ފީފާ ވޯލްޑް ރޭންކިން:ރާއްޖެ އަށް ބޮޑު ވެއްޓުމެއް، އިންޑިއާ އަށް 31 ދަރަޖައިގެ ކުރިއެރުމެއް

ފީފާ ކޮކާކޯލާ ރޭންކިންގްގައި ދިވެހި ރާއްޖެ 11 ދަރަޖަ ފަހަތަށް ވެއްޓުނުއިރު، އިންޑިއާ 31 ދަރަޖައިގެ ކުރިއެރުމެއް ހޯދައިފި އެވެ.

ބުރާސްފަތި ދުވަހު ނެރުނު ފީފާ ރޭންކިންގްގައި ރާއްޖެއަށް 151 ވަނައިގައި އޮތް އިރު، އިންޑިއާ ވަނީ 101 ވަނަ އަށް ޖެހިލާފައެވެ.

އިންޑިއާގެ މި ކުރިއެރުމަކީ އެގައުމުގެ ފުޓުބޯޅަ ތާރީހުގައި ފަހަކަށް އައިސް ހޯދި އެންމެ ބޮޑު އެއް ކާމިޔާބީއެވެ. އިންޑިއާ ދުނިޔޭގެ ރޭންކިންގައި އެންމެ އުހަށް ގޮސްފައިވަނީ 1996 ވަނަ އަހަރެވެ. އެފަހަރު އެގައުމު ވަނީ ދުނިޔޭގެ 94 ވަނަ މަގާމު ހޯދާފައެވެ.

ރޭންކިންގައި ރާއްޖެ 11 ދަރަޖަ ފަހަތަށް ވެއްޓިފައިވާއިރު، އޭޝިއާ ސަރަހައްދުގައި ރާއްޖެއަށް ލިބިފައިވަނީ 27 ވަނަ އެވެ. އެހެންނަމަވެސް އިންޑިއާ ވަނީ އެގައުމު ހޯދި ބޮޑު ކުރިއެރުމާއެކު އޭޝިއާގެ 11 ވަނަ މަގާމަށް ޖެހިލާފައެވެ.

ސަރަހައްދުގެ އެއްވަނަ އިންޑިއާ އަށް ލިބުނުއިރު، ދެވަނަ ލިބުނީ ރާއްޖެއަށެވެ. ތިންވަނަ ލިބުނީ ދުނިޔޭގެ 164 ވަނައިގައި އޮތް ބޫޓާނަށެވެ. އެޓީމު ވަނީ ރޭންކިންގައި 13 ދަރަޖައިގެ ކުރިއެރުމެއް ހޯދާފައެވެ. ހަތަރުވަނަ 170 ވަނައާ އެކު ނޭޕާލްއަށް ލިބުނުއިރު، ފަސްވަނަ ލިބުނީ ފަސްވަނަ ލިބުނީ 193 ވަނައާއެކު ބަންގްލަދޭޝްއަށެވެ. ހަވަނަ 197 ވަނައާއެކު ސްރީލަންކާއަށް ލިބިފައިވާއިރު، 201 ވަނައާއެކު ފުލަށް ގޮސްފައިވަނީ ޕާކިސްތާނެވެ.

ދުނިޔޭގެ ރޭންކިންގެ އެއްވަނަ އާޖެންޓީނާއަށް ގެއްލިފައިވާއިރު، ބްރެޒިލް ވަނީ އެމަގާމު ހޯދާފައެވެ. އެގޮތުން ދެވަނަ އާޖެންޓީނާ އަށް ލިބިފައިވާއިރު، ތިންވަނަ ލިބިފައިވަނީ ޖަރުމަނަށެވެ.