އަތޮޅު ކައުންސިލްތައް އުވައިނުލައި، ކުރީން އޮތްގޮތައް އަނބުރައި ރުޖޫއަކުރަން މަޖިލީހަށް ހުށަހަޅައިފި
21 އެޕްރީލު 2026 | އަންގާރަ 09:07މި އިސްލާހު ހުށަހެޅުއްވީ މިހާރު އަމަލުކުރަމުންދާ އުސޫލުގެ ސަބަބުން ލާމަރުކަޒީ ނިޒާމަށް އުނިކަން ލިބޭ ކަމަށް ފާހަގަކުރައްވައި، ޤާނޫނުއަސާސީގެ 230 ވަނަ މާއްދާ އިސްލާހުކުރުމަށް. އެހެންކަމުން، މި ހުށަހެޅުމުގެ މައިގަނޑު މަގުސަދަކީ އަތޮޅު ކައުންސިލްތައް އުވައިނުލައި، އެ ނިޒާމު އިތުރަށް ހަރުދަނާކުރުން.
ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުޙައްމަދު އިބްރާހިމް (ކުޑޫ) ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަނީ | މަޖިލިސް
ޤާނޫނުއަސާސީ ތަސައްވުރުކޮށްފައިވާ ފުރިހަމަ ލާމަރުކާޒީ ނިޒާމު ހިންގުމަށްޓަކައި ބޭނުންވާ އަތޮޅު ކައުންސިލްތައް އުވާ ނުލައި، ކުރީން އޮތްގޮތަށް އަނބުރައި ރުޖޫއަކުރަން ރައްޔިތުންގެ މަޖިލީހަށް ހުށަހަޅުއްވައިފި އެވެ.
އެ ހުށަހެޅުއްވުން ހުށަހަޅުއްވާފައި ވަނީ ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުޙައްމަދު އިބްރާހިމް އެވެ.
ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަށް އެޑްރެސްކުރައްވައި ފޮނުއްވި ސިޓީ އެއްގައި އޭނާ ވިދާޅުވީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 230 ވަނަ މާއްދާގެ (ހ) ގައި، ދިވެހިރާއްޖޭގެ އިދާރީ ދާއިރާތައް ހިންގާން ވާނީ ލާމަރުކަޒީ އުސޫލުން ކަމަށް ކަނޑައަޅައި ބަޔާންކޮށްފައިވާ ކަމަށެވެ. ޤާނޫނުއަސާސީގެ 230 ވަނަ މާއްދާގެ(ށ) ގެ ދަށުން، ލާމަރުކަޒީ އުސޫލުން އިދާރީ ދާއިރާތައް ހިންގުމަށްޓަކައި، 2010 ވަނަ އަހަރު ޢަމަލުކުރަން ފެށި ޚާއްޞަ ޤާނޫނުގައި ކަނޑައަޅައިފައިވާ ގޮތުގެމަތީން އިދާރާތަކާއި، މަޤާމުތަކާއި ރަށުކައުންސިލްތަކާއި އަތޮޅު ކައުންސިލްތަކާއި ސިޓީކައުންސިލްތައް އުފައްދައިގެން، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގަން ފަށައި، އެ ނިޒާމު ތަރައްގީކޮށް، ހަރުދަނާ ކުރަމުން އައި ކަމަށް ވެސް ކުޑޫ ވިދާޅުވި އެވެ.
ނަމަވެސް މި ވެރިކަމުގައި އެ ނިޒާމުގައި ހިމެނޭ މުހިންމު ބައެއް ކަމުގައިވާ އަތޮޅު ކައުންސިލްތައް އުވައިލުމުގެ ސަބަބުން، ޤާނޫނު އަސާސީ ތަސައްވުރުކުރި ނިޒާމަށް އުނިކަން ލިބިފައިވާ ކަމަށް ކުޑޫ ވިދާޅުވި އެވެ. އެހެންކަމުން، ޤާނޫނުއަސާސީ ތަސައްވުރުކޮށްފައިވާ ފުރިހަމަ ލާމަރުކާޒީ ނިޒާމު ހިންގުމަށްޓަކައި ބޭނުންވާ އަތޮޅު ކައުންސިލްތައް އުވައި ނުލައި، ކުރީން އޮތްގޮތައް އަނބުރައި ރުޖޫއަކުރުމަށްޓަކައި، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 230 ވަނަ މާއްދާ އިސްލާހުކުރުމަށް ކުޑޫ ވަނީ ހުށަހަޅުއްވާފަ އެވެ.
އެ މައްސަލަ ހުށަހަޅުއްވާފައި ވަނީ އަންގާރަ ދުވަހު އެވެ.
