މިއީ ކައުންސިލް އިންތިހާބެއްގައި އެންމެ ގިނަ މީހުން ވޯޓުލީ ފަހަރު
މިފަހަރުގެ ލޯކަލް ކައުންސިލް އިންތިހާބުގައި ވޯޓުލުމުގެ ހައްގު ލިބިފައިވާ މީހުންގެ 72.88 އިންސައްތަ މީހުން ވޯޓުލާފައިވާއިރު، މިއީ 2021 ވަނަ އަހަރާ އަޅާބަލާއިރު 5 އިންސައްތައިގެ އިތުރުވުމެއް. އިންތިހާބުގެ ވަގުތީ ނަތީޖާއިން ދައްކާގޮތުގައި ހުރިހާ ސިޓީތަކެއްގެ މޭޔަރުކަމާއި ކައުންސިލްތަކުގެ މެޖޯރިޓީ ކާމިޔާބުކުރީ އިދިކޮޅު އެމްޑީޕީން. މީގެ އިތުރުން، ރިޔާސީ އިންތިހާބާއި މަޖިލިސް އިންތިހާބު އެއްކޮށްލުމާ މެދު ރައްޔިތުންގެ ޚިޔާލު ހޯދުމަށް ނެގި ވޯޓުގައި ގިނަ ބަޔަކު ވަނީ އެކަމާ ދެކޮޅަށް ވޯޓު ދީފައި.
ހޮނިހިރު ދުވަހު ބޭއްވި ލޯކަލް ކައުންސިލް އިންތިހާބުގައި އާންމުންގެ މީހަކު ވޯޓުލާން އައިސް. | ރާއްޖެ އެމްވީ
ލޯކަލް ކައުންސިލް އިންތިހާބުގެ ތާރީހުގައި އެންމެ ގިނަ އަދަދެއްގެ މީހުން ވޯޓުލާފައިވަނީ މި ފަހަރުގެ އިންތިހާބުގައި ކަމަށް އިލެކްޝަންސް ކޮމިޝަނުން ހާމަކޮށްފައިވާ ވަގުތީ ތަފާސްހިސާބުތަކުން ދައްކައިފި އެވެ.
މި އިންތިހާބުގައި ވޯޓުލުމުގެ ހައްގު ލިބިފައިވަނީ 294،876 މީހަކަށެވެ. އޭގެތެރެއިން 214،898 މީހުން ވޯޓުލާފައިވާކަމަށް އިލެކްޝަންސް ކޮމިޝަނުން ހާމަކޮށްފައިވެ އެވެ. މިއީ އިންތިހާބުގައި ވޯޓުލުމުގެ ހައްގު ލިބިފައިވާ މީހުންގެ ތެރެއިން 72.88 އިންސައްތަ އެވެ.
އިލެކްޝަންސް ކޮމިޝަނުން ބުނީ މީގެކުރިން ބޭއްވި ލޯކަލް ކައުންސިލްތަކުގެ އިންތިހާބުތަކާއި އަޅާބަލާއިރު އެންމެ ގިނަ ބަޔަކު ވޯޓުލާފައިވަނީ މި ފަހަރުކަމަށެވެ. އެންމެ ފަހުން 2021 ވަނަ އަހަރު ބޭއްވި ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބާ އަޅާބަލާއިރު މި ފަހަރުގެ އިންތިހާބުގައި 5 އިންސައްތަ މީހުން އިތުރަށް ވޯޓުލި އެވެ. 2021 ވަނަ އަހަރު ވޯޓުލީ 189,517 މީހުންނެވެ. މި ފަހަރު ވޯޓުލީ 214،898 މީހުންނެވެ. މިއީ 25،381 މީހުންގެ ތަފާތެކެވެ.
ހެނދުނު 8 ޖެހިއިރު ވޯޓުލާން ފެށި މި އިންތިހާބުތަކުގައި ވޯޓުލުމުގެ ފުރުސަތު ދޭގޮތަށް ފުރަތަމަ އޮތީ ހަވީރު ހަތަރު ޖެހުމާ ހަމައަށެވެ. އެ ވަގުތާ ހަމައަށް 68 އިންސައްތަ މީހުން ވޯޓުލި އެވެ. ކިއޫތައް ބަންދުކުރި ނަމަވެސް ވޯޓުލުން ނިމި ހުރިހާ ފޮއްޓެއް ބަންދުކުރެވުނީ ރޭ ދިހަ ޖަހާއިރު ތިރީސް މިނެޓް ވެފައިވަނިކޮށެވެ.
