އަނިޔާގެ ޝިކާރައަކަށް ކުޑަކުދިންވެގެން، ހުށަހަޅާ މައްސަލަތައް އިތުރު، މާޗު މަހު އެކަނިވެސް ކުޑަކުދިންނަށް އަނިޔާކުރުމާ ގުޅޭ 92 މައްސަލައެއް
ކުޑަކުދިންނަށް ކުރާ އެކި ބާވަތުގެ އަނިޔާގެ މައްސަލަތައް އިތުރުވަމުންދާތީ، އެކަމަށް ބެލެނިވެރިން އިތުރަށް ސަމާލުވުމަށް ހޯމް މިނިސްޓަރު އިލްތިމާސްކުރައްވައިފި. ތަފާސްހިސާބުތަކުން ދައްކާގޮތުގައި މާޗު މަހު އެކަނިވެސް ކުޑަކުދިންނަށް އަނިޔާކުރުމުގެ 92 މައްސަލައެއް ހުށަހަޅާފައިވޭ.
ހޯމް މިނިސްޓަރު އަލީ އިހުސާން | ރައީސް އޮފީސް
އަނިޔާގެ ޝިކާރައަކަށް ކުޑަކުދިންވެގެން، ހުށަހަޅާ މައްސަލަތައް އިތުރުވަމުންދާ ކަމަށާއި އެކަމާ މެދު ބެލެނިވެރިން އިތުރަށް ސަމާލުވާން ޖެހޭ ކަމަށް ހޯމް މިނިސްޓަރ އަލީ އިހުސާން ވިދާޅުވެއްޖެ އެވެ.
ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ވަޒީރު އިހުސާން މިހެން ވިދާޅުވެފައިވާ އިރު ތަފާސްހިސާބުތަކުން އެނގޭ ގޮތުން މި އަހަރުގެ މާޗު މަހު އެކަނި ވެސް ކުޑަކުދިންނަށް އަނިޔާކުރުމުގެ 92 މައްސަލަ ފެމިލީ ޕްރޮޓެކްޝަން އޮތޯރިޓީ އަށް ވަނީ ހުށަހަޅާފަ އެވެ. އޭގެ ތެރޭގައި ގެވެށި އަނިޔާގެ ޝިކާއަރަކަށްވި 19 ކުއްޖެއްގެ މައްސަލަ ހިމެނެ އެވެ. އަދި ބުލީ ކުރުމުގެ ޝިކާރައަކަށްވި 2 ކުއްޖެއްގެ މައްސަލައިގެ އިތުރުން ޖިންސީ އަނިޔާ ލިބުނު 13 ކުއްޖެއް އަދި ގްރޫމް ކުރުމުގެ 5 މައްސަލައެއް ވަނީ ހުށަހަޅާފަ އެވެ.
އިހުސާން ވިދާޅުވީ ފުލުހުންނަށް ހުށަހަޅާ ކުޑަކުދިން ކުށުގެ ވެށީގައި އުޅުމުގެ މައްސަލަތަކަށް ވުރެ، ކުޑަކުދިންނަށް އަނިޔާވެގެން ހުށަހަޅާފައިވާ މައްސަލަތައް އިތުރު ކަމަށެވެ. މިނިސްޓަރ ވަނީ ކުޑަކުދިންނަށް ނަފްސާނީގޮތުންނާއި ޖިސްމާނީގޮތުން އަދި ޖިންސީގޮތުން އަނިޔާ ލިބިގެން ހުށަހަޅާ މައްސަލަތައް އިތުރުކަން ފާހަގަކުރައްވާފަ އެވެ.
"ކުޑަކުދިންނަށް ގޯނާ ކުރުމާއި އަނިޔާކުރުމާއި ޖިންސީ ފުރައްސާރަކުރުމުގެ މައްސަލަތައް ގިނަ. މިފަދަ ކަންތައްތަކަށް ސަމާލުވާން ޖެހޭ." ވަޒީރު ވިދާޅުވި އެވެ.
މިނިސްޓަރ އިހުސާން ވަނީ ކުދިންގެ ރައްކާތެރިކަން ކަށަވަރުކުރުމަށް އިތުރަށް ސަމާލުކަން ދިނުމަށް އިލްތިމާސްކުރައްވާފަ އެވެ. މިފަދަ މައްސަލަތައް ލަސްނުކޮށް ރިޕޯޓްކުރުމަށާއި ކުއްޖާ އަށް ބޭނުންވާ ނަފްސާނީ އެހީތެރިކަން ފޯރުކޮށްދިނުން ލަސް ނުކުރުމަށް ކަމާއި ގުޅުން ހުރި ފަރާތްތަކުން އިލްތިމާސް ކުރެ އެވެ.
