ހަނގުރާމަ އިން ޓްރަމްޕް އަށް ހާސިލު ނުވި ކަންކަން، މަޝްވަރާ އިން ވެސް ހާސިލު ނުވާނެ ކަަމަށް ބުނެފި

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމަ ނާކާމިޔާބު ވެފައިވާ ކަމަށާއި، ހަނގުރާމައިގެ މައިދާނުގައި އެމެރިކާގެ ރައީސް ޑޮނަލްޑް ޓްރަމްޕް އަށް ހާސިލު ނުކުރެވުނު ކަމެއް، މަޝްވަރާގެ މޭޒު ދޮށުން ވެސް ހާސިލު ނުކުރެވޭނެ ކަމަށް ރަޝިޔާގައި ހުންނަވާ އީރާންގެ ސަފީރު ކާޒެލް ޖަލާލީ ވިދާޅުވެއްޖެ އެވެ. 

ރަޝިޔާގެ ނޫހެއް ކަމަށްވާ "ވެޑޮމޮސްޓީ" އަށް ދެއްވި އިންޓަވިޔުއެއްގައި ޖަލާލީ ވިދާޅުވީ މަދު ދުވަސް ކޮޅެއްގެ ތެރޭގައި މުޅި އީރާން ފަތަހަކޮށް، އެ ޤައުމުގެ ވެރިކަން ބަދަލު ކޮށްލާނެ ކަމަށް އެމެރިކާ އާއި އިޒްރޭލް އިން ބުނަމުން ދިޔަ ކަމަށެވެ. ނަމަވެސް، އެމެރިކާ އާއި އިޒްރޭލް އިން ބޭނުންވި އެއްވެސް މަގުސަދެއް ހާސިލުވެފައި ނުވާ ކަމަށް އޭނާ ވިދާޅުވި އެވެ. އަދި އީރާން އަށް އަމާޒުކޮށް ދެމުންދާ ހަމަލާ ތަކަކީ ބޮޑު ނާކާމިޔާބީއެއްގެ ގޮތުގައި އޭނާ ވަނީ ސިފަ ކުރައްވައިފަ އެވެ. 

މި ހަމަ ނުޖެހުން ތަކުގެ ތެރޭގައި އެމެރިކާ އިން ކުރަމުންދާ ޑިމާންޑު ތަކަށް ބޮޑެތި ބަދަލު ތަކެއް އައިސްފައިވާކަން ފާހަގަ ކުރައްވަމުން ސަފީރު ވިދާޅުވީ، އެެންމެ ފުރަތަމަ އެމެރިކާ އިން ބޭނުންވީ އީރާންގެ ވެރިކަން ވައްޓާލަން ކަމަށެވެ. ނަމަވެސް، ފަހުން އެމީހުންގެ އަމާޒު ހަަމައެކަނި ހޮރްމޫޒް ކަނޑު އޮޅި ހުޅުވާލުމަށް ބަދަލުވެފައިވާ ކަމަށާއި، އެކަން ވެސް ކާމިޔާބު ނުވި ކަމަށް ޖަލާލީ ވިދާޅުވި އެވެ.

މީގެ އިތުރުން އީރާންއާ ދެކޮޅަށް އިއުލާން ކޮށްފައިވާ ކަނޑުގެ ބްލޮކޭޑް އަކީ، އެއްވެސް މާނައެއް އޮތް ކަމެއް ނޫން ކަމަށާއި، އީރާންގެ އަޒުމަކީ ދޫ ނުދީ ކުރިއަށް ދިޔުން ކަމަށް އޭނާ ވަނީ ވިދާޅުވެފަ އެވެ. 

ޖަލާލީ އިތުރަށް ވިދާޅުވީ، ކުރިމަތިލުން ތަކުގެ ސަބަބުން އީރާންގެ ބާރު ދެރަވުމުގެ ބަދަލުގައި، އެ ޤައުމުގެ ޢަޒުމު އިތުރަށް ވަރުގަދަ ވެފައިވާ ކަމަށެވެ. އަދި މީގެ ކުރިން އީރާން އިން ހުށަހެޅި 10 ނުކުތާގެ ޕްލޭން އަށް އެމެރިކާ އިން އެއްބަސްވުމަށް ފަހު، ފަަހުން އެއަށް އަމަލު ކުރުން ހުއްޓާލާފައިވާކަން އޭނާ ފާހަގަ ކުރެއްވި އެވެ.

ހަނގުރާމައިގެ ތެރެެއިން އެމެރިކާގެ ރައީސް ޓްރަމްޕް އަށް ހާސިލު ނުކުރެވުނު ކަންކަން، ދެން ކުރިއަށް އޮތް މަޝްވަރާ ތަކުގައި ވެސް ހާސިލު ނުކުރެވޭނެ ކަމަށް ސަފީރު ވިދާޅުވި އެވެ. އެއާ އެކު އޭނާ ވިދާޅުވީ، ދެ ފަރާތަށް ވެސް ފައިދާ ވާނެ ފަދަ އިންސާފުވެރި އެއްބަސްވުމަކަށް އައުން މުހިންމު ކަމަށެވެ. ނަމަވެސް، އެމެރިކާގެ އަމަލުތައް ހުރީ އެ މަގުން ނޫން ކަމަށް އޭނާ ތުހުމަތު ކުރެއްވި އެވެ.