ޖަަރުމަނުގައި ތިބި އެމެރިކާގެ ސިފައިން ބާލަން ޓްރަމްޕް ނިންމުނުން، ރިޕަބްލިކަން ޕާޓީގެ މެމްބަރުން ކަންބޮޑުވެއްޖެ

ނޭޓޯ އިއްތިހާދުގެ މެމްބަރު ޤައުމެއް ކަމަށްވާ ޖަރުމަނުގައި ތިބި އެމެރިކާގެ 5000 ސިފައިން ބޭލުމަށް އެމެރިކާގެ ޕެންޓަގަން އިން ނިންމުމާ ގުޅިގެން، ވެރިކަން ކުރާ ރިޕަބްލިކަން ޕާޓީގެ އިސް ދެ މެމްބަަރަކު ކަންބޮޑުވުން ފާޅު ކޮށްފި އެވެ. 

މިސިސިިޕީ އަށް ނިސްބަތްވާ ރިޕަބްލިކަން ޕާޓީގެ ސެނެޓަރު ރޮޖާ ވިކާ އާއި، އަލަބާމާ އަށް ނިސްބަތްވާ ރިޕްރެޒެންޓޭޓިވް މައިކް ރޮޖާސް ގުޅިގެން ނެރުނު ބަޔާނެއްގައި ވިދާޅުވެފައި ވަނީ، ޖަރުމަނުގައި ތިބި އެމެރިކާގެ ސިފައިން ބޭލުމަށް ނިންމި ނިންމުމާ މެދު ވަރަށް ބޮޑަށް ކަންބޮޑުވާ ކަމަށެވެ. ވިކާ އާއި ރޮޖާސް އަކީ ސެނެޓާއި ހައުސް އާމްޑް ސާވިސަސް ކޮމެޓީ ތަކުގެ ރައީސުންނެވެ. 

މި ބަޔާން ނެރެފައި ވަނީ ޕެންޓަންގަން އިން ސިފައިން ބޭލުމުގެ ނިންމުން އިއުލާންކޮށް، ދެން އަންނަ ހަ މަހުން ނުވަތަ ބާރަ މަހުގެ ތެރޭގައި އެކަން ނިންމާލެވޭނެ ކަމަށް ބުނިތާ އެއް ދުވަސް ފަހުންނެވެ. 

އެމެރިކާގެ ރައީސް ޑޮނަލްޑް ޓްރަމްޕް މި ހަފުތާގެ ކުރި ކޮޅު ޖަރުމަނުގެ ޗާންސެލަރ ފްރީޑްރިޝް މާޒްއާ ދެކޮޅަށް ވާހަކަ ދައްކަވާފައި ވަނީ އެ ޤައުމުން ސިފައިން ބާލާނެ ކަމަށް އިންޒާރު ދެއްވަމުންނެވެ. ޖަރުމަނުގެ ޗާންސެލަރ މާޒް ވިދާޅުވެފައި ވަނީ، ދެ މަސް ދުވަހަށް ދެމިގެންދާ ހަނގުރާމަ ނިންމުމަށް ކުރަމުން އަންނަ މަސައްކަތުގައި އީރާން އިން އެމެރިކާ ލަދުގަންނަވާލި ކަމަށާއި، އެމެރިކާގެ މިސްރާބު ސާފު ނުވާ ކަމަށެވެ. 

ވިކާ އާއި ރޮޖާސް ވިދާޅުވީ، ޔޫރަޕުގައި އެމެރިކާ ސިފައިންގެ  ބަދަލުތައް ކޮންގްރެސް އާއި، އެމެރިކާގެ އިއްތިހާދީ ޤައުމުތަކާ ގުޅިގެން ބަލައި، ތަންފީޒު ކުރަން ޖެހޭ ކަމަށެވެ. އެ ބަޔާނުގައި އިތުރަށް ވިދާޅުވީ، އެ ނިންމުމާއި، އެމެރިކާގެ ރައްކާތެރިކަމާއި، އެޓްލާންޓިކް ސަރަހައްދުގެ ސަލާމަތަށް އޮތް އަސަރުތަކާ ބެހޭ ގޮތުން ކުރިއަށް އޮތް ދުވަސްތަކާއި، ހަފުތާ ތަކުގައި ޑިޕާޓްމަންޓް އިން އެ ކޮމެޓީތަކާ މަޝްވަރާ ކުރާނެ ކަމަށް އުންމީދު ކުރައްވާ ކަމަށެވެ. 

ނޭޓޯ އިއްތިހާދުގެ މެމްބަރު ޤައުމު ތަކުން ދިފާއީ ޚަރަދުތައް ޖީޑީޕީގެ ފަހެއް އިންސައްތަ އަށް އިތުރު ކުރި ނަމަވެސް، ދާދި ފަހުން ރަޝިޔާގެ ރައީސް ވްލަޑިމިއާ ޕުޓިން އަށް ރަނގަޅު މެސެޖެއް ނުދެވޭނެ ކަމަށާއި، ރައްކާތެރިކަން ކަށަވަރު ކުރުމަށް ބޭނުންވާ ޤާބިލުކަން އުފެއްދުމަށް ވަގުތު ބޭނުންވާނެ ކަމަށް ދެ ބޭފުޅުން ވެސް ވިދާޅުވެފައިވެ އެވެ.