ކޫއްޑޫ ކައިރީގައި ޑައިވް ކުރަނިކޮށް މިޔަރެއް ހަމަލާދީ ފައި ބުރިވި ސްޕެއިންގެ ޑޮކްޓަރު، އޭޑީކޭ ހޮސްޕިޓަލުގައި ފަރުވާ ހޯދަމުން އެ ބިރުވެރި ހާދިސާގެ ތަޖުރިބާ ފުރަތަމަ ފަހަރަށް ހިއްސާކޮށްފި
ގއ. ކޫއްޑޫ ކައިރީގައި ޑައިވް ކުރަނިކޮށް މިޔަރެއް ހަމަލާދީ ފައި ބުރިވި ސްޕެއިންގެ ޑޮކްޓަރު، އޭޑީކޭ ހޮސްޕިޓަލުގައި ފަރުވާ ހޯދަމުން ދަނިކޮށް އެ ބިރުވެރި ހާދިސާގެ ތަޖުރިބާ ފުރަތަމަ ފަހަރަށް ހިއްސާކޮށްފި. މި ހާދިސާގައި ލިބުނު ބޮޑު އަނިޔާއާއެކު އޭނާގެ ފުރާނަ ސަލާމަތްވީ ކުއްލި އޮޕަރޭޝަނަކަށް ފަހު ކަމަށްވާއިރު، މިހާރު ހާލަތު އަންނަނީ ރަނގަޅުވަމުން. މި ހާދިސާ ހިނގުމުގައި ޑައިވް އިންތިޒާމުކުރި ފަރާތުގެ އިހުމާލު އޮތް ކަމަށް ބުނެ އޭނާގެ އާއިލާއިން މައްސަލަ ހުށަހަޅާފައިވާއިރު، ފުލުހުން ދަނީ އެ މައްސަލަ ތަހުގީގު ކުރަމުން.
ބޯޖާ އާއި އާނާ ސޫސާ ހޮސްޕިޓަލުގައި ނަގާފައިވާ ފޮޓޯ އެއް. | ޑައިވްނެޓް
މި މަހުގެ ކުރީކޮޅު އަލަތު އަނބިމީހާ އާނާއާއެކު ރާއްޖޭގައި ހަނީމޫން ހޭދަކުރަމުން ދަނިކޮށް، މިޔަރެއް ހަމަލާދީ ފައި ބުރިވި ސްޕެއިންގެ ޑައިވަރު ބޯޖާ ގާސިއާ ސޫސާ އެ ބިރުވެރި ހާދިސާގެ ތަޖުރިބާ ހިއްސާކޮށްފިއެވެ.
އުމުރުން 31 އަހަރުގެ އަންހެނުންގެ ބަލިތަކާ ބެހޭ ޑޮކްޓަރެއް ކަމަށްވާ ސޫސާ، މި ހާދިސާގައި ލިބުނު ބޮޑު އަނިޔާ އާއި އޭގެ ސަބަބުން ފުރާނައަށް ނުރައްކާވާ މިންވަރަށް ލޭ ބޭރުވުމާ ގުޅިގެން، މާލޭގެ އޭޑީކޭ ހޮސްޕިޓަލުގައި ދަނީ ފަރުވާ ހޯދަމުންނެވެ. އޭނާގެ ފައި ބުރިކޮށްލަން ޖެހުނު ނަމަވެސް، މިހާރު އޭނާގެ ހާލަތު އަންނަނީ ރަނގަޅުވަމުންނެވެ. ނަމަވެސް އަމިއްލަ ރަށް ކަމަށްވާ އަލިކާންޓޭއަށް ދިއުމަށްޓަކައި ވައިގެ މަގުން ދަތުރުކުރުމުގެ ހުއްދަ އަދި ޑޮކްޓަރުން ދީފައެއް ނުވެއެވެ.
މި ހާދިސާ ހިނގާފައިވަނީ ގއ. ކޫއްޑޫގައި ހުންނަ މަސް ފެކްޓްރީ ކައިރީގައި އޮންނަ "ޝާކް އެލީ" ނަމަކަށް ކިޔާ ސަރަހައްދެއްގައެވެ. އެ ސަރަހައްދަކީ އުކާލާ މަސްކުނި ކެއުމަށްޓަކައި ގިނަ އަދަދެއްގެ މިޔަރު އެއްވާ ތަނެކެވެ. އޭޕްރީލް 11 ވަނަ ދުވަހު މި ހާދިސާ ހިނގިއިރު، އޭގެ ކުރީގެ ދުވަސްތަކުގައި އެތަނަށް މަސްކުނި އުކާލާފައި ނުވާތީ، ދޯނިން ޑައިވަރުން މޫދަށް ފުންމާލި ވަގުތު މިޔަރުތައް ތިބީ ވަރަށް ބޮޑަށް ކެއުމަށް ކެތްމަދުވެފައި ކަމަށް ބެލެވެއެވެ. ބައެއް ރިޕޯޓްތައް ބުނާ ގޮތުގައި ސޫސާއަށް ހަމަލާދީފައިވަނީ މިޔަރުގެ ބާވަތެއް ކަމަށްވާ "ބުލް ޝާކް" އެކެވެ.
