އިންތިހާބުތަކަށް ދެ ދުވަހަށް ވެފައި ވަނިކޮށް ޖެހި ވެލި ބަސްތާ ތަކާއެކު، ހޯރަފުށީ ބިން ހިއްކުމުގެ މަސައްކަތް ހުއްޓިފަ
ހއ. ހޯރަފުށީގެ ބިން ހިއްކުމުގެ މަޝްރޫޢު، މަޖިލިސް އިންތިޚާބާ ދިމާކޮށް "ނަމަކަށް" ފެށި ނަމަވެސް މިހާރު އެ މަސައްކަތް ހުއްޓިފައިވާ ކަމަށް އެ ރަށު ކައުންސިލުން ވަނީ ހާމަކޮށްފަ. މި މަޝްރޫޢުގެ ދަށުން 50 ހެކްޓަރުގެ ބިން ހިއްކުމަށް ރައްޔިތުން އެދެމުންދަނިކޮށް ސަރުކާރުން ނިންމާފައިވަނީ 25 ހެކްޓަރު ހިއްކުމަށް ކަމަށާއި، މަސައްކަތާ ގުޅޭ އެއްވެސް ރަސްމީ މަޢުލޫމާތެއް ކައުންސިލާ ހިއްސާކޮށްފައި ނުވާކަން ކައުންސިލްގެ ރައީސް ފާހަގަކުރެއްވި.
އެޕްރީލް 4 ވަނަ ދުވަހު ބޭއްވި އިންތިހާބުތަކަށް 2 ދުވަހަށް ވެފަ އޮއްވާ، ހއ. ހޯރަފުށީ ބިން ހިއްކުމުގެ މަސައްކަތް ފެށުނީ ކަން ދެއްކުމުގެ ގޮތުން ޖަހާފަވާ ވެލި ބަސްތާ ތައް. | ރާއްޖެ އެމްވީ
ހއ. ހޯރަފުށީގައި 200 ހައުސިންގ ޔުނިޓް އިމާރާތް ކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވައުދުވެވަޑައިގެންނެވި ބިން ހިއްކުމުގެ މަޝްރޫޢު ހުއްޓިފައިވާކަން ހޯރަފުށީ ކައުންސިލްގެ ރައީސް މުހައްމަދު ވަހީދު ހާމަކުރައްވައިފިއެވެ. އެޕްރީލް 4 ވަނަ ދުވަހު ބޭއްވި ލޯކަލް ކައުންސިލް އިންތިހާބުގެ ދެތިން ދުވަސް ކުރިން ބިން ހިއްކުމުގެ މަސައްކަތް ފެށުމުގެ ގޮތުން ވެލި ބަސްތާތަކެއް ޖެހި ފަހުން، އެއްވެސް މަސައްކަތެއް ކުރިޔަށް ނުދާކަން ވަހީދު ފާހަގަކުރެއްވިއެވެ.
އެޕްރީލް 4 ވަނަ ދުވަހު ބޭއްވި އިންތިހާބުތަކަށް 2 ދުވަހަށް ވެފަ ވަނިކޮށް، ހއ. ހޯރަފުށީގެ ބިން ހިއްކުމުގެ މަސައްކަތް ފެށުނީ ކަން ދެއްކުމުގެ ގޮތުން ވެލި ބަސްތާ ތަކެއް ޖަހާލި ފަހުން، ބިން ހިއްކުމުގެ އެއްވެސް މަސައްކަތެއް ކުރިޔަށް ނުދާކަމަށް ހޯރަފުށީ ކައުންސިލްގެ ރައީސް މުހައްމަދު ވަހީދު ވިދާޅުވެއްޖެ އެވެ.