އިންތިހާބުގެ މެޖޯރިޓީ ނެގީ އިދިކޮޅު އެމްޑީޕީ އިންނެވެ. ވަގުތީ ނަތީޖާއިން ދައްކާގޮތުން ސިޓީތަކުގެ މޭޔަރުކަން ހޯއްދަވާފައިވާ ގޮތަށް ބަލާނަމަ އައްޑޫގެ މޭޔަރުކަމަށް އަލީ ނިޒާރު، މާލޭގެ މޭޔަރުކަމަށް އާދަމް އާޒިމް، ތިނަދޫގެ މޭޔަރުކަމަށް ސައުދު އަލީ، ކުޅުދުއްފުށީ މޭޔަރުކަމަށް މުހައްމަދު އާތިފް، ފުވައްމުލަކު މޭޔަރު ކަމަށް އިސްމާއީލް ރަފީގް ވަނީ ހޮވިފަ އެވެ. މީގެ އިތުރުން ފަސް ސިޓީގެ އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ގޮނޑި ވެސް އެމްޑީޕީ އިން ކާމިޔާބުކޮށްފަ އެވެ.
ސިޓީ ކައުންސިލްތަކުގެ ގޮނޑިތަކުގެ ތެރެއިން މާލެ ސިޓީގެ ވިލިމާލެ ދާއިރާގެ ގޮނޑި ކާމިޔާބު ކުރީ ސަރުކާރު ފަޅިން އިބްރާހިމް ސަމާހު އެވެ. މާލޭގެ ދެން ހުރި ގޮނޑިތައް ކާމިޔާބުކުރަނީ އިދިކޮޅު އެމްޑީޕީންނެވެ. އައްޑޫ ސިޓީ އިން ވެސް ސަރުކާރަށް ލިބުނީ 1 ގޮނޑި އެވެ. އެއީ ހިތަދޫ މޫލެކެ ގޮނޑިއަށް ކުރިމަތިލި ޕީއެންސީގެ ކެންޑިޑޭޓު އަހުމަދު ސައީދު އެވެ. ދެން ހުރި ގޮނޑިތައް ކާމިޔާބު ކުރީ އެމްޑީޕީ އިންނެވެ.
ފުވައްމުލައް ސިޓީ އިން އެމްޑީޕީ އިން ކުރިމަތިނުލާ ގޮނޑި ފިޔަވައި ދެން ހުރި ހުރިހާ ގޮނޑިތަކެއް ކާމިޔާބު ކުރި އެވެ. އެމްޑީޕީ އިން ކުރިމަތި ނުލީ ދަޑިމަގު ގޮނޑި އަށެވެ. އަދި އެ ގޮނޑިއަށް ކުރިމަތިލި ކެނޑިޑޭޓުންގެ ތެރެއިން ހޮވުނީ އަމިއްލަ ގޮތުން ވާދަކުރި ކެންޑިޑޭޓް އެވެ. ހަމަ މިފަދައިން ކުޅުދުއްފުށި ސިޓީ އިން ވެސް 1 ގޮނޑި ފިޔަވައި ހުރިހާ ގޮނޑިއެއް ކާމިޔާބު ކުރި އެވެ. ޕީއެންސީއަށް 1 ގޮނޑި ލިބުނު އިރު އެ ގޮނޑި ކާމިޔާބު ކުރީ މިހާރު ވެސް ކައުންސިލަރު އިބްރާހިމް އަހުމަދު އެވެ.
ތިނަދޫ ސިޓީއަށް ބަލާއިރު، 2 ގޮނޑި ފިޔަވައި އެހެން ހުރިހާ ގޮނޑިއެއް ކާމިޔާބު ކުރީ އެމްޑީޕީ އިންނެވެ. ޕީއެންސީއަށް ލިބުނީ ހުޅަނގު ދެކުނު އަދި ދެކުނު މެދު ގޮނޑި އެވެ. 4 ގޮނޑި އެމްޑިޕީ އިން ނެގި އެވެ.
ވަގުތީ ނަތީޖާތައް ދައްކާގޮތުގައި ކައުންސިލުގެ ގިނަ ގޮނޑިތައް ވެސް ކާމިޔާބުކޮށްފައިވަނީ އެމްޑީޕީ އިންނެވެ. މީގެ އިތުރުން ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލަން ފެނޭތޯ ބަލަން ނެގި ފެންނަ ނުފެންނަ ވޯޓުގައި ދެ އިންތިހާބު އެއްކޮށްލަން އާއްމުން ވަނީ ބޮޑުތަކުން ނޫނެކޭ ބުނެފަ އެވެ.