މި ހާދިސާއާ ގުޅިގެން ސޫސާ އަށް އަތޮޅުގެ ސިއްހީ މަރުކަޒެއްގައި ފަރުވާ ދިނުމަށްފަހު، އިތުރު ފަރުވާއަށް އޭނާ ވަނީ މާލޭގެ އޭޑީކޭ ހޮސްޕިޓަލަށް ގެނެސްފައެވެ. މި ދެމަފިރިން ރާއްޖޭގައި ތިބީ ކޫއްޑޫއާ ގާތްގަނޑަކަށް 7 ކިލޯމީޓަރު ދުރުގައި އޮންނަ ދަ ރެސިޑެންސް މޯލްޑިވްސް (ފަޅުމާފުށި-ދިގުރަށް) ރިސޯޓުގައެވެ.
ކައިވެންޏަށް މަހެއް ފުރުމާ ގުޅިގެން އޭޕްރީލް 28 ވަނަ ދުވަހު ސޫސާ ކުރި ޕޯސްޓެއްގައި ބުނެފައިވަނީ، "ދިރިއުޅުމުގައި މިފަދަ ބޮޑު އިމްތިހާނަކާ މިހާ އަވަހަށް ކުރިމަތިލާން ޖެހޭނެ ކަމަށް ހީކުރީ ކާކު ހެއްޔެވެ؟ އޭޕްރީލް 11 ވަނަ ދުވަހު އަހަރެމެން ކުރިމަތިލީ ދިރިއުޅުމުގެ އެންމެ އަނިޔާވެރި އަދި ބިރުވެރި ހާދިސާއާއެވެ." އޭނާ އިތުރަށް ބުނެފައިވަނީ، ބައެއް ވަގުތުތަކަކީ އިންސާނާގެ ދިރިއުޅުން މުޅިން ބަދަލުކޮށްލާ ވަގުތުތަކެއް ކަމަށާއި، ދިރިއުޅުމަކީ ކިހާ ނާޒުކު އެއްޗެއްކަން އެނގިގެންދިޔަ ނަމަވެސް، ހުރިހާ ކަމެއް ބަނަވެފައިވާ ވަގުތު ވެސް ހިތްވަރު ލިބިގަންނާނެ ގޮތް ވެސް ދަސްވި ކަމަށެވެ. އަދި މި ހުރިހާ ކަމަކަށްފަހު ޔަގީންވާ ކަމަކީ، މިފަދަ ދަތި ވަގުތެއްގައި އޭނާގެ އަނބިމީހާއަށް ވުރެ ވަކިން ރަނގަޅު ބައިވެރިއަކު ނުހުންނާނެ ކަން ކަމަށް ވެސް އޭނާ ބުންޏެވެ.
އޭނާގެ ފުރާނަ ސަލާމަތްކުރުމުގައި އެހީތެރިވި ހުރިހާ ފަރާތްތަކަށް ސޫސާ ވަނީ ޝުކުރު އަދާކޮށްފައެވެ. އަދި ވީހާވެސް އަވަހަކަށް ސްޕެއިންއަށް އެނބުރި ގޮސް، އާ ދިރިއުޅުމެއް ބިނާކުރުމުގެ މަސައްކަތް ފެށުމަށް އުންމީދުކުރާ ކަމަށް އޭނާ ބުންޏެވެ.
މި ހާދިސާ ހިނގިއިރު މޫދުގައި ނެތް ނަމަވެސް، އެ ބިރުވެރި މަންޒަރު ލޮލުން ދުށް އޭނާގެ އަނބިމީހާ އާނާ، އެ ޑައިވް އިންތިޒާމުކުރި ފަރާތުގެ އިހުމާލު އޮތް ކަމަށް ބުނެ ރަސްމީކޮށް މައްސަލަ ހުށަހަޅާފައިވާ ކަމަށް ޑެއިލީ މެއިލް އިން ރިޕޯޓްކޮށްފައިވެއެވެ. މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
