ޗައިނާއިން މޭ މަހުން ފެށިގެން ރާއްޖެއަށް ތެޔޮ ފޮނުވަން ނިންމައިފި

މެދުއިރުމަތީގައި ހިނގަމުންދާ ހަނގުރާމައާ ގުޅިގެން ޗައިނާއިން ތެޔޮ އެކްސްޕޯޓްކުރުން މަޑުޖައްސާލައިފައި އޮތުމަށްފަހު، އަންނަ މޭ މަހުން ފެށިގެން އަލުން ތެޔޮ އެކްސްޕޯޓްކުރުން އިތުރުކުރުމަށާއި، ރާއްޖެ ހިމެނޭހެން ބައެއް ގައުމުތަކަށް ތެޔޮ ވިއްކަން އެ ގައުމުން ނިންމައިފި އެވެ.

ރޮއިޓާސް ނޫހުން ރިޕޯޓުކޮށްފައިވާ ގޮތުގައި، މިއަހަރުގެ މޭ މަހުގެ ތެރޭގައި ހޮންކޮންގް ފިޔަވައި އެހެން ސަރަހައްދުތަކަށް 500،000 މެޓްރިކް ޓަނުގެ ތެޔޮ އެކްސްޕޯޓް ކުރުމުގެ ހުއްދަ ޗައިނާ ސަރުކާރުން މިހާރު ވަނީ ދީފަ އެވެ.

ވިޔަފާރިވެރިންނާ ހަވާލާދީ ރިޕޯޓްކޮށްފައިވާ ގޮތުގައި، މިއީ އޭޕްރިލް މަހަށް ލަފާކުރި މިންވަރާ އަޅާބަލާއިރު ގާތްގަނޑަކަށް ދެގުނަ އިތުރު އަދަދެކެވެ. ނަމަވެސް، މިއީ މިދިޔަ އަހަރުގެ އެވްރެޖް މިންވަރާ އަޅާބަލާއިރު ދެބައިކުޅަ އެއްބަޔަށްވުރެ ވެސް މަދު އަދަދެކެވެ. ކެޕްލާ ޝިޕްޓްރެކިންގްގެ ތަފާސްހިސާބުތަކުން ދައްކާ ގޮތުގައި، މިދިޔަ އަހަރު ޗައިނާއިން ވަނީ ހޮންކޮންގް ފިޔަވައި އެހެން ސަރަހައްދުތަކަށް މަހެއްގެ މައްޗަށް އެވްރެޖްކޮށް 1.6 މިލިއަން ޓަނުގެ ޕެޓްރޯލާއި، ޑީސަލް އަދި ޖެޓް ފިއުލް އެކްސްޕޯޓް ކޮށްފަ އެވެ.

އެމެރިކާއާއި އިސްރާއީލުން އީރާނާއެކު ކުރަމުންދާ ހަނގުރާމައިގެ ސަބަބުން ހޯރްމޫޒް ކަނޑުއޮޅި ބަންދުވުމާ ގުޅިގެން، ސާފުނުކުރާ ތެލާއި ތެލުގެ އުފެއްދުންތައް ލިބުމަށް ކުރިމަތިވެދާނެ ހުރަސްތަކުން ޗައިނާގެ ބާޒާރު ރައްކާތެރިކުރުމަށްޓަކައި، ބެއިޖިންގް އިން ވަނީ މާޗް މަހުން ފެށިގެން ތެޔޮ އެކްސްޕޯޓް ކުރުން ވަރަށް ބޮޑަށް ހިފަހައްޓާފަ އެވެ. ނަމަވެސް މިކަމުގެ ސީދާ މައުލޫމާތު އެނގޭ މަސްދަރުތަކުން ބުނި ގޮތުގައި، މޭ މަހުގެ ތެރޭގައި ޗައިނާއިން ތެޔޮ ފޮނުވާނެ ގައުމުތަކުގެ ތެރޭގައި ދިވެހިރާއްޖޭގެ އިތުރުން އޮސްޓްރޭލިއާ، ބަންގްލަދޭޝް، ކެމްބޯޑިއާ، ލާއޯސް، މިޔަންމާ، ނިއުޒީލޭންޑް އަދި ސްރީލަންކާ ހިމެނެ އެވެ.

