ގިނަ ބަޔަކު ކާމިޔާބީގެ ޝަރަފު ހޯދަން އުޅުނަސް، ގޮތް ނިންމީ ރައްޔިތުން!

ނިމިދިޔަ ރެފަރެންޑަމް ވޯޓާއި، ލޯކަލް ކައުންސިލް އިންތިޚާބު އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުން ނުކުތް ނަތީޖާގެ ކްރެޑިޓާމެދު ދައުވާކުރާ މީހުން ދުވަހެއް ދުވަހަކަށް ވަނީ ގިނައެވެ.

ސިޔާސީ ބޭފުޅުންނާއި، ކުރީގެ ރައީސުންނާއި، ސިޔާސީ އެކްޓިވިސްޓުންނަށް ދާންދެން ގެންދަނީ މި އިންތިޚާބުތަކުގެ ނަތީޖާއަކީ އެ ބޭފުޅުންގެ ކާމިޔާބީއެއް ކަމަށް ވިދާޅުވަމުންނެވެ. ކޮންމެ ބޭފުޅަކުވެސް ވާހަކަދައްކަވަނީ އެ ބޭފުޅެއްގެ ހިކުމަތްތެރިކަމާއި، ނުފޫޒާއި ނުވަތަ ލީޑަރޝިޕްގެ ސަބަބުން މި ނަތީޖާ ނުކުތް ކަމަށެވެ.

އެހެންނަމަވެސް، މި ހުރިހާ އަޑުގަދަ ވާހަކަތަކެއްގެ ފަހަތުގައި އޮތީ މިއަށްވުރެ މާ ސާދާ، ތެދުވެރި ހަގީގަތެކެވެ. އެއީ މި ކާމިޔާބީއަކީ ވަކި ފަރުދަކަށް ނުވަތަ ސިޔާސީ ޖަމާއަތަކަށް ނިސްބަތްވާ ކާމިޔާބީއެއް ނޫން ކަމެވެ. މިއީ ރައްޔިތުންގެ ކާމިޔާބީއެކެވެ.

މިއީ އަވީގައި ކިއޫތަކުގައި މަޑުކޮށްގެން ތިބި އާންމު ދިވެހި ރައްޔިތުންގެ ކާމިޔާބީއެކެވެ. އެއީ ސިޔާސީ ޕާޓީތަކާއި، ކެންޑިޑޭޓުންނާއި، މެނިފެސްޓޯތަކުން ދެއްކި މަންޒަރުތައް ބަލައި، ދެނެގަތުމަށްފަހު އަމިއްލަ ގަބޫލުކުރުންތަކުގެ މައްޗަށް ބިނާކޮށް، ވޯޓުލާން ނުކުތް ރައްޔިތުންނެވެ.

އާންމު ރައްޔިތުންގެ ނިންމުމަކަށްފަހު، އެކަމުގެ ޝަރަފު ހޯދުމަށް ސިޔާސީ ބޭފުޅުން އަވަސްވެގަންނަ ގޮތުން ވަރަށް ގިނަ ކަންކަން ހާމަވެގެންދެއެވެ. މިއިން ދޭހަވަނީ ރައްޔިތުންނަކީ ހަމައެކަނި ބާރުވެރިން ނުވަތަ ނުފޫޒުގަދަ މީހުން ދައްކާ މަގަކުން ހިނގާ ބައެއް ކަމަށް ގަބޫލުކުރެވޭ ކުރުން އަދިވެސް ދެމިއޮތް ކަމެވެ. ނަމަވެސް ރައްޔިތުންނަކީވެސް އަމިއްލައަށް ވިސްނާ، ކަންކަން މުތާލިއާކޮށް، ގޮތް ނިންމާ ބައެކެވެ.

މި ނަތީޖާއަކީ ހަމައެކަނި ބޮޑެތި ކޮޓަރިތަކުގައި ކުރެވުނު މަޝްވަރާތަކުން ނުވަތަ ކެމްޕޭން އޮފީސްތަކުން ނެރުނު ނަތީޖާއެއް ނޫނެވެ. މިއީ ގޭބިސީތަކުގެ ތެރޭގައާއި، އާއިލާތަކުގެ މެދުގައި ކުރެވުނު ވާހަކަތަކާއި، ގައުމު މިސްރާބު ހުރި ގޮތާ މެދު އަމިއްލައަށް ކުރެވުނު ފިކުރުތަކުގެ ނަތީޖާއެވެ.

މިއީ ރައްޔިތުންގެ ދިރިއުޅުމުގެ ތަޖުރިބާތަކާއި، ހުރި ކަންބޮޑުވުންތަކާއި، އުންމީދުތަކުގެ އިތުރުން، ކަންކަން ހުންނަންޖެހޭނެ މިންގަނޑާ މެދު ރައްޔިތުން ދެކޭ ގޮތުގެ ނަތީޖާއެވެ. އަދި އެ މިންގަނޑުން ކަންކަން ބޭރުވުމުން، ރައްޔިތުން އެކަމަށް އިޖާބަދިނީއެވެ.

މި ނަތީޖާ ބާރުވެރިކޮށްދޭ ސަބަބަކީ މިއީއެވެ. މިއީ ހަމައެކަނި ބަޔަކު ރާވައިގެން އުފެއްދި ނަތީޖާއެއް ނޫނެވެ. މިއީ ވަކި ފަރާތަކުން ނުވަތަ ވަކި ހަރަކާތަކުން ތަރުތީބުކުރި ކަމެއްވެސް ނޫނެވެ. މިއީ ކޮންމެ ވޯޓުލާ މީހެއްގެ އަމިއްލަ އިހުސާސްތަކާ ގުޅިފައިވާ، ރައްޔިތުންގެ އިޖުތިމާއީ ނިންމުމެކެވެ. މިފަދަ ނިންމުމެއްގެ މިލްކުވެރިކަން އާންމު ރައްޔިތުން ފިޔަވައި އެހެން އެއްވެސް ފަރާތަކަށް ދައުވާއެއް ނުކުރެވޭނެއެވެ.

ޑިމޮކްރަސީއެއްގެ ހަގީގީ ބާރަކީ ލީޑަރުންނެއް ނޫނެވެ. އެއީ އެ ގައުމެއްގެ ރައްޔިތުންނެވެ. ލީޑަރުންނަށް މަގުދައްކައި، ކެމްޕޭންކޮށް، ވާހަކަދެއްކިދާނެއެވެ. ނަމަވެސް އެންމެ ފަހުގެ ނިންމުން ނިންމާނީ ރައްޔިތުންނެވެ. އަދި ރައްޔިތުން ގޮތެއް ނިންމުމުން، އެ ނިންމުން ބަދަލުކުރުމަށް ދައްކާ އެއްވެސް ވާހަކައަކަށްވުރެ އެ ނިންމުން މާ މުހިއްމުވެގެން ދެއެވެ.