ގެދޮރުވެރިޔާ ފްލެޓުތަކުން ކުނި ނަގައި ސާފު ކޮށްދޭން ޖެހޭ، އެއީ ސަރުކާރުގެ ޒިންމާ އެއް: ކުރީގެ މެންބަރު އިބްރާހިމް ރަޝީދު
މާފަންނު މެދު ދާއިރާގެ ކުރީގެ މެންބަރު އިބްރާހިމް ރަޝީދު ވިދާޅުވީ ފްލެޓުތަކަށް ބަދަލުވާ ނިކަމެތި އާއިލާތަކަށް ބޮޑު އަގު ދީގެން ކުނި އުކާލުމަކީ ދަތި ކަމެއް ކަމަށް. މި ސަރުކާރަށް ރައްޔިތުންގެ ހާލަތާއި އިހުސާސްތައް ނޭނގޭ ކަމަށާއި، ރައްޔިތުންނަށް ސަރުކާރުން އެހީތެރިވާން ޖެހޭ ކަމަށް އޭނާ ވިދާޅުވި. އޭނާ ވިދާޅުވީ އެމްޑީޕީގެ ސަރުކާރެއްނަމަ ރައްޔިތުންނަށް ފަސޭހަވާނެ ގޮތަށް ހުރިހާ އިންތިޒާމެއް ހަމަޖައްސައިދޭނެ ކަމަށް.
ރާއްޖެޓީވީގެ ފަލަސުރުހީ ޕްރޮގްރާމްގައި މާފަންނު މެދު ދާއިރާގެ ކުރީގެ މެންބަރު އިބްރާހިމް ރަޝީދު ވާހަކަ ދައްކަވަނީ. | ރާއްޖެ އެމްވީ
މިސަރުކާރުން ގެދޮރުވެރިޔާ ފްލެޓުތަކުން ކުނި ނަގައި ސާފު ކޮށްދޭން ޖެހޭ ކަމަށާއި، ފަހި ދިރިއުޅުން ކޯޕަރޭޝަން (އެފްޑީސީ) އިން ޒިންމާ ނަގަން ޖެހޭ ކަމަށް މާފަންނު މެދު ދާއިރާގެ ކުރީގެ މެންބަރު އިބްރާހިމް ރަޝީދު ވިދާޅުވެއްޖެ އެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި އިބްރާހިމް ރަޝީދު ވަނީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި އިމާރާތް ކުރި ގެދޮރުވެރިޔާ ފްލެޓުތައް ގޮނޑުކޮށްފައިވާތީ އެކަމުގެ ކަންބޮޑުވުން ފާޅު ކޮށްފަ އެވެ. އެއްވެސް ކަހަލަ ރަނގަޅު އިންތިޒާމެއް ހަމަ ޖައްސާފައިނުވާ ކަމަށާއި، ރައްޔިތު މީހާ އަށް ލުއި ފަސޭހަވާނެ ގޮތަކަށް އެއްވެސް ކަމެއް ނުކުރާ ކަމަށް އޭނާ ވިދާޅުވި އެވެ.
އިބްރާހިމް ރަޝީދު ވިދާޅުވީ ކުނި އުކުމަކީ ފްލެޓުގެ ވެރިން ކުރަން ޖެހޭ މަސައްކަތެއް ކަމަށް ބުނެ، އެފްޑީސީން ޒިންމާއިން ބަރީއަ ނުވެވޭނެ ކަމަށާއި، އަލަށް ތަނަކަށް އާއިލާތަކަކުން ބަދަލުވާއިރު، ކުނި އުކާލެވޭ ފަސޭހަ ގޮތެއް ހަމަ ޖައްސައިދޭން ޖެހޭ ކަމަށެވެ. އަދި ވިދާޅުވީ ގެދޮރުވެރިޔާ ފްލެޓުތަކަށް ބަދަލުވަނީ ފަތުރުވެރިން ނޫން ކަމަށެވެ.
ފްލެޓުތަކަށް ބަދަލުވާ ގިނަ އާއިލާތަކަކީ ވަރަށް ހާލުގައި ދިރިއުޅުމަށްފަހު ބަދަލުވާ އާއިލާތަކެއްކަން ފާހަގަކުރައްވައި އިބްރާހިމް ރަޝީދު ވިދާޅުވީ ކުނި އުކާލަ ދެނީ ބޮޑު އަގު ދީގެން ކަމަށާއި، އެފައިސާއިން ކުނި އުކުމަށްވުރެ މުހިންމު ކަންކަން ކުރަން ހުންނަ ކަމަށެވެ. އަދި މިސަރުކާރަށް ރައްޔިތުންގެ ހާލަތާއި ވިންދު ނޭނގޭ ކަމަށް އޭނާ ވިދާޅުވި އެވެ.