ރާއްޖެ ޓީވީގެ ހާލު ކިހިނެއް ޕްރޮގްރާމްގައި ވާހަކަދައްކަވަމުން ވަހީދު ވިދާޅުވީ ހޯރަފުށީގެ ބިން ހިއްކައި، އެ ސަރަހައްދުގަ 200 ހައުސިން ޔުނިޓް، އިމާރާތް ކޮށްދިނުމަކީ ރައީސް މުއިއްޒުގެ ރިޔާސީ ވައުދެއް ކަމަށެވެ. ބިން ހިއްކުމުގެ މަޝްރޫއު ކުރިޔަށް ގެންދިޔުމުގެ ހުއްދައަށް އެދި ސަރުކާރުން ކައުންސިލަށް ސިޓީ ފޮނުވީ މި އަހަރުގެ 25 ފެބްރުއަރީގައި ކަމަށާއި، ކައުންސިލުން އެކަމަށް އިއުތިރާޒު ނުކުރާ ކަމަށް ބުނެ 26 ފެބްރުއަރީގައި ޖަވާބު ދިނުމުން މަސައްކަތް ކުރިޔަށްދާނެ ކަމަށް ބެލެވުނު ކަމަށް ވަހީދު ވިދާޅުވި އެވެ.
ވަހީދު ވިދާޅުވީ، ހޯރަފުށީގެ ލޭންޑް ޔޫސް ޕްލޭންގައި ރައްޔިތުން ފާސްކޮށްފައި ވަނީ 50 ހެކްޓަރަށް ބިން ހިއްކުން ކަމަށާއި، ނަމަވެސް ސަރުކާރުން ފޮނުވާފައި އޮތީ 25 ހެކްޓަރުގެ ބިން ހިއްކާ ގޮތަށް ކަމަށެވެ. ބިން ހިއްކުން 50 ހެކްޓަރަށް ބޮޑުކޮށްދިނުމަކީ ހޯރަފުށީ ރައްޔިތުންނާއި ކައުންސިލުގެ ވަރަށް ބޮޑު އެދުމެއް ކަމަށް ކައުންސިލުން ސިޓީގައި ބަޔާންކުރި ކަމަށް ވަހީދު ވިދާޅުވި އެވެ.
މިހާ ހިސާބުން ފެށިގެން އަޅުގަނޑުމެން ދެންނެވިން ކުރިން ހޯރަފުށީގެ ލޭންޑް ޔޫސް ޕްލޭންގައި ރައްޔިތުން ފާސްކޮށްފައިވަނީ 50 ހެކްޓަރަށް ބިން ހިއްކުން. އެހެންނަމަވެސް، ސަރުކާރުން މި ފަހުން ފޮނުވާފައި އޮތީ 25 ހެކްޓަރުގެ ބިން ހިއްކާ ގޮތަށް. ދެން އަޅުގަނޑުމެން ސިޓީގައި ބަޔާންކުރިން، މި ހިއްކާ ދެއްވާއިރުގައި 50 ހެކްޓަރަށް ބޮޑުކޮށްދެއްވުމަކީ ހޯރަފުށީ ރައްޔިތުންނާއި ކައުންސިލުގެ ވަރަށް ބޮޑު އެދުމެއް ކަމަށް. ދެން މި ނިމިދިޔަ ލޯކަލް ކައުންސިލު އިންތިޚާބަށް ދެތިން ދުވަހަށް ވެފައި އޮއްވާ ޖެހި ވަރަށް ބޮޑު ސަކަރާތެއް މި ފެންނަނީ. އާދެ! ބިން ހިއްކާނެކަމުގެ ވާހަކަތަކުގެ އަޑުފައްގަނޑު ވަރަށް ގަދަ އިނގޭތޯ. އިންތިޚާބަށް ދެތިން ދުވަސްވެފައި އޮއްވާ. އެހެންވީމާ، އަޅުގަނޑުމެން ކައުންސިލަކަށް ވެސް މިކަހަލަ ކަމެއް، ކުރި ކަމެއް ވެސް އެއްގޮތަކަށް ވެސް އެނގިފައެއް ނެތް. އަދި