ޓްރަމްޕްގެ އިންޒާރު އީރާން އަށް، ބްލެކްމެއިލް ކޮށްގެން ބިރެއް ނުދެއްކޭނެ!

އެމެރިކާ އަށް ބިރު ދައްކައިގެން، ނުވަތަ ބެލްކްމެއިލް ކޮށްގެން އީރާން އަށް ކަންކަން ހާސިލު ނުކުރޭވެނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ޓްރަމްޕް މިހެން ވިދާޅުވެފައި ވަނީ، އީރާން އިން އަލުން ހޮރްމޫޒް ކަނޑު އޮޅި ބަންދު ކުރުމަށް ނިންމާފައި ވަނިކޮށެވެ. ހޮނިހިރު ދުވަހު އީރާން އިން އެ ނިންމުން ނިންމާފައި ވަނީ، ހޮރްމޫޒް ކަނޑު އޮޅި ހުޅުވާލުމަށް ނިންމުމަށް ފަހު އެވެ. 

ދުނިޔޭގެ ބާޒާރަށް ސަޕްލައި ކުރާ ތެލާއި ގޭހުގެ ފަސްބައި ކުޅަ އެއްބައި ދަތުރު ކުރާ މި މުހިންމު ކަނޑު އޮޅި ހުޅުވާލިކަން އީރާން އިން އިއުލާން ކުރީ ހުކުރު ދުވަހު އެވެ. އެއީ އިޒްރޭލް އާއި، ލުބުނާންގެ ހިޒްބުﷲ ޖަމާއަތާ ދެމެދު ލުބުނާންގައި ހިނގަމުން ދިޔަ ހަނގުރާމަ ހުއްޓާލުމަށް އެއްބަސްވުމާ ގުޅިގެންނެވެ. 

އެ ނިންމުމާ އެކު ދުނިޔޭގެ ބާޒާރުގައި ތެލުގެ އަގު ވަރަށް  ބޮޑަށް ދަށަށް ދިޔަ ނަމަވެސް، އީރާންގެ ބަނދަރު ތަކަށް އެމެރިކާ އިން ކުރިމަތި ކޮށްފައިވާ ކަނޑުގެ ބްލޮކޭޑް ނުވަތަ ދަތުރުފަތުރު ހުއްޓުވުން ކުރިއަށް ދާނެ ކަމަށް ޓްރަމްޕް ވިދާޅުވުމުން އީރާން އިން ވަނީ އަނެއްކާ ވެސް ހޮރްމޫޒް ކަނޑު އޮޅި ބަންދު ކުރަން ނިންމައިފަ އެވެ. 

އީރާންގެ މަރުކަޒީ އަސްކަރީ ކޮމާންޑަރުން ހޮނިހިރު ދުވަހުގެ ހެނދުނު ބުނެފައި ވަނީ، އެމެރިކާގެ ބްލޮކޭޑްއާ ގުޅިގެން ހޮރްމޫޒް ކަނޑު އޮޅީގެ ކޮންޓްރޯޯލް ކުރިން އޮތް ޙާލަތަށް ބަދަލު ކޮށްފައިވާ ކަމަށެވެ. އަދި މިހާރު އެ ސަރަހައްދު އޮތީ އީރާންގެ ހަތިޔާރު އެޅި ބާރު ތަކުގެ ވަރުގަދަ ބެލުމުގެ ދަށުގައި ކަމަށް ވެސް އެ ޤައުމުން ބުނެފައިވެ އެވެ. 

އެކަމާ ގުޅިގެން އެމެރިކާގެ ރައީސް ޓްރަމްޕް ވިދާޅުވީ، ދެ ޤައުމުގެ ދެ މެދުގައި އެއްބަސްވުމަކަށް އައުމަށް ވަރަށް ބޮޑަށް ގާތްވެފައިވާ ކަމަށެވެ. ނަމަވެސް، އީރާން އިން އެމެރިކާ އަށް ބިރު ދައްކައިގެން ކަންކަން ހާސިލު ކުރަން އުޅެގެން ނުވާނެ ކަމަށް ޓްރަމްޕް ވިދާޅުވި އެވެ. އީރާން އާއެކު މަޝްވަރާތައް ކުރިއަށްދާކަން ފާހަގަ ކުރައްވަމުން ޓްރަމްޕް ވަނީ، އީރާން އިން މިހާރު އަމަލު ކުރަމުންދާ ގޮތަށް ފާޑު ވިދާޅުވެފަ އެވެ. 

މި މައްސަލައިގެ މެދުވެރިއެއްގެ ދައުރު އަދާ ކުރާ ޕާކިސްތާންގެ އަސްކަރީ ވެރިޔާ އީރާން އަށް ކުރެއްވި ޒިޔާރަތް ހޮނިހިރު ދުވަހު ނިންމަވާލައްވާފައިވާއިރު، އީރާންގެ ޤައުމީ ސަލާމަތާ ބެހޭ މަތީ މަޖިލީހުން ބުނީ އެމެރިކާ އިން އައު ހުށަހެޅުން ތަކެއް ހުށަހަޅާފައިވާ ކަމަށެވެ. އެ ހުށަހެޅުންތައް މިހާރު ދިރާސާ ކުރަމުންދާ ކަަމަށާއި، އަދި އެކަމަށް ރަސްމީކޮށް ޖަވާބެއް ދީފައި ނުވާނެ ކަމަށް ބުނެފައިވެ އެވެ.