މަސްދަރުތަކުން ބުނާ ގޮތުގައި، އެކްސްޕޯޓް ކުރާ މިންވަރު ކުޑަކޮށް އިތުރުކުރަން ނިންމީ، ބައިނަލްއަގުވާމީ ބާޒާރުގައި ތެލުގެ އަގު ބޮޑުވެފައިވާއިރު، ލިބޭ ބޮޑު ފައިދާ ހޯދުމަށްޓަކައި ބޭރަށް ތެޔޮ ވިއްކުން އަލުން ފެށުމަށް ޗައިނާގެ ދައުލަތުގެ ތެޔޮ ކުންފުނިތަކުން ބާރުއެޅުމާ ގުޅިގެންނެވެ. ސާފުނުކުރާ ތެލުގެ އަގު އުފުލިފައިވީ ނަމަވެސް، ޗައިނާގެ އެތެރޭގެ ބާޒާރުގައި ތެޔޮ ވިއްކާ އަގުތައް ދަށްކޮށް ހުރުމުން، އެ ގައުމުގެ ރިފައިނަރީތަކަށް ލިބޭ ފައިދާ ވަނީ ކުޑަވެފަ އެވެ. މިގޮތުން ވޭތުވެދިޔަ ހަފުތާގައި ޗައިނާގެ އެކްސްޕޯޓަރުންނަށް ޕެޓްރޯލާއި ޑީސަލް އެކްސްޕޯޓްކޮށްގެން ޓަނަކަށް އެވްރެޖްކޮށް 2،000 ޔުއާން އާއި 4،000 ޔުއާންއާ ދެމެދުގެ ފައިދާއެއް ލިބިފައިވެ އެވެ.

އިތުރު މަސްދަރުތަކުން މައުލޫމާތު ދޭ ގޮތުގައި، ހުއްދަ ދީފައިވާ 500،000 ޓަނުގެ ތެލުގެ ދެބައިކުޅަ އެއްބަޔަށްވުރެ ގިނަ މިންވަރު ކަނޑައަޅާފައިވަނީ އެ ގައުމުގެ އެންމެ ބޮޑު ރިފައިނަރީ ކަމަށްވާ ސިނޯޕެކް އަށެވެ. މީގެ އިތުރުން ޕެޓްރޯޗައިނާ އަށް 150،000 ޓަނު އަދި ސީ.އެން.އޯ.އޯ.ސީ އަށް 40،000 ޓަނުގެ ތެޔޮ ބޭރަށް ފޮނުވުމުގެ ހުއްދަ ވަނީ ދީފަ އެވެ. އަދި އެކްސްޕޯޓް ކުރާ ތެލުގެ ޖުމްލަ މިންވަރުގެ މަދުވެގެން 40 އިންސައްތަ ހިއްސާކުރާނީ ޑީސަލާއި ޖެޓް ފިއުލް ކަމަށްވެސް މައުލޫމާތު ލިބެ އެވެ.

މިކަމާ ގުޅޭގޮތުން ޗައިނާގެ ނޭޝަނަލް ޑިވެލޮޕްމަންޓް އެންޑް ރިފޯމް ކޮމިޝަނާއި މިނިސްޓްރީ އޮފް ކޮމާސް އިން ރަސްމީކޮށް ވަގުތުން އެއްޗެއް ބުނެފައެއް ނުވެ އެވެ. މި މައުލޫމާތު ހިއްސާކުރި ފަރާތްތަކުން ވާހަކަދައްކާފައިވަނީ މީޑިއާއަށް މައުލޫމާތު ދިނުމުގެ ހުއްދަ ރަސްމީކޮށް ލިބިފައި ނުވާތީ ނަން ހާމަނުކުރުމަށް ޝަރުތުކޮށެވެ. އޭޕްރިލް 29 އާ ހަމައަށް އޭޝިއާގެ ބާޒާރުގައި ޑީސަލް ފީފާއަކުން 55 ޑޮލަރުގެ ފައިދާއެއް ލިބެމުންދާއިރު، ޖެޓް ފިއުލް ފީފާއަކުން 62 ޑޮލަރު އަދި ޕެޓްރޯލް ފީފާއަކުން 15 ޑޮލަރުގެ ފައިދާއެއް ލިބެމުންދާ ކަމަށް ތަފާސްހިސާބުތަކުން ދައްކަ އެވެ.