އައިއާރުޖީސީން ސަރަހައްދުގައި ހުރި އެމެރިކާ އާއި އިޒްރޭލުގެ އަމާޒުތަކަށް ވަރުގަދަ ހަމަލާތަކެއް ދީފި

ސަރަހައްދުގައި ހުރި އެމެރިކާ އާއި އިޒްރޭލުގެ އަމާޒުތަކަށް ވަރުގަދަ އަދި ކުއްލި ހަމަލާތަކެއް ދީފި ކަމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ބުނެފި އެވެ. އީރާނުގެ ކަނޑުގެ ސިފައިން ދިން މި ހަމަލާތަކުގެ ތެރޭގައި މުދާ އުފުލާ ބޯޓުފަހަރާއި، އަސްކަރީ މަރުކަޒުތަކާއި، ރާޑަރު ސިސްޓަމްތަކުގެ އިތުރުން ޑްރޯން ދިފާއީ ނިޒާމުތަކަށް ދިން ހަމަލާތައް ހިމެނެއެވެ.

އައިއާރުޖީސީން އަންގާރަ ދުވަހު ނެރުނު ބަޔާނެއްގައި ބުނެފައިވަނީ، އެ ޖަމާއަތުގެ ކަނޑުގެ ސިފައިންގެ ހިތްވަރުގަދަ މުޖާހިދުން އަންގާރަ ދުވަހުގެ ފަތިހުގެ ވަގުތެއްގައި ކާމިޔާބު ހަތަރު އޮޕަރޭޝަނެއް ވަރަށް ހަލުވިކަމާއެކު ކުރިއަށް ގެންގޮސްފައިވާ ކަމަށެވެ.

އެ ބަޔާނުގައިވާ ގޮތުން "އޮޕަރޭޝަން ޓްރޫ ޕްރޮމިސް 4" ގެ 88 ވަނަ ފިޔަވަހީގެ ދަށުން، އައިއާރުޖީސީގެ ކަނޑުގެ ސިފައިން ވަނީ އެމެރިކާ އާއި އިޒްރޭލުގެ ޓެރަރިސްޓް އަމާޒުތަކަށް ވަރުގަދަ ހަމަލާތަކެއް ދީފައެވެ.

މި ކުއްލި ހަމަލާތަކުގެ ތެރޭގައި، ޕާޝިއަން ގަލްފުގެ މެދުތެރޭ ސަރަހައްދުން ދަތުރުކުރަމުންދިޔަ ޒަޔަނިސްޓް އިޒްރޭލަށް ނިސްބަތްވާ "އެކްސްޕްރެސް ހަލްފޮންގް" ނަމަކަށް ކިޔާ ކޮންޓެއިނަރު އުފުލާ ބޯޓަކަށް، އައިއާރުޖީސީގެ ކަނޑުގެ ސިފައިން ބެލިސްޓިކް މިސައިލުން ހަމަލާދީފައިވާ ކަމަށް އެ ބަޔާނުގައި ބުނެފައިވެއެވެ.

އައިއާރުޖީސީން އިތުރަށް ހާމަކުރި ގޮތުގައި، ދެވަނަ އޮޕަރޭޝަނެއްގައި ޔުނައިޓެޑް އަރަބް އެމިރޭޓްސް (ޔޫއޭއީ) ގެ އައްސޭރިފަށުގައި ތިބި އެމެރިކާގެ މެރިން ސިފައިންގެ މަރުކަޒަކަށް ވަނީ ޑްރޯން ބޭނުންކޮށްގެން ސީދާ ހަމަލާތަކެއް ދީފައެވެ. މި ސިފައިންނަކީ އައިއާރުޖީސީގެ މިސައިލް ހަމަލާތަކަށް ބިރުން، އަސްކަރީ މަރުކަޒުން ބޭރުގައި ނިވާވެގެން ތިބި ބައެއް ކަމަށްވެސް ބަޔާނުގައި ފާހަގަކޮށްފައިވެއެވެ.

މީގެ އިތުރުން، ބަހްރައިންގެ މަނާމާ އެއާޕޯޓް ކައިރީގައި ހުންނަ އެމެރިކާގެ ފިފްތް ފްލީޓްގެ މަރުކަޒުން ބޭރުގައި ހަރުކޮށްފައި ހުރި "ހޯކް" އެންޓި-ޑްރޯން ސިސްޓަމް، އައިއާރުޖީސީގެ ޑްރޯންތަކުން ސުންނާފަތިކޮށްލާފައިވާ ކަމަށްވެސް އެ ބަޔާނުގައި ބުނެފައިވެއެވެ.

ހަމައެއާއެކު، އެމެރިކާގެ "އަހުމަދު އަލް ޖާބިރު" ޓެރަރިސްޓް މަރުކަޒުގައި ހުރި ކުރިއާލާ އިންޒާރުދޭ ދެ ރާޑަރު ސިސްޓަމަކަށްވެސް އައިއާރުޖީސީގެ ޑްރޯންތަކުން ހަމަލާދީފައިވާ ކަމަށް އެ ޖަމާއަތުން ބުނެއެވެ.

އިސްލާމީ އިންގިލާބުގެ ލީޑަރު އާޔަތުﷲ ސައްޔިދު މުޖުތަބާ ޚާމަނާއީގެ އަމުރުފުޅާ އެއްގޮތަށް، ހޮރްމޫޒް ކަނޑުއޮޅި އޮތީ އައިއާރުޖީސީގެ ފުރިހަމަ ކޮންޓްރޯލްގެ ދަށުގައި ކަމަށް އެ ޖަމާއަތުން ބުނެފައިވެއެވެ. އަދި ދުޝްމަނުންގެ އެއްވެސް ހަރަކާތެއް ފެނިއްޖެނަމަ، ވަގުތުން މިސައިލާއި ޑްރޯން ބޭނުންކޮށްގެން ހަމަލާދޭނެ ކަމުގެ އިންޒާރުވެސް ވަނީ ދީފައެވެ.