ސަރުކާރު ބަދަލުވިފަހުން ހޯރަފުށީ ބޮޓެލިން ޕްލާންޓް ހުރީ ދަބަރަށްވާން ދޫކޮށްލާފައި، ކުރިހާ ވެސް ކަމަކީ އެތަނުގައި ހުރި އޭސީތައް ނައްޓައިގެން ގެންދިއުން
ހއ. ހޯރަފުށީގައި އިންޑިއާގެ އެހީގައި ގާއިމްކުރި 12.5 މިލިއަން ރުފިޔާގެ ބޮޓެލިންގ ޕްލާންޓްގެ މަސައްކަތް ހުއްޓި، އެތަން ވީރާނާވަމުންދާ ކަމަށް އެރަށު ކައުންސިލުން ވަނީ ބުނެފައި. މި މަޝްރޫއަށް ބޭނުންވާ ހުރިހާ މެޝިނަރީއެއް ގެނެސް، މުވައްޒަފުން ނަގާފައިވަނިކޮށް ސަރުކާރު ބަދަލުވުމާއެކު އެތަނުގެ މަސައްކަތް ހުއްޓި، އެތަނުގައި ހުރި އޭސީތައް ވެސް ފެނަކައިން ނައްޓައިގެން ގެންގޮސްފައިވާ ކަމަށް ކައުންސިލްގެ ރައީސް މުހައްމަދު ވަހީދު ފާހަގަކުރެއްވި.
މިދިޔަ ސަރުކާރުން ހއ. ހޯރަފުށީގައި ތަރައްގީ ކުރި ބޮޓަލިން ޕްލާންޓް. | ރާއްޖެ އެމްވީ
މިދިޔަ ސަރުކާރުން ހއ. ހޯރަފުށީގައި ތަރައްގީކުރި ބޮޓެލިން ޕްލާންޓް ހުރީ ދަބަރަށްވާން ދޫކޮށްލާފައި ކަމަށާއި، މި ސަރުކާރުން ކުރި ކަމަކީ އެތަނުގެ އޭސީތައް ނައްޓާލައިގެން އެހެންތަނަކަށް ގެންދިއުން ކަމަށް ހޯރަފުށީ ކައުންސިލްގެ ރައީސް މުހައްމަދު ވަހީދު ވިދާޅުވެއްޖެ އެވެ.
ރާއްޖެޓީވީގެ ހާލު ކިހިނެއް ޕްރޮގްރާމުގައި ވާހަކަ ދައްކަވަމުން ހޯރަފުށީ ކައުންސިލްގެ ރައީސް ވަހީދު ވިދާޅުވީ އެރަށު ބޮޓެލިންގ ޕްލާންޓަކީ މިދިޔަ ސަރުކާރުން އިންޑިއާ ހައިކޮމިޝަނުގެ ހިލޭ އެހީގެ ދަށުން ގާއިމް ކުރުމަށް ނިންމި ފެން ޕްލާންޓެއް ކަަމަށެވެ. ވަހީދު ވިދާޅުވީ މި ޕްލާންޓަށް 12.5 މިލިއަން ރުފިޔާ ހަރަދުކޮށްފައިވާ ކަމަށެވެ. އަދި ޕްލާންޓުގެ އެތެރޭގައި ފެން އުފެއްދުމަށްޓަކައި ބޭނުންވާ ހުރިހާ މެޝިނަރީތަކެއް ވެސް ހުރީ ގެނެވިފައި ކަމަށެވެ.
އޭނާ ވިދާޅުވީ އެތަނުގައި ނުފެށި އޮތީ ހިދުމަތް އެކަނި ކަމަށެވެ. އަދި އެތަނަށް މުވައްޒަފުން ވެސް ނެގި ކަމަށާއި، ނަމަވެސް ސަރުކާރު ބަދަލުވެ އެ ހުރިހާ މުވައްޒަފުން ވަޒީފާއިން ވަކިކޮށްފައިވާ ކަމަށެވެ. އަދި ސަރުކާރު ބަދަލުވި ފަހުން އިތުރު އެއްވެސް މަސައްކަތެއް ނުކުރާ ކަމަށާއި، ސަރުކާރު ބަދަލުވި އިރު ހުރި ގޮތަށް ދަބަރަށްވާން ދޫކޮށްލާފައިވާ ކަމަށެވެ.
