ދިވެހި ރުފިޔާގެ އަގު ހިފެހެއްޓޭނީ އެމްއެމްއޭ މިނިވަންކޮށް އޮވެގެން: ކުރީގެ އިޤްތިސޯދީ ވަޒީރު, އަޙްމަދު މުޙައްމަދު
އެމްއެމްއޭގެ މިނިވަންކަން ގެއްލި ސިޔާސީ ނުފޫޒު ވަނުމަކީ ދިވެހި ރުފިޔާގެ އަގު ހިފެހެއްޓުމަށާއި އިޤުތިޞާދީ ހަމަޖެހުމަށް އޮތް ބޮޑު ނުރައްކަލެއްކަމަށް ކުރީގެ އިކޮނޮމިކް މިނިސްޓަރު އަޙްމަދު މުޙައްމަދު ވިދާޅުވެއްޖެއެވެ. ޚާއްޞަކޮށް މަރުކަޒީ ބޭންކުގެ ބޯޑަށް ސަރުކާރުގެ އޮފިޝަލުން އިތުރުކުރުމަކީ މާލީ ސިޔާސަތުތަކަށް އޮތް ގޮންޖެހުމެއްކަން ފާހަގަކުރައްވައި، މުއައްސަސާގެ އިތުބާރު ދެމެހެއްޓުމަށްޓަކައި މަޤާމުގެ ރައްކާތެރިކަމާއި މިނިވަންކަން ކަށަވަރުކުރުން މުހިންމެވެ. އެހެންކަމުން، ކުރު މުއްދަތުގެ ސިޔާސީ ބޭނުންތަކަށްވުރެ އިޤުތިޞާދީ ދިގު މުއްދަތުގެ މަސްލަހަތަށް އިސްކަންދިނުމަށް އޭނާ ވަނީ ގޮވާލައްވާފައެވެ.
މޯލްޑިވްސް މަނިޓަރީ އޮތޯރިޓީ | ސޯޝަލްމީޑިއާ
މާލެ، ދިވެހިރާއްޖެ – ރާއްޖޭގެ އިޤުތިޞާދަށް ބޮޑެތި ގޮންޖެހުންތަކެއް ކުރިމަތިވެފައިވާ މި ދަނޑިވަޅުގައި، ދިވެހި ރުފިޔާގެ އަގު ހިފެހެއްޓުމަށާއި އިޤުތިޞާދީ ހަމަޖެހުން ޤާއިމުކުރުމަށްޓަކައި މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ މިނިވަންކަން ކަށަވަރުކުރުން ވަރަށް މުހިންމު ކަމަށް ކުރީގެ އިކޮނޮމިކް މިނިސްޓަރު އަދި ކުރީގެ ހައިކޮމިޝަނަރު އަޙްމަދު މުޙައްމަދު ވިދާޅުވެއްޖެއެވެ.
"މޯލްޑިވްސް އިކޮނޮމީ" މަޖައްލާގައި ލިޔުއްވި އާޓިކަލެއްގައި އަޙްމަދު މުޙައްމަދު ފާހަގަކުރެއްވި ގޮތުގައި، ރާއްޖެ ފަދަ އިމްޕޯޓަށް ބަރޯސާވާ އަދި ބޭރު ފައިސާ ހޯދުމަށް މައިގަނޑު ގޮތެއްގައި ފަތުރުވެރިކަމަށް ބަރޯސާވާ ޤައުމެއްގައި، ރުފިޔާއާމެދު އޮންނަ އިތުބާރު ގުޅިފައިވަނީ މަރުކަޒީ ބޭންކުގެ އިތުބާރާއެވެ. ނަމަވެސް، ފަހަކަށް އައިސް ހިނގަމުންދާ ކަންކަމުގެ ސަބަބުން އެމްއެމްއޭގެ މިނިވަންކަމާމެދު ވަނީ ސުވާލު އުފެދިފައެވެ.
ސިޔާސީ ނުފޫޒާއި މަޤާމުގެ ބިރުވެރިކަން
މަރުކަޒީ ބޭންކެއްގެ މިނިވަންކަން ބިނާވެފައި އޮންނަ އެންމެ މުހިންމު އެއް ތަނބަކީ އެތަނުގެ އިސްވެރިންނަށް ސިޔާސީ ބިރުވެރިކަމެއް ނެތި މަސައްކަތްކުރެވޭނެ މާޙައުލެއް އޮތުންކަން ފާހަގަކުރައްވަމުން، ދާދި ފަހުން ރާއްޖޭގައި ހިނގި ކަންކަމަށް އޭނާ އަލިއަޅުއްވާލެއްވިއެވެ:
- ޖުލައި 2024: ސަރުކާރުގެ އިޤުތިޞާދީ އެޖެންޑާއަށް އެއްބާރުލުން ނުދޭކަމަށް ބުނެ، ރައްޔިތުންގެ މަޖިލީހުން ވަނީ އެމްއެމްއޭގެ އޭރުގެ ގަވަރުނަރު ޢަލީ ހާޝިމް މަޤާމުން ވަކިކޮށްފައެވެ.