ޕްރޮޖެކްޓުގެ ބޯޑެއް މިތާ ބެހެއްޓިކަން ވެސް ހަމަ އެއްވެސް މަޢުލޫމާތެއް ލިބިފައެއް ނެތް. މި ފެންނަނީ ހަމަ އެކަނި ވެލި ބަސްތާތަކެއް ޖަހާލާފައި މި ތަނަށް ވެލިތަކެއް ޖަމާކޮށްލާފައި ހުރިކަން އެކަނި ބިން ހިއްކަން. މިއަށް ދެން ބިން ހިއްކުމުގެ މަޝްރޫޢޭ ކިޔާކަމަށް ވަނީނަމަ އެއީ ބިން ހިއްކުމުގެ މަޝްރޫއެއް. ދެން އެކަން ކޮށްލާފައި ދިޔައީ، އާދެ ހާ ކަހަލަ ލަފަ ދިޔައީ އިނގޭތޯ. އޭގެފަހުން އެވެސް ޚަބަރެއް ނެތް. އެވެސް މުޢާމަލާތެއް ވެސް ރަސްމީ ހައިސިއްޔަތަކުންނެއް އޭގެފަހަކުންނެއް ނުކުރޭ އިނގޭތޯ.ހޯރަފުށީ ކައުންސިލްގެ ރައީސް މުހައްމަދު ވަހީދު
ލޯކަލް ކައުންސިލް އިންތިހާބަށް ދެތިން ދުވަހަށް ވެފައި އޮއްވާ ބިން ހިއްކާނެ ކަމުގެ ވާހަކަތަކުގެ އަޑު ގަދަވި ކަމަށާއި، ނަމަވެސް ކައުންސިލަކަށް މިކަހަލަ ކަމެއް ކުރާކަން އަންގާފަ ނުވާ ކަމަށް ވަހީދު ވިދާޅުވި އެވެ. ބިން ހިއްކުމުގެ މަސައްކަތް ފަށި ކަމުގެ އަޑު ރަށުތެރޭ ގައި ގަދަވާން ފެށުމުން، އެ ސަރަހައްދަށް ގޮސް ބަލާއި އިރު ފެނުނީ ވެލި ބައްތާ ތަކެއް ޖަހާ އެ ސަހަރައްދަށް ވެލިތަކެއް ޖަމާކޮށްފައިވާ މަންޒަރު ކަމަށް ވަހީދު ވިދާޅުވި އެވެ. ނަމަވެސް ބަސްތާ ތައް ޖެހި ފަހުން އެއްވެސް މަސައްކަތެއް ކުރިޔަށް ނުދާކަމަށް ވަހީދު ވިދާޅުވި އެވެ. އަދި އޭގެ ފަހުން ވެސް މި މަޝްރޫއާ ގުޅޭ އެއްވެސް ރަސްމީ މުއާމަލާތެއް ކައުންސިލާ ނުކުރާކަމަށް ވަހީދު ވަނީ ވިދާޅުވެފަ އެވެ.
އެޕްރީލް 4 ވަނަ ދުވަހު ބޭއްވި އިންތިހާބުގެ ހއ. ހޯރަފޫށީގެ ހުރިހާ ގޮނޑި އެއް ވެސް ކާމިޔާބުކުރީ އިދިކޮޅު އެމްޑިޕީ ގެ ކެނޑިޑޭޓުން ނެވެ. އަދި ފެންނަ ނުފެންނަ ވޯޓުގައި ވެސް ހޯރަފުށީގެ 70 އިންސައްތަ ރައްޔިތުން ވަނީ ސަރުކާރަށް ނޫނެކޭ ބުނެފަ އެވެ.
ނިމިދިޔަ ލޯކަލް ކައުންސިލް އިންތިހާބާ، ފެންނަ ނުފެންނަ ވޯޓާ ދިމާކޮށް ސަރުކާރުން ވަނީ ރައްޔިތުންގެ ލޮލުގަ އަނދުން އެޅުވުމުގެ ގޮތުން ގިނަ މަޝްރޫއުތަކެއް ފަށާފައި ކަމަށް ރައްޔިތުން ދަނީ ތުހުމަތު ކުރަމުންނެވެ.