އަޅުގަނޑުމެންނަށް ސަރުކާރުގެ ސަމާލުކަމަށް ސިޓީ ފޮނުވުނު އަދަދުގެ މިންވަރު ނޭނގޭ ދަންނަވާކަށް. ހޯރަފުށީ ރައްޔިތުން ކައުންސިލަށް ވަރަށް ގިނަ ޝަކުވާތައް ކުރި. މިތަނުގައި ހަރުކޮށްފައި ހުރި އޭސީތަކާއި، މިތަނަށް ގެނެސް ހަރުކުރަން ހުރި އޭސީތައް ވެސް މިތަނުން އެބަ ގެންދޭ. ދެން އަޅުގަނޑުމެން ފެނަކަ އަށް ދެންނެވިން އެވާހަކަ އެކަން އެގޮތަށް ނުކުރައްވާށޭ، ކައުންސިލްގެ ހިއްސާ ވެސް އޮންނަ ޕްރޮޖެކްޓެއް، އިންޑިއާ ހައިކޮމިޝަނުގެ ޕްރޮޖެކްޓެއް، އެހެންވީމާ އަޅުގަނޑުމެން ކައުންސިލްގެ ހުއްދައެއް ނެތި ނުވަތަ ބަހެއް ނެތި މިތަނުން އެއްވެސް އެއްޗެއް ބޭރު ކުރުމަކީ ވަރަށް ނާތަހުޒީބީ އަމަލެކޭ. އެހެންނަމަވެސް އެ ހުރިހާ އެއްޗެއް ގެންދިޔައީ.
ވަހީދު ވިދާޅުވީ ސަރުކާރު ބަދަލުވި އިރު ހުރިހާ އެއްޗެއް ވެސް ޕްލާންޓުގައި ހުންނާނެ ކަމަށެވެ. އަދި މަސައްކަތް ނިންމާލުމަށް އޮތީ ވަރަށް ކުޑަކުޑަ މަރުހަލާއެއް ކަމަށާއި، ނަމަވެސް އެކަން ނުވެ ހަލާކުކޮށްލާން ތަން ދޫކޮށްލާފައިވާ ކަމަށެވެ.
ބޮޓަލިން ޕްލާންޓަށް މުވައްޒަފުން ނެގި ނަމަވެސް ސަރުކާރު ބަދަލުވެ އެ ހުރިހާ މުވައްޒަފުން ވަޒީފާއިން ވަކިކޮށްފައިވަނީ މިދިޔަ އަހަރުގެ ޖޫން މަހުގަ އެވެ.
ހޯރަފުށީ ކައުންސިލުގެ 40 އިން ސައްތަ ހިއްސާ އޮންނަ ގޮތަށް ފެށި ބޮޓްލިންގ ޕްލާންޓްގެ މަސައްކަތް ހުއްޓާލާ ކަމަށް ސަރުކާރުން ބުނި އިރު ކައުންސިލަށް ވެސް އެކަން އަންގާފައެއް ނުވެ އެވެ.
ރައީސް މުއިއްޒު ވެރިކަމަށް ވަޑައިގަތުމަށް ވެވަޑައިގެންނެވި ވައުދުތަކުގެ ތެރޭގައި ހިނގަމުންދާ އެއްވެސް މަޝްރޫއެއް ހުއްޓާ ނުލައްވާނެ ކަމަށާއި، ސިޔާސީ މަގާމެއް ގައި ހުރި މީހަކު ނޫނީ ވަޒީފާ އިން ވަކި ނުކުރައްވާނެ ކަމަށް ރައްޔިތުން ގާތު ވިދާޅުވެފައިވެ އެވެ.
