މިހާރު ބޭނުން ވަނީ ހަނގުރާމަ ހުއްޓާލުމުގެ ދާއިމީ އެއްބަސްވުމެއް: ލުބުނާންގެ ރައީސް

އިޒްރޭލް އާއި ހިޒްބުﷲއާ ދެމެދު ވެފައިވާ ހަނގުރާމަ ހުއްޓާލުމުގެ އެއްބަސްވުމަށް އަމަލު ކުރަން ފެށުމާ އެކު، ލުބުނާން އިން މިހާރު މިސްރާބު ޖަހާފައި ވަނީ ދާއިމީ އެއްބަސްވުމަކާ ދިމާލަށް ކަަމަށް އެ ޤައުމުގެ ރައީސް ޖޯސެފް އައޫން ވިދާޅުވެއްޖެ އެވެ.

ހުކުރު ދުވަހު ޤައުމާ މުޚާތަބު ކުރައްވައި ދެއްވި ވަރުގަދަ ތަޤުރީރުގައި ރައީސް އައޫން ވިދާޅުވީ، ލުބުނާން އަކީ ދެން އެއްވެސް ބައެއްގެ ހަނގުރާމައިގެ މައިދާނަކަށް ނުވާނެ ކަމަށެވެ. 

އެމެރިކާގެ ރައީސް ޑޮނަލްޑް ޓްރަމްޕް އިސްވެ ހުންނަވައި އިއުލާން ކުރެއްވި 10 ދުވަހުގެ މުއްދަތަކަށް ހަނގުރާމަ ހުއްޓާލުމުގެ އެއްބަސްވުމާ ގުޅޭ ގޮތުން ވާހަކަ ދައްކަވަމުން އައޫން ވިދާޅުވީ، މިއީ ލުބުނާން އަށް އައު މަރުޙަލާއެއް ކަމަށެވެ. 

އަދި މި މަރުޙަލާ އަކީ ހަމައެކަނި ހަނގުރާމަ ހުއްޓާލުމެއް ނޫން ކަމަށާއި، މިއީ ރައްޔިތުންގެ ހައްގުތަކާއި، ބިމުގެ އެއްބައިވަންތަކަމާއި، ޤައުމުގެ ސިޔާސަތު ރައްކާތެރި ކޮށްދޭނެ ދާއިމީ އެއްބަސްވުން ތަކަކަށް މަސައްކަތް ކުރާނެ މަރުޙަލާ އަކަށް ވާނެ ކަމަށް ވެސް އޭނާ ވަނީ ފާހަގަ ކުރައްވައިފަ އެވެ. 

ލުބުނާންގެ ރައީސްގެ ވާހަކަފުޅުގައި، އީރާންގެ ތާއީދު އޮންނަ ހިޒްބުﷲ ޖަމާއަތަށް ނުސީދާ ގޮތެއްގައި އިޝާރާތް ކުރައްވައި ވިދާޅުވީ، ފާއިތުވި ބައި ގަރުނެއްހާ ދުވަހުގެ ތެރޭގައި ފުރަތަމަ ފަހަރަށް ލުބުނާންފެ ސަރުކާރުން ޤައުމުގެ ކަންކަން ނިންމުމުގެ ބާރު އަމިއްލަ އަތް މައްޗަށް ނަގާފައިވާ ކަމަށެވެ. 

މީގެ ކުރިން އެހެން ބައެއްގެ ނުފޫޒުގެ ދަށުގައި އޮތް އޮތުން ނިމުމަކަށް އައިސް، މިއަދު ލުބުނާން އިން މަޝްވަރާ ކުރަމުން ދަނީ އަމިއްލަ ޤައުމުގެ ހައްގުގައި ކަމަށާއި، އެއްވެސް ބައެއްގެ ކުޅި ބަޔަކަށް ލުބުނާން ދެން ނުވާނެ ކަމަށް އައޫން ވަނީ ވިދާޅުވެފަ އެވެ. 

މި ހަނގުރާމައިގެ ތެރެއަށް ލުބުނާން ވަދެފައި ވަނީ، އެެމެރިކާ އާއި އިޒްރޭލް އިން އިސްވެ އީރާން އަށް އަމާޒުކޮށް ހަމަލާ ތަކެއް ދޭން ފެށުމާ ގުޅިގެންނެވެ.