މިސަރުކާރުގެ ބޭފުޅުންނާ ރައްޔިތުން މަޖިލީހުގެ މެންބަރުން ތިއްބެވީ ރައީސް މުއިއްޒުއާއެކު ނޫން: މެންބަރު ޒިޔާދު

މިސަރުކާރުގެ ބޭފުޅުންނާއި ރައްޔިތުންގެ މަޖިލީހުގެ މެންބަރުން  ތިއްބެވީ ރައީސް ޑރ. މުހައްމަދު މުއިއްޒުއާއެކު ނޫން ކަމަށް ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވެއްޖެ އެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި މެންބަރު ޒިޔާދު ވިދާޅުވީ، ރައީސް މުއިއްޒު ވެރިކަމަށް ވަޑައިގެންނަވައި ރައްޔިތުންގެ މަޖިލީހުގެ ސުޕަ މެޖޯރިޓީ ހޯއްދަވައި، މެންބަރުންގެ ފުލް ކޮންޓްރޯލް ނެންގެވި ކަމަށެވެ.

މެންބަރު ޒިޔާދު ވިދާޅުވީ މަންޒަރު ބަލާ މީހުންނަށް ޕީއެންސީގެ މެންބަރުން ތިއްބަވަނީ ރައީސް މުއިއްޒުއާއެކު ވަރަށް ގަދަކޮށް ކަމަށް ފެނުނު ކަމަކު އެއީ ހަގީގަތް ނޫންކަން މަޖިލީހުގެ ކުޑަ ދޮށުގައި ދައްކަވާ ވާހަކަތަކުން އެނގޭ ކަމަށެވެ. އަދި އެކަންކަން ހާމަކުރި ނަމަވެސް ބައެއް ރައްޔިތުންނަށް އެކަން ގަބޫލުނުކުރެވޭ ކަމަށާއި، ހުދު ރައީސް މުއިއްޒު ވެސް ގަބޫލުނުކުރައްވާ ކަމަށެވެ. ނަމަވެސް މިމަހުގެ 4 ވަނަ ދުވަހު ބޭއްވި ތިން އިންތިޚާބުގެ ނަތީޖާއިން އެކަން ހާމަވެފައިވާ ކަަމަށް މެންބަރު ޒިޔާދު ވިދާޅުވި އެވެ. 

މީގެ އިތުރުން މެންބަރު ޒިޔާދު ވިދާޅުވީ މަޖިލިސް މެންބަރުން މެދުވެރި ކޮށްގެން ގާނޫނު އަސާސީއަށް ގެންނަމުންދާ ބަދަލުތަކަށް ރައްޔިތުން ހިތްހަމަ ނުޖެހޭ ކަމަށާއި، ލާމަރުކަޒީ ނިޒާމަށް ގެނައި ބަދަލުތައް ރައްޔިތުން ބަލައި ނުގަންނަ ކަމަށެވެ. 

އެއީ އެ މެންބަރުން ވެސް ގަބޫލެއް ނުކުރޭ އެމީހުން ތިބެންޖެހޭނީ އެ ހާލަތުގެ ކަމަކަށް. އެހެންނަމަވެސް، ދެން އެ ގާނޫނު އިސްލާހު ކުރުމަށްފަހު އެތިބީ ފިތިފަތާ. ދެން އެ ފިތުމުގެ ތެރޭގައި ތިބީ. ތިބީމަ ރައީސުލްޖުމްހޫރިއްޔާ ވެސް މި ފެންނަނީ ޕާލަމެންޓު ވަރަށް ވަރުގަދައޭ. ޕާލަމެންޓު އޮތީ މިގޮތަށޭ. އެހެންވީމާ، ދާއިރާތައް ވެސް އޮންނާނީ އެހެންނޭ. އެހެން ހިތާ ގާނޫނަށާއި ގާނޫނުއަސާސީ އަށް ގެނައި ބޮޑެތި ބަދަލުތައް. ދެން އެހެން ގެނައި ބަދަލަކުން އެއް ބަދަލު މިއިންނަނީ ރައްޔިތުންނާ ހަމައަށް އަންނަން. ރައްޔިތުންނަށް ބަހެއް ބުނެލަން ލިބުނު ހަމައެކަނި ފުރުސަތުގައި ރައްޔިތުން ބަސް އެ ބުނީ. އޭގެ ކުރީގައި ރައްޔިތުންނަކަށް ނުލިބޭ. ރައްޔިތުން ހޮވާފައި ތިބި މެންބަރުން ފުރަތަމަ ހަމަ އަޅުވެތިކުރި. ކޮށްފައި އެ މީހުން އަޅުވެތިކަމުގައި ތިބެގެން ދައްކާ ވާހަކަތާ މިއަދާ ހަމައަށް އިވުނީ. އެ މީހުންނާ ނުލާ ކަމެއް ނިންމަން ސަރުކާރަށް ލިބުނު އެންމެ ފުރުސަތެއް. ރައްޔިތުންގެ މަޖިލީހުގައި ތިބި މެންބަރުންނާ ނުލާ ނިންމަން ލިބުނު އެންމެ ފުރުސަތެއް. އެ ފުރުސަތުގައި ރައްޔިތުން އެ ނިންމީ

ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު 

މެންބަރު ޒިޔާދު ވިދާޅުވީ އިންތިޚާބަށްފަހު މިހާރު ސަރުކާރަށް އަންނަ ބަދަލުތަކާ އެކު ވެސް ވަރަށް  ބޮޑު މަންޒަރެއް ފެނިގެންދާ ކަމަށެވެ. 

އެގޮތުން ސަރުކާރުގެ ތެރޭގައި ތިއްބެވި ބޭފުޅުންނާއި، ރައްޔިތުން މަޖިލީހުގެ މެންބަރުން ތިއްބެވީ ރައީސް މުއިއްޒުއާއެކު ނޫންކަން ހާމަވާ ކަމަށް އޭނާ ވިދާޅުވި އެވެ. 

މެންބަރު ޒިޔާދު މިމޭރުމުން ވާހަކަ ދެއްކެވިއިރު، އިންތިޚާބަށްފަހު ސަރުކާރު ބައެއް ކުންފުނިތަކުގެ ސީއީއޯއިންނާއި، އެކި މަގާމުތަކުގައި ތިއްބެވި ވެރިން ދަނީ މަގާމުތަކުން ދުރުކުރަމުންނެވެ.