"ނޫނެކޭ" ބުނެ މިފަހަރު ރަތްރޮނގު ދަމާލީ ރައްޔިތުން: ހާމަވެގެންދިޔައީ ސިޔާސީ މަންފާއަށްޓަކައި ދައުލަތުގެ ބިންގަލާ ކުޅުމަށް ރައްޔިތުން ފުރުސަތު ނުދޭނެކަން!

"ރަތް ރޮނގު" ގެ ވާހަކައަކީ މިއަދުގެ ރައީސް ޑރ މުޙައްމަދު މުއިއްޒު ރިޔާސީ އިންތިޚާބު ކާމިޔާބު ކުރެއްވުމަށާއި، އޭގެ ފަހުން ވެރިކަމުގައި ދިމާވި އެކި ކަންކަމުގައިވެސް އެންމެ ގިނައިން ބޭނުންކުރެއްވި އެއް ލަފުޒެވެ. އެގޮތުން ޤައުމުގެ މިނިވަންކަމާއި، ސިޔާދަތާއި، އިސްތިޤުލާލާއި، ޤާނޫނުއަސާސީއާއި، މިހެންގޮސް ކިޔާނެ ކަމެއް ނެތެވެ. ރަތްރޮނގު ހުރަސް ނުކުރެވޭނެކަމުގެ އިންޒާރު ރައީސް ދެއްވީ މަދަކުން ނޫނެވެ.

ނަމަވެސް، އޭޕްރީލް މަހުގެ 4 ވަނަ ދުވަހު މި މަންޒަރު މުޅިން ބަދަލުވެގެން ދިޔައެވެ.

މިފަހަރު ރަތް ރޮނގު ދެމީ ސަރުކާރަކުން ނޫނެވެ. މިފަހަރު ރަތް ރޮނގު ދެމީ ރައްޔިތުންނެވެ. ފެންނަ  ނުފެންނަ ވޯޓުގައި ނޫނެކޭ ބުނި މީހުންގެ އަދަދު މިއަދުގެ ރައީސް ޑރ މުއިއްޒަށް ރިޔާސީ އިންތިޚާބުގެ ދެވަނަ ބުރުގައި ތާއީދުކުރި މީހުންނަށްވުރެވެސް ގިނައެވެ. 

ދިވެހިރާއްޖޭގެ ފަހުގެ ތާރީޚުގައި ވަކި ދާއިރާއެއް ބެލުމެއް ނެތި އެކަމަކަށް އެންމެ ބޮޑު ސަމާލުކަމެއް ލިބިގެން މި ދިޔަ ފެންނަ ނުފެންނަ ވޯޓުގައި، ރައްޔިތުން ހަމައެކަނި ވޯޓު ދިނީ އެ ވޯޓުގައި އޮތް ސުވާލަކަށް ނޫނެވެ. ރައްޔިތުން ރައްދު ދިނީ ކަންކަން ވަމުންދިޔަ ގޮތަށެވެ. އަދި އޮޅުމެއް ނެތް ސާފު އިބާރާތުން ސަރުކާރަށް ބުނެދިނީ: މި ރޮނގު ހުރަސްނުކުރާށެވެ.

ޤާނޫނުއަސާސީއާ ނުކުޅޭށެވެ. އޭގެ މާނަ އޮޅުވާނުލާށެވެ. އަމިއްލަ ފަސޭހައަށްޓަކައި ޤާނޫނުއަސާސީއަށް ބޭނުންހާ ބަދަލެއް ނުގެންނާށެވެ. ސިޔާސީ މަންފާއަށްޓަކައި ޤާނޫނުއަސާސީ ހަތިޔާރަކަށް ނަހަދާށެވެ.

"ރަތް ރޮނގު" މި ލަފުޒަކީ ބާރުގަދަ ލަފުޒެކެވެ. ސަބަބަކީ އެ ރޮނގު ހުރަސްކޮށްފިނަމަ އޭގެ ނަތީޖާ ހިތްދަތިވާނެކަން އެއިން ދޭހަވާތީއެވެ.

