ ގޮތުގައި 1626 ފަރާތަކާއި، ބައިނަލްއަގުވާމީ އޮބްޒާވަރުންގެ ގޮތުގައި 38 ފަރާތަކާއި، ކެންޑިޑޭޓުންގެ މަންދޫބުންގެ ގޮތުގައި 4021 ފަރާތަކާއި، އިންތިޚާބު ކަންކަން މޮނިޓަރކުރެއްވުމަށްޓަކައި 3275 ފަރާތެއް ދިވެހިރާއްޖޭގެ އެކި ކަންކޮޅުތަކުގައި ހަރަކާތްތެރިވެފައިވޭ. އެހެންކަމުން، އޮބްޒާވަރުންނާއި މޮނިޓަރުން އިންތިޚާބުގެ އެކި މަރުހަލާތަކުގައި އަދާކުރެވޭ މުހިންމު މަސްއޫލިއްޔަތަށް މަރުހަބާއެކު އަޅުގަނޑު އިޚްލާސްތެރިކަމާއެކު ޝުކުރު ދަންނަވަން.އިލެކްޝަންސް ކޮމިޝަން (އީސީ) ގެ ރައީސް މުހައްމަދު ޒާހިދު
މި އިންތިޚާބުތަކަކީ މިނިވަންކަމާއި އިންސާފުވެރިކަމާއެކު ކުރިއަށް ގެންގޮސްފައިވާ އިންތިޚާބު ތަކެއްކަން ފާހަގަކުރައްވައި ޒާހިދު ވިދާޅުވީ އިންތިޚާބުތަކުގެ ޝަކުވާއެއްގެ ގޮތުގައި ޖުމުލަ 170 ޝަކުވާ ގައުމީ ކޮމްޕްލަޔަންސް ބިއުރޯއަށް ލިބިފައިވާ ކަމަށާއި، ގާނޫނީ ގޮތުން ބަލަންޖެހޭ ކަންކަން ބެލުމަށްފަހު، މި ޝަކުވާތަކަށް ޖަވާބުދިނުމުގެ މަސައްކަތް މިހާރުވެސް ކުރިއަށްދާ ކަމަށެވެ.
ޒާހިދު ވިދާޅުވީ އިންތިޚާބާ ގުޅިގެން، ގައުމީ ކޮމްޕްލަޔަންސް ބިއުރޯއަށް ހުށަހަޅާފައިވާ ޝަކުވާތަކާ ގުޅިގެން، މި ކޮމިޝަނުން ދޭ ޖަވާބަކާ މެދު ހިތްހަމަނުޖެހޭ ކަމުގައި ވަނީ ނަމަ، އެ މައްސަލައެއް ދިވެހިރާއްޖޭގެ ހައިކޯޓަށް ހުށަހެޅުމުގެ ތހައްގު ކޮންމެ މީހަކަށް ވެސް ލިބޭ ކަމަށެވެ.
އެގޮތުން މައްސަލަތައް މިއަދުން ފެށިގެން 14 ދުވަހުގެ މުއްދަތެއްގެ ތެރޭގައި ދިވެހިރާއްޖޭގެ ހައިކޯޓަށް ހުށަހެޅޭނެ ކަމަށް ޒާހިދު ވިދާޅުވި އެވެ.
މިމޭރުމުން ޒާހިދު ވާހަކަ ދެއްކެވި ނަމަވެސް 3 އިންތިޚާބުގެ ކުރިން ވެސް ގިނަ މައްސަލަތައް ފާހަގަކޮށް އެމްޑީޕީ އިން ވެސް މައްސަލަ އީސީގެ އިތުރުން އެންޓި ކޮރްޕްޝަން ކޮމިޝަނަށް (އޭސީސީ) އަށް ހުށަހަޅާފައިވެ އެވެ. ނަމަވެސް އެއްވެސް މައްސަލައެއް ނުބަލާ ކަމަށާއި، މި ދެކޮމިޝަނަށް ވެސް ސަރުކާރުގެ ނުފޫޒު ވަރަށް ބޮޑަށް ފޯރުވާފައިވާ ކަމަށް ތުހުމަތު ކޮށްފައިވެ އެވެ.
