ސިޓީތަކުން ސަރުކާރަށް ދިނީ ރަނގަޅު މެސެޖެއް، 2028 ކާމިޔާބު ނުވާނެކަން ވަރަށް ސާފު: އާތިފް
ކުޅުދުއްފުށީގެ ތަރައްޤީއަށް އެމްޑީޕީން ކޮށްފައިވާ މަސައްކަތްތައް ރައްޔިތުން ބަލައިގަންނަކަން އިންތިޚާބުގެ ނަތީޖާއިން ހާމަވެފައިވާ ކަމަށް މޭޔަރު މުހައްމަދު އާތިފް ވިދާޅުވި.
މޭޔަރ މުޙައްމަދު ޢާޠިފް | ކުޅުދުއްފުށި ސިޓީ ކައުންސިލް
ސިޓީތަކުން ސަރުކާރަށް ދިނީ ރަނގަޅު މެސެޖެއް ކަމަށާއި އެ މެސެޖަކީ ސިޓީތަކުން ސަރުކާރަށް އިތުބާރެއް ނެތް ކަމުގެ މެސެޖު ކަމަށް ކުޅުދުއްފުށި ސިޓީގެ މޭޔަރ މުހައްމަދު އާތިފް ވިދާޅުވެއްޖެ އެވެ.
ރާއްޖެޓީވީ އަށް ދެއްވި ބަސްތީގަތުމެއްގައި ވިދާޅުވީ މިހާރު 2028 ކާމިޔާބު ނުވާނެކަން ސަރުކާރަށް ވެސް ވަރަށް ބޮޑަށް ސާފު ވެފައިވާނެ ކަމަށެވެ. ކުޅުއްދުއްފުށިން ސަރުކާރަށް ދިނީ ރަނގަޅު މެސެޖެއް ކަމަށާއި އެކަމުގެ ސަބަބުން އެ ސިޓީ އަށް ސަރުކާރުންވީ ވައުދުތައް ފުއްދުމަށް ސަރުކާރަށް ބާރު އެޅިގެންދާ ކަމަށް އޭނާ ވަނީ ވިދާޅުވެފަ އެވެ.
ކުޅުދުއްފުށީގައި މިހާރު ވެސް އޮތީ އެމްޑީޕީގެ މެޖޯރިޓީ އޮތް ކައުންސިލެއް ކަމަށް ވާއިރު އެމްޑީޕީ އިން އެ ސިޓީ އަށް ގެނެސްދީފައިވާ ތަރައްޤީ ރައްޔިތުން ބަލައިގަންނަ ކަމަށް އާތިފް ވިދާޅުވި އެވެ. އާތިފް އިތުރަށް ވިދާޅުވީ ރައްޔިތުން އެ ކައުންސިލަށް އިތުބާރު ކުރާކަން ހާމަވެފައިވާ ކަމަށް އާތިފް ވަނީ ވިދާޅުވެފަ އެވެ.
"އަނެއްކަމަކީ ސަރުކާރަށް މި ވޭތުވެ ދިޔަ ދެ އަހަރުގެ ތެރޭގައި ތަރައްޤީގެ އެއްވެސް ކަމެއް ނުފެށޭ. ޚާއްސަކޮށް ކުރީ ސަރުކާރުތަކުން ފަށާފައި ހުރި ކަންކަން ވެސް އެ ހުރީ ހުއްޓިފައި. އެކަން ކަން ނުކުރެވި ޚަރަދުތައް ވީ ބޮޑު އެއީ ވެސް އިންތިޚާބުގައި ބޮޑު ދައުރެއް އަދާކުރި ކަމެއް." އާތިފް ވިދާޅުވި އެވެ.
އާތިފް ވަނީ އެ ނިންމުމަކީ އެ ސިޓީގެ ކުރިމަގަށްޓަކައި އާއްމުން ނިންމި ކަމެއް ކަމަށް ފާހަގަކުރައްވާފަ އެވެ. ފެނިގެން ދިޔައީ ލާމަރުކަޒީ ނިޒާމަށް އަތް ބޭނުމަށް ނޫނެކޭ ބުނި މަންޒަރު ކަމަށް ވެސް އާތިފް ވިދާޅުވި އެވެ.