- ކުރީކޮޅު 2025: މަޖިލީހުގެ މާލިއްޔަތު ކޮމިޓީން ޑެޕިއުޓީ ގަވަރުނަރު އަޙްމަދު އިމާދު މަޤާމުން ވަކިކުރުމުގެ މަސައްކަތް ފެށުމާއެކު، މުއައްސަސާގެ މިނިވަންކަން ގެއްލެމުންދާކަން ފާހަގަކުރައްވައި އޭނާ ވަނީ މަޤާމުން އިސްތިއުފާ ދެއްވާފައެވެ.
އަޙްމަދު މުޙައްމަދު ވިދާޅުވީ، ޤާނޫނުގައި މަރުކަޒީ ބޭންކުގެ މިނިވަންކަން ލިޔެވިފައި އޮތް ނަމަވެސް، އިސްވެރިންގެ މަޤާމުގެ ޔަޤީންކަން ނެތިދާނަމަ، މުއައްސަސާގެ އިތުބާރު ގެއްލިގެންދާނެ ކަމަށެވެ.
ސަރުކާރުގެ ދަރަންޏާއި ބޯޑަށް ގެނައި ބަދަލު
ތަރައްޤީވަމުން އަންނަ ޤައުމުތަކުގައި މަރުކަޒީ ބޭންކުތަކަށް ދިމާވާ އެންމެ ބޮޑު ނުރައްކަލަކީ ސަރުކާރުގެ ޚަރަދުތައް ހަމަޖެއްސުމަށް ބޭންކަށް ނުފޫޒު ފޯރުވުން (ފިސްކަލް ޑޮމިނެންސް) ކަމަށް އޭނާ ވިދާޅުވިއެވެ. ރާއްޖޭގެ މާލީ ޙާލަތު ދަށްވެފައިވާ މި ދަނޑިވަޅުގައި، ކުރު މުއްދަތުގެ ސިޔާސީ ބޭނުންތަކަށް އެމްއެމްއޭ ބޭނުންކުރުމުގެ ފުރުޞަތު ބޮޑުކަން އޭނާ ފާހަގަކުރެއްވިއެވެ.
މީގެ އިތުރުން، އެމްއެމްއޭގެ ބޯޑުގައި ތިއްބަވާ ޕްރައިވެޓް ސެކްޓަރގެ މެމްބަރުން ވަކިކޮށް، ސަރުކާރުގެ އިސް އޮފިޝަލުން ބޯޑަށް ޢައްޔަންކުރުމަކީ މަރުކަޒީ ބޭންކުގެ މިނިވަންކަމާމެދު ސުވާލު އުފެދޭނެ ކަމެއްކަން ވެސް ލިޔުމުގައި ފާހަގަކޮށްފައިވެއެވެ. ބޯޑުގައި ސަރުކާރަށް ނިސްބަތްވާ މެމްބަރުން ގިނަވުމުން، ސަރުކާރުގެ މާލީ ސިޔާސަތުތަކާއި މަރުކަޒީ ބޭންކުގެ ސިޔާސަތުތައް މަސްހުނިވުމުގެ ބިރު އެބައޮތެވެ.
ރުފިޔާގެ މުސްތަޤުބަލަށް އޮތް ނުރައްކާ
ރާއްޖެއަކީ ބޭރު ފައިސާގެ ތަދުކަން (ސްޓްރަކްޗަރަލް ފޮރިން އެކްސްޗޭންޖް ގެޕް) އަބަދުވެސް އޮންނަ ޤައުމެއްކަން ފާހަގަކުރައްވަމުން އަޙްމަދު މުޙައްމަދު ވިދާޅުވީ، ފަތުރުވެރިކަން ކިތަންމެ ރަނގަޅުވި ނަމަވެސް، އިމްޕޯޓަށާއި ބޭރުގެ ދަރަނި ދެއްކުމަށް ބޮޑު ހޭދައެއް ކުރަންޖެހޭ ކަމަށެވެ.
"އިންވެސްޓަރުންނަށް ނުވަތަ ބާޒާރަށް، އެމްއެމްއޭގެ ނިންމުންތަކަކީ ކުރު މުއްދަތުގެ ސިޔާސީ ފިއްތުންތަކެއްގެ ދަށުން ނިންމާ ނިންމުންތަކެއްކަން ޤަބޫލުކުރެވެން ފަށައިފިނަމަ، ދިވެހި ރުފިޔާއާމެދު އޮންނަ އިތުބާރު ވަރަށް އަވަހަށް ގެއްލިގެންދާނެ،" އޭނާ ވިދާޅުވިއެވެ.
އާރޓިކަލް ނިންމަވާލައްވަމުން އަޙްމަދު މުޙައްމަދު ވިދާޅުވީ، އެމްއެމްއޭގެ މިނިވަންކަން ރައްކާތެރިކުރުމަކީ އެ މުއައްސަސާ ޖަވާބުދާރީވުމުން ސަލާމަތްކުރުން ނޫން ކަމަށާއި، އެއީ ދިވެހި ރުފިޔާގެ ދިގު މުއްދަތުގެ ހަމަޖެހުމާއި ރާއްޖޭގެ އިޤުތިޞާދުގެ އިތުބާރު ހިފެހެއްޓުމަށް ކޮންމެހެން ކުރަންޖެހޭ ކަމެއް ކަމަށެވެ.
މިއަރޓިކަލް ނަގާފައި މި ވަނީ :
މަސްދަރު: maldiveseconomy.mv
