އެމެރިކާގެ އައު ހުށަހެޅުން ދިރާސާ ކުރަމުން އަންނަ ކަމަށް އީރާން އިން ބުނެފި

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމަ ހުއްޓާލުމަށް، އެމެރިކާ އިން ހުށަހަޅާފައިވާ އައު ހުށަހެޅުން ދިރާސާ ކުރަމުން އަންނަ ކަމަށް އީރާން އިން ބުނެފި އެވެ.

އީރާންގެ ސުޕްރީމް ނެޝަނަލް ސެކިއުރިޓީ ކައުންސިލް އިން ހޮނިހިރު ދުވަހު ބުނީ، އެމެރިކާ އިން ލިބިފައިވާ އައު ހުށަހެޅުންތައް އެ ޤައުމުން ބަލަމުން އަންނަ ކަމަށާއި، ނަމަވެސް އެމެރިކާ އާއެކު މަޝްވަރާ ކުރުމުގައި އެއްވެސް ދަރަޖައެއް ނުދޭނެ ކަމުގެ އިންޒާރު އީރާން އިން ވަނީ ދީފަ އެވެ. 

އީރާންގެ ސަރުކާރުގެ މީޑިއާ އިން ނެރުނު ބަޔާނެއްގައި ސުޕްރީމް ނެޝަނަލް ސެކިއުރިޓީ ކައުންސިލް އިން ބުނީ، ޕާކިސްތާންގެ ސިފައިންގެ ކޮމާންޑަރު އީރާން އަށް ކުރެއްވި ދަތުރުގައި އެމެރިކާ އިން އައު ހުށަހެޅުން ތަކެއް ހުށަހަޅާފައިވާ ކަމަށެވެ. އަދި އީރާން އިން އަންނަނީ އެ ހުށަހެޅުން ބަލަމުން ކަމަށާއި، މިހާތަނަށް އެ ހުށަހެޅުމަށް އެއްވެސް ޖަވާބެއް ދީފައި ނުވާނެ ކަމަށް އީރާން އިން ބުނެފައިވެ އެވެ.

އެ ބަޔާނުގައި ބުނެފައި ވަނީ މަޝްވަރާ ތަކުގައި ބައިވެރިވާ އީރާންގެ ވަފުދުން އެ ޤައުމުގެ ރައްޔިތުންގެ މަސްލަހަތު ހިމާޔަތް ކުރާނެ ކަމަށެވެ. އެގޮތުން އީރާން އިން މަޝްވަރާ ތަކުގައި އެއްވެސް ލުއި ކަމެއް، ނުވަތަ ފަސޭހަ ކަމެއް ނުދޭނެ ކަމުގައި ބުނެފައިވެ އެވެ. 

އެމެރިކާ އާއި އީރާންއާ ދެމެދު ސުލްޙަ ޤާއިމު ކުރުމުގެ މަސައްކަތުގައި ޕާކިސްތާން އިން އަންނަނީ މެދުވެރިއެެއްގެ ދައުރު އަދާ ކުރަމުންނެވެ. އެގޮތުން ޕާކިސްތާންގެ ވެރި ރަށް އިސްލާމްއާބާދުގައި ފުރަތަމަ ބުރުގެ މަޝްވަރާތައް ކުރިއަށް ގެންގޮސްފައިވާއިރު، އެ މަޝްވަރާ ތަކުގައި އެއްވެސް ކުރިއެރުމެއް ލިބިފައި ނުވެ އެވެ.

އީރާން އިން އައު ހުށަހެޅުމުގެ މައުލޫމާތު ހާމަ ކޮށްފައި މި ވަނީ، އީރާންގެ ބަނދަރު ތަކަށް އެމެރިކާ އިން ކުރިމަތި ކުރަމުން އަންނަ ހުރަސް ތަކުގެ ސަބަބުން، ހޮރްމޫޒް ކަނޑު އޮޅި އަލުން ބަންދު ކުރުމަށް ނިންމިތާ ގަޑިއިރު ތަކެއް ފަހުންނެވެ. މިކަމާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ވަނީ އީރާން އަށް އިންޒާރު ދެއްވައިފަ އެވެ. އަދި އެއީ އީރާން އިން އެމެރިކާ "ބްލެކްމެއިން" ކުރަން ކުރާ ކަމެއް ކަމަށް ޓްރަމްޕް ވަނީ ވިދާޅުވެފަ އެވެ. 

ސުޕްރީމް ނެޝަނަލް ސެކިއުރިޓީ ކައުންސިލުން ބުނެފައި ވަނީ، ހޮރްމޫޒް ކަނޑު އޮޅިން ދަތުރު ކުރާ ފަރާތްތައް ބެލުމާއި، ކޮންޓްރޯލް ކުރުން ހަނގުރާމަ ނިމެންދެން ކުރިއަށް ގެންދާނެ ކަމަށެވެ.