ފީފާއިން ހޮވާ ދުނިޔޭގެ އެންމެ މޮޅު ކުޅުންތެރިޔާއަށް ވާދަކުރާ ތިން ކުޅުންތެރިން އިއުލާނު ކޮށްފިއެވެ.

ފީފާއިން ވަނީ މީގެކުރިން މި އެވޯޑަށް ވާދަ ކުރާ 23 ކުޅުންތެރިންގެ ލިސްޓެެއް އިއުލާނު ކޮށްފައެވެ. އެހެނަސް ހުކުރު ދުވަހު އެ އިދާރާއިން އިއުލާނު ކޮށްފައިވަނީ މި 23 ކުޅުންތެރިންގެ ތެރެއިން މި އެވޯޑަށް ވާދަކުރާ ފައިނަލް ތިން ކުޅުންތެރިންނެވެ.

މިއަހަރުގެ އެވޯޑަށް ވެސް ވާދަކުރަނީ 2015 ވަނަ އަހަރުވެސް މި އެވޯޑަށް ވާދަކުރި ތިން ކުޅުންތެރިންނެވެ. އެގޮތުން މިދިޔަ އަހަރުވެސް މި އެވޯޑު ކާމިޔާބު ކުރި ރެއާލް މެޑްރިޑްގެ ތަރި ކްރިސްޓިއާނޯ ރޮނާލްޑޯއާއި ބާސެލޯނާ އަދި އާޖެންޓީނާގެ ތަރި ލިއޮނެލް މެސީގެ އިތުރުން ނޮމިނޭޓްވެފައި ވަނީ ހަމަ އެ ޓީމަށް މިދިޔަ ސީޒަނުގައި ކުޅުނު ނޭމާއެވެ.

ރިޕޯޓުތައް ބުނާގޮތުން މި އަހަރު ވެސް މި އެވޯޑު ހޯދާނީ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯއެވެ. އޭނާވަނީ މިދިޔަ ސީޒަނުގައި ރެއާލްއާއެކު ސްޕެނިޝް ލަލީގާ އަދި ޔުއެފާ ޗެމްޕިއަންސް ލީގު ކާމިޔާބުކޮށްފައެވެ. އޭނާއާ ވާދަކުރާ ދެ ކުޅުންތެރިން ކަމަށްވާ ނޭމާ އަދި މެސީއަށް ކާމިޔާބު ކުރެވިފައިވަނީ ސްޕެނިޝް ކޮޕާ ޑެލްރޭއެވެ.

ފީފާއިން ވަނީ ދުނިޔޭގެ އެންމެ މޮޅު ގޯލްކީޕަރަށް ވާދަކުރާ ކުޅުންތެރިން ވެސް އިއުލާނު ކޮށްފައެވެ. އެގޮތުން މި އެވޯޑަށް މިފަހަރު ވާދަކުރާނީ ބަޔާން މިއުނިކްގެ މެނުއެލް ނޯޔާ އާއި ޖުވެންޓަސްގެ ޖިއަންލުއީޖީ ބުފަންގެ އިތުރުން ރެއާލް މެޑްރިޑްގެ ކޭލާ ނަވާސްއެވެ.

ފީފާއިން ވަނީ އެންމެ މޮޅު އަންހެން ކުޅުންތެރިޔާއަށް ވާދަކުރާ ކުޅުންތެރިން ވެސް އިއުލާނު ކޮށްފައެވެ. މިއަހަރު މި އެވޯޑަށް ވާދަކުރަނީ އެމެރިކާގެ ކާލީ ލިއޮޑްއާއި ވެނެޒުއޭލާގެ ޑޭނާ ކަސްޓަލޯނާސްގެ އިތުރުން ބާސާ އަދި ނެދަލޭންޑްސްގެ ލިއެކޭ މާޓިންސްއެވެ.

ފީފާގެ އެންމެ މޮޅު ކޯޗުގެ މަގާމަށް ވާދަ ކުރަނީ ރެއާލްއަށް ޗެމްޕިއަންސް ލީގު އަދި ލަލީގާ ކާމިޔާބު ކޮށްދިން ޒައިނުއްދީން ޒިދާންއާއި ޖުވެންޓަސްއަށް އިޓަލީގެ ލީގާއި ކޮޕާ ޑެ އިޓާލިއާ ކާމިޔާބު ކޮށްދިން މަސިމޯ އަލެގްރީގެ އިތުރުން ޗެލްސީއަށް ޕްރިމިއާ ލީގު ކާމިޔާބު ކޮށްދިން އެންޓޯނިއޯ ކޮންޓޭއެވެ.

މި އެވޯޑުތަކަށް ހޮވޭ ފަރާތްތަށް އިއުލާނު ކުރެވިގެން ދާނީ އޮކްޓޯބަރު މަހުގެ 23 ވަނަ ދުވަހު ލަންޑަންގައި ބޭއްވޭ ހަފްލާއެއްގައެވެ.