ޤާނޫނުއަސާސީއަކީ ވަގުތީ ގޮތުން ބާރުގައި ތިބޭ ބައެއްގެ މަސްލަހަތަށް އޮންނަ އެއްޗެއް ނޫނެވެ. އެއީ ދައުލަތުގެ ބިންގަލެވެ. ބާރުތައް ބެހިފައިވާކަމާއި، ބާރުތަކަށް ހައްދުތަކެއް ހުރިކަމާއި، ޖަވާބުދާރީވާންޖެހޭކަން ކަށަވަރުކޮށްދޭ އޮނިގަނޑެވެ. އެއީ ދިވެހި ސިޔާސީ މައިދާނުގައި މިހާރު އިތުރުވަމުންދާ ބާރުގެ ނަހަމަ ބޭނުންކުރުން ހުއްޓުވުމަށްޓަކައި ފަރުމާކޮށްފައިވާ އެއްޗެކެވެ.

އެހެންނަމަވެސް، ފަހަކަށް އައިސް ދިވެހިންނަށް ފެންނަމުންދިޔައީ މި ބިންގާ ކަމަށްވާ ޤާނޫނުއަސާސީއަކީ ބޭނުންހާ ގޮތަކަށް ލެންބޭނެ އެއްޗެއްގެ ގޮތުގައި ބަލަމުންދާ ތަނެވެ. ސިޔާސީ ރޭވުންތަކާ އެއްގޮތަށް ބަދަލުކުރެވޭ، ނުވަތަ އަލުން ލިޔެވިދާނެ އެއްޗެއްގެ ގޮތުގައި ބަލަމުންދާ ތަނެވެ.

ދިވެހި ރައްޔިތުން ނުކުމެ އެކަމަށް ނޫނެކޭ ބުނެ، ރަތް ރޮނގު ދަމަން ޖެހުނީ އެ ހިސާބުންނެވެ. ދައުލަތުގެ އެންމެހާ ބާރުތައް ފެށެނީ ރައްޔިތުންގެ ކިބައިންކަން ހަނދާންކޮށްދޭން ޖެހުނީ އެހިސާބުންނެވެ.

ޤާނޫނުއަސާސީއަށް އިސްލާހު ގެނައުމަކީ އޭގެ ޒާތުގައި ގޯސް ކަމެއް ނޫނެވެ. ޑިމޮކްރަސީތައް ކުރިއަރަމުންދާއިރު، ޤާނޫނީ އޮނިގަނޑުތަކަށް ބަދަލު ގެންނަން ޖެހޭ ފަހަރު އާދެއެވެ. ނަމަވެސް، އެފަދަ ބަދަލުތައް ގެންނަންވާނީ ފުންކޮށް ވިސްނައި، ގިނަ ބައެއްގެ އިއްތިފާގުން، އަދި އެންމެ މުހިންމު ކަމަކީ، ހަގީގީ ބޭނުމެއް އޮވެގެންނެވެ.

ދިވެހީން ދެކޮޅު ހެދީ ބަދަލު ގެނައުމަކަށް ނޫނެވެ. އެ ބަދަލު ގެންނަން އުޅުނު ގޮތަށާއި އޭގެ ފަހަތުގައި އޮތް ނިޔަތަށެވެ.

އެހެންކަމުން، މި ވޯޓުގެ ނަތީޖާއަކީ ސިޔާސީ ނަތީޖާއެއް ނޫނެވެ. އެއީ ޤާނޫނުއަސާސީ އެކުލަވާލި ޚާއްސަ މަޖިލީހުން ބަލައިގެންފައިވާ އުސޫލުތަކެއް އަލުން ކަށަވަރުކުރުމެވެ. ކުރު މުއްދަތުގެ ސިޔާސީ މަސްލަހަތުތަކަށްވުރެ މަތީގައި ހުންނަންޖެހޭ ކަންތައްތަކެއް ހުރިކަން ހާމަކޮށްދިނުމެވެ.

އެއީ ހަގީގަތުގައިވެސް ކުރެހުނު ރަތް ރޮނގެކެވެ.