އީރާނުގެ ކޮންމެ ބަނދަރަކަށް އެމެރިކާ އިން ދަނީ ފާރަވެރިވަމުން: ސެންޓްރަލް ކޮމާންޑުގެ އިސްވެރިޔާ
އީރާނުގެ ބަނދަރުތަކަށް ވަދެނިކުމެވާ އުޅަނދުތައް ހުއްޓުވުމަށް އެމެރިކާއިން އެޅި ބްލޮކޭޑް ފުރިހަމައަށް ތަންފީޒުކުރަމުންދާކަން އެމެރިކާގެ އަސްކަރިއްޔާއިން ވަނީ ހާމަކޮށްފައި. މި ބްލޮކޭޑާ ޚިލާފުވާން މަސައްކަތްކުރި އުޅަނދުތަކަށް އިންޒާރުދީ އަނބުރާ ފޮނުވާލާފައިވާއިރު، ދެ ގައުމުގެ ދެމެދުގައި ފުރިހަމަ އެއްބަސްވުމަކަށް އާދެވެންދެން މި ފިޔަވަޅު ދަމަހައްޓާނެ ކަމަށް ރައީސް ޓްރަމްޕް ވަނީ ވިދާޅުވެފައި. އެމެރިކާގެ ސެންޓްރަލް ކޮމާންޑުން ބުނި ގޮތުގައި އީރާނުގެ ކޮންމެ ބަނދަރެއްގެ ހަރަކާތްތައް އެމެރިކާ ސިފައިން ދަނީ ވަރަށް ގާތުން މޮނިޓަރ ކުރަމުންން.
ޢަރަބި ކަނޑުގައި ދަތުރުކުރަމުންދާ ޔޫއެސްއެސް އަބްރަހަމް ލިންކަން މަނަވަރުގައި، ސެންޓްކޮމްގެ ކޮމާންޑަރު އެޑްމިރަލް ބްރެޑް ކޫޕަރ އެނައުންސްމެންޓެއް ދެނީ. ފެބްރުއަރީ 7، 2026. | ރޮއިޓާސް
އީރާނުގެ ހުރިހާ ބަނދަރުތަކެއް އެމެރިކާ ސިފައިންގެ ފުރިހަމަ ބެލުމުގެ ދަށުގައިވާ ކަމަށް އެމެރިކާގެ އަސްކަރިއްޔާގެ އިސް ޖެނެރަލަކު ވިދާޅުވެއްޖެއެވެ.
މެދުއިރުމަތީގައި ހަރަކާތްތެރިވާ އެމެރިކާގެ ސެންޓްރަލް ކޮމާންޑުގެ އިސްވެރިޔާ ހުކުރު ދުވަހު ވިދާޅުވީ، އީރާނުގެ ބަނދަރުތަކަށް ވަންނަ އަދި ނުކުންނަ އުޅަނދުފަހަރު ހުއްޓުވުމަށް އެމެރިކާ ސިފައިން އަޅާފައިވާ ކަނޑުގެ ބްލޮކޭޑް ނުވަތަ ބަންދުކުރުން ފުރިހަމައަށް ތަންފީޒު ކުރަމުންދާ ކަމަށެވެ. އަދި ބޭނުންވެއްޖެ ކޮންމެ ހިނދެއްގައި މި ބްލޮކޭޑް ދެމެހެއްޓުމުގެ ގާބިލުކަން އެމެރިކާ ސިފައިންގެ ކިބައިގައި ހުރި ކަމަށްވެސް އޭނާ ވިދާޅުވިއެވެ.
ނޫސްވެރިންނާ ވާހަކަދައްކަވަމުން އެޑްމިރަލް ބްރެޑް ކޫޕާ ވިދާޅުވީ، އީރާނުގެ ކޮންމެ ބަނދަރެއްގައި އޮތް ކޮންމެ އުޅަނދަކަށް އެމެރިކާ ސިފައިން ވަރަށް ގާތުން ފާރަވެރިވަމުންދާ ކަމަށެވެ.
އެމެރިކާގެ ސިފައިންނަށް އީރާނުގެ ހުރިހާ ބަނދަރެއް ފެންނަ ކަމަށާއި، ބޭނުންވާ މުއްދަތަކަށް މި ބްލޮކޭޑް ކުރިއަށް ގެންދެވޭނެ ކަމަށް އޭނާ ވިދާޅުވިއެވެ.
މެދުއިރުމަތީގައި އިއުލާންކޮށްފައިވާ ހަނގުރާމަ ހުއްޓާލުމުގެ މުއްދަތުގައި ހޮރްމޫޒް ކަނޑުއޮޅި ހުޅުވާލާނެ ކަމަށް އީރާނުން ހުކުރު ދުވަހު ވަނީ އިއުލާންކޮށްފައެވެ. ނަމަވެސް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، ވޮޝިންޓަނާއި ތެހެރާނާ ދެމެދު ފުރިހަމަ އެއްބަސްވުމަކަށް އާދެވެންދެން، އެމަނިކުފާނު އަމުރުކުރައްވާފައިވާ ބްލޮކޭޑް ދެމިއޮންނާނެ ކަމަށެވެ.
މިދިޔަ ހޯމަ ދުވަހު މި ބްލޮކޭޑް އަމަލީގޮތުން ތަންފީޒުކުރަން ފެށި ފަހުން، އެ އަމުރާ ޚިލާފުވާން 19 އުޅަނދެއް މަސައްކަތް ކުރި ކަމަށް ކޫޕާ ވިދާޅުވިއެވެ. ނަމަވެސް އެމެރިކާ ސިފައިން ދިން އިންޒާރުތަކާ ގުޅިގެން އެ އުޅަނދުތައް ވަނީ އަނބުރާ ބަނދަރަށް ވަދެފައެވެ. ހުކުރު ދުވަހު ކޫޕާ އިތުރަށް ވިދާޅުވީ، އެމެރިކާ ސިފައިންގެ ލޮލުގައި އަޅައިނުގަނެ އެއްވެސް އުޅަނދަކަށް ފިލައިގެން ނުދެވޭނެ ކަމަށެވެ.
މީގެ އިތުރުން، ބްލޮކޭޑްގެ ސަރަހައްދުގެ އެތެރެއާއި ބޭރުންވެސް ޝައްކުކުރެވޭ ބައެއް އުޅަނދުތައް އެމެރިކާގެ އަސްކަރިއްޔާއިން ވަރަށް ގާތުން މޮނިޓަރ ކުރަމުންދާ ކަމަށް އޭނާ ފާހަގަކުރެއްވިއެވެ.
އޭނާ ވިދާޅުވި ގޮތުގައި، އެއިން ކޮންމެ އުޅަނދެއްގެ ހަރަކާތްތައް އެމެރިކާ ސިފައިން ދަނީ ބަލަމުންނެވެ.
މަސްދަރު: އަލްއަރަބިއްޔާ