ކުނި އުކަނީ ބޮޑު އަގެއް ދީގެން. ހަގީގަތުގައި މިސަރުކާރަށް ރައްޔިތުންގެ ހިތުގެ ވިންދެއް ނޭނގޭ. ރައްޔިތުންގެ ހާލަތެއް ވެސް ނޭނގޭ. މިހާރު ފަހި ދިރިއުޅުން ކޯޕްރޭޝަންގެ 4000 ފްލެޓުގެ ތެރެއިން ބާކީ 200 ފްލެޓު ފިޔަވައި ހުރިހާ ފްލެޓަކަށް މީހުން ވައްދައިފި. އެއީ އަނެއްހެން ދަންނަވަންޏާ 3،800 އާއިލާ. 2،300 އާއިލާ ބްރިޖުގެ އެއްކޮޅުން އަނެއް ކޮޅަށް އަތުރާލަބަލަ. މާލޭގެ ބްރިޖުން ފެށިގެން ހުޅުމާލޭ ފޭސް-2 3،000 އާއިލާ އަތުރާލީމާ ސިފަ ވަނީ ކިހިނެއް. 3،000 އާއިލާ މި ވަންނަނީ އެތަނަށް. ހިޖުރަ ކުރަނީ. ވަރަށް ނިކަމެތި ހާލަތުގައި ވަންނާނެ ތަން ނެތި ކުއްޔަށް ހިފައިގެން ތިބި ބައެއް އޭނާ ނިދާ ގޮދަނޑި ގަނޑާ ، ގެންގުޅޭ ތަށި ކޮޅާ މިއެއްޗެހި ހިފައިގެން ހިޖުރަ ކުރަނީ. ރެފިއުޖީން ގޮތަށް. ދައުލަތެއް ވިންދެއް ހުރި ނަމަ ނުވަތަ ރައްޔިތުންގެ އިހުސާސްއެއްހުރި ނަމަ އެކަން ކުރެވޭނަމަ މިތާގައި އޮންނާނެ ޑިޒާސްޓަރ މެނޭޖްމަންޓު. އެތަން ދިޔަ ރައްޔިތުންނަކީ ކުނި އުކޭ ފަދަ ހާލަތެއްގައި ތިބި ބައެއް ނޫން. އަގަޔާ އަތާ ދިމާ ނުވާ ރައްޔިތުން ގިނައިން ތިބީ. ސަރުކާރެއްގެ ޒިންމާއެއް އެއީ އެމީހުންނަށް އެހީތެރިވުން. އެމީހުންނަށް އެއްޗެހި އުފުލާ ދިނުންމާފަންނު މެދު ދާއިރާގެ ކުރީގެ މެންބަރު އިބްރާހިމް ރަޝީދު
އެފްޑީސީ އަދި އެޗްޑީސީއަށް އިޝާރަތް ކުރައްވައި އިބްރާހިމް ރަޝީދު ވިދާޅުވީ މަސައްކަތް ކުރަނީ ރައްޔިތުންގެ ކަންބޮޑުވުންތަކަށް ހައްލު ހޯދައިދިނުމަށް ނޫން ކަމަށެވެ. ކުނި އަޅާނަމަ ފްލެޓު އެއްބަސްވުން ބާތިލް ކުރާނެ ކަމުގެ އިންޒާރު ދިން ނަމަވެސް އެކަން އެގޮތަށް ނުކުރެވޭނެ ކަމަށާއި، ފްލެޓުތަކަކީ ރައްޔިތުންގެ ފައިސާއިން އިމާރާތް ކޮށްފައިވާ ތަންތަން ކަމަށް އޭނާ ވިދާޅުވި އެވެ.
މީގެ އިތުރުން އިބްރާހިމް ރަޝީދު ވިދާޅުވީ އެމްޑީޕީގެ ސަރުކާރެއްނަމަ ރައްޔިތުންނަށް ފަސޭހަވާނެ ގޮތަށް ހުރިހާ އިންތިޒާމެއް ހަމަޖައްސައިދޭނެ ކަމަށެވެ. އެހެންކަމުން އެމްޑީޕީ ވެރިކަމެއް ގެނައުމަށް ރައްޔިތުން މަސައްކަތް ކުރަން ޖެހޭ ކަމަށާއި، ކުރިއަށް އޮތް ލޯކަލް ކައުންސިލް އިންތިޚާބުގައި ވެސް އެމްޑީޕީގެ ކެންޑިޑޭޓުންނަށް ވޯޓު ދިނުމަށް އޭނާ ގޮވާލެއްވި އެވެ